جىل باسىنان بەرى جەڭىل ونەركاسىپ ءوندىرىسىنىڭ كولەمى 8 پايىزعا ارتتى
بۇل جونىندە يندۋستريا جانە ينفراقۇرىلىمدىق دامۋ مينيسترلىگى مالىمەت تاراتتى.
2020-جىلدىڭ ءبىرىنشى جارتىجىلدىعىنىڭ قورىتىندىسى بويىنشا جەڭىل ونەركاسىپ سالاسىنداعى ءوندىرىس كولەمى 8 پايىز ءوستى. توقىما بۇيىمدارىنىڭ وندىرىسىندە - 8,4 پايىز، بىلعارى ونىمدەرى - 6,6 پايىز جانە كيىم وندىرىسىندە - 2,1 پايىز ءوسىم بايقالادى.
سالاداعى وڭ ناتيجە ماقتا تالشىعى، دايىن توقىما بۇيىمدارى، سىرتقى كيىم، باس كيىم، شۇلىق بۇيىمدارى مەن اياق كيىم ءوندىرىسىنىڭ ۇلعايۋى ەسەبىنەن بولعان.
«جالپى العاندا، كوبىنە وتاندىق وندىرۋشىلەر قورعانىس سالاسى مەن ارنايى كيىمدەر تاپسىرىسىن ورىنداۋدا. وسىلايشا ءوندىرىس وشاعىندا شىعارىلاتىن ءونىم سۇرانىسقا يە بولىپ، كەپىلدى ساتىلىمدى قامتاماسىز ەتەدى. سونىمەن قاتار، بيىل تۇرعىنداردى ماسكامەن قامتاماسىز ەتۋ ماقساتىندا وندىرىسكە 70 تەن استام تىگىن كاسىپورىندارى قوسىلدى. ولار تاۋلىگىنە داكە مەن بوزدەن 700 مىڭ بەتپەردە شىعارادى» دەلىنگەن حابارلامادا.
تىگىن كاسىپورىندارىن شيكىزاتپەن قامتاماسىز ەتۋ ماقساتىندا «Azala Textile « ج ش س داكە شىعاراتىن 9 ستانوكتى ىسكە قوستى، شىعارۋ كولەمىن 8 ەسە ارتتىردى. وندىرىستىك تسيكل مەملەكەتارالىق ستاندارتقا سايكەس جولعا قويىلعان. سونداي-اق، كاسىپورىن تىعىزدىعى تومەن تازارتىلعان ماقتا ماتاسىن شىعارادى. سونىمەن قاتار، 2020-2022-جىلدارى قولدانىستاعى جوبالاردى كەڭەيتۋدى ەسكەرە وتىرىپ، 1486 جۇمىس ورنى اشىلاتىن، جالپى قۇنى 27,384 ميلليارد تەڭگە بولاتىن 19 جوبانى ىسكە قوسۋ جوسپارلانعان. جەرگىلىكتى اتقارۋشى ورگاندار ءۇشىن جەڭىل، جيھاز ونەركاسىبى مەن قۇرىلىس ماتەريالدارىن مەملەكەتتىك ساتىپ الۋدا جەرگىلىكتى قامتۋ بويىنشا نىسانالى ينديكاتورلار بەلگىلەنگەن. جەڭىل جانە جيھاز ونەركاسىبىنىڭ تاۋارلارى 2019-جىلدىڭ 1- شىلدەسىنەن باستاپ مەملەكەتتىك ساتىپ الۋ كونكۋرسى وتكىزىلەتىن تاۋارلار، جۇمىستار مەن قىزمەتتەر تىزبەسىنە ەنگىزىلگەن. بۇگىندە جەڭىل ونەركاسىپ سالاسىندا 1130 كاسىپورىن جۇمىس ىستەيدى، ونىڭ 97 پايىز - شاعىن كاسىپورىندار، سالادا جۇمىس ىستەيتىندەردىڭ سانى - 17,9 مىڭ ادام.