كوپبالالى وتباسىلارعا ارنالعان جاردەماقى 8- بالادان باستاپ سارالانادى

None
None
نۇر-سۇلتان. قازاقپارات - 2020-جىلعى 1- قاڭتاردان باستاپ ەنگىزىلگەن كوپبالالى وتباسىلارعا ارنالعان مەملەكەتتىك جاردەماقىلاردى 8- جانە ودان كەيىنگى بالاعا سارالاۋ جوسپارلانىپ وتىر.

بۇل تۋرالى ق ر ەڭبەك جانە حالىقتى الەۋمەتتىك قورعاۋ مينيسترلىگىنىڭ كەڭەيتىلگەن القا وتىرىسىندا ۆەدومستۆو باسشىسى ءبىرجان نۇرىمبەتوۆ ايتتى، دەپ حابارلايدى قازاقپارات ءتىلشىسى.

ءبىرجان نۇرىمبەتوۆتىڭ ايتۋىنشا، 2019-جىلدىڭ قورىتىندىسى بويىنشا 486 مىڭ وتباسىنا نەمەسە 2,4 ميلليونعا جۋىق ادامعا ا ا ك تاعايىندالدى. جالپى العاندا، ا ا ك 244,2 ميلليارد تەڭگە سوماسىندا تولەندى. سونىمەن قاتار مينيستر 2020-جىلدان باستاپ ا ا ك- پەن قامتاماسىز ەتۋدىڭ جاڭا تاسىلدەرى ەنگىزىلگەنىن جانە بۇل تاسىلدەردىڭ اشىق، ءادىل ەكەندىگىن جانە ەڭبەككە ىنتالاندىرۋدى كوزدەيتىنىن باسا ايتتى.

«كوپبالالى وتباسىلارعا تابىستارىنا قاراماستان، بالالار سانىنا قاراي سارالانعان مولشەردە 42500 دەن 74400 تەڭگەگە دەيىن تولەنەتىن جاردەماقى ەنگىزىلدى. بۇل جاردەماقى قازىردىڭ وزىندە شامامەن 370 مىڭ وتباسىنا تولەندى. 2020-جىلعا وسى ماقساتتارعا بيۋجەتتە 177,6 ميلليارد تەڭگە قاراستىرىلعان. قازىرگى ۋاقىتتا بايقاساڭىزدار جەتى بالادان ارى قاراي بىركەلكى مولشەردە. سوندىقتان، ءبىز وسى ماسەلەنى قاراستىرىپ، سەگىزىنشى جانە ودان كەيىنگى بالالارعا دا جاردەماقىنى سارالانعان تۇردە تولەۋ ماسەلەسىن قاراستىرىپ جاتىرمىز. سوندا سەگىز بالاعا 74000 ەمەس، 85000، ون بالاعا – 106000، ون بەس بالاعا - 159 مىڭ تەڭگەدەن تولەنەتىن بولادى»، - دەدى ءبىرجان نۇرىمبەتوۆ.

سونىمەن قاتار ول جاڭا تاسىلدەرگە سايكەس ا ا ك توقسان سايىن تاعايىندالاتىندىعىن اتاپ ءوتتى. ەگەر ەڭبەككە قابىلەتتى الەۋمەتتىك كومەك الۋشىلار جۇمىسقا ورنالاسۋعا جاردەمدەسۋ شارالارىنان باس تارتسا، وندا ا ا ك كورسەتۋ بۇكىل وتباسىنا توقتاتىلاتىن بولادى.

«وسى جىلدىڭ 1- اقپانىنا كومەك 37,4 مىڭنان استام وتباسىنا نەمەسە 187,3 مىڭنان استام ادامعا، ونىڭ ىشىندە 122,9 مىڭ بالاعا تاعايىندالدى. سونىمەن قاتار، تابىسى از وتباسىلاردىڭ بالالارى ءۇشىن كەپىلدەندىرىلگەن الەۋمەتتىك توپتاما ەنگىزىلدى جانە بەرىلە باستادى. اكىمنىڭ الەۋمەتتىك ماسەلەلەر جونىندەگى ورىنباسارلارى كەپىلدەندىرىلگەن الەۋمەتتىك توپتامالاردىڭ ۋاقىتىلى بەرىلۋىن قامتاماسىز ەتۋى كەرەك. تابىسى از وتباسىنداعى ءاربىر بالاعا مەملەكەتتىك كومەك كورسەتىلۋى ءتيىس»، - دەدى مينيستر.

سوڭعى جاڭالىقتار