قازاقستاندا بيىل 8 ميلليون توننا بيدايدى ەكسپورتقا شىعارادى

نۇر- سۇلتان. قازاقپارات - اۋىل شارۋاشىلىعى ءمينيسترى ساپارحان وماروۆ بيداي وندىرۋشىلەر مەن ترەيدەرلەرگە ىشكى نارىقتا بيدايدىڭ باعاسىن قىمباتتاتپاۋعا شاقىردى، دەپ حابارلايدى قازاقپارات ءتىلشىسى.

«بۇگىنگى تاڭدا ەلىمىزدەگى بيداي القابىنىڭ 99,5 پايىزى جينالدى. جالپى بيدايدىڭ كولەمى 20 ميلليون تونناعا جەتتى. ءبىزدىڭ بولجامىمىز بويىنشا تازا سالماقتاعى بيداي كولەمى - 18,5 ميلليون توننا بولادى. ەكسپورتتىق الەۋەت - 7-8 ميلليون توننا»، - دەدى ساپارحان وماروۆ و ك ق- دا وتكەن باسپا ءسوز ءماسليحاتىندا.

بۇل رەتتە ەكسپورتقا قانداي دا ءبىر كەدەرگى كەلتىرىلۋى مۇمكىن بە؟ بۇل سۇراققا جاۋاپ بەرگەن مينيستر ءقازىر بيداي وتكىزۋگە بولاتىنداي جايلى جاعداي قالىپتاسىپ تۇرعانىن جەتكىزدى.

«قازاقستاندا دا، رەسەيدە دە بيداي جاقسى شىقتى. ءبىز الداعى ۋاقىتتا بيداي ەكسپورتىنا ەشقانداي شەكتەۋ ەنگىزگەلى وتىرعان جوقپىز. سونىمەن قاتار مەن ءوزىمىزدىڭ ەلدەگى تاۋار وندىرۋشىلەر مەن ترەيدەرلەردەن وتىنسەم دەيمىن: ىشكى نارىقتاعى باعانى قالىپتاستىرۋ ماسەلەسىنە بايىپپەن كەلگەن ابزال. سەبەبى ىشكى نارىقتاعى باعانىڭ ءوسىپ كەتۋى، بىرىنشىدەن نارىققا جاعىمسىز اسەر ەتەدى. ەكىنشىدەن وسىنىڭ سالدارىنان ۇننىڭ باعاسى قىمباتتاۋى مۇمكىن. بۇل جاعداي ودان بولەك الەمدىك نارىقتا ءبىزدىڭ بيدايىمىزدىڭ باسەكەگە قابىلەتتىلىگىن تومەندەتۋى مۇمكىن»، - دەدى ول.