قازاقستانداعى تاڭبالى شاتقالى «شاڭحاي ىنتىماقتاستىق ۇيىمىنىڭ 8 كەرەمەتى» تۋريستىك جوباسىنا كىردى

شيان. قازاقپارات -  كەشە ق ح ر شيان قالاسىندا وتكەن ەۋرازيا ەكونوميكالىق فورۋمىندا «ش ى ۇ 8 كەرەمەتى» تۋريستىك جوباسى تانىستىرىلدى.

تاڭداۋلى سەگىزدىڭ ءبىرى -  قازاقستانداعى تاڭبالى تاس بەينەلەرى، دەپ حابارلايدى «قازاقپارات» ح ا ا ءتىلشىسى.

«ش ى ۇ 8 كەرەمەتى» جوباسى ش ى ۇ-عا مۇشە ەلدەردىڭ سەگىز ساۋلەت جانە تاريحي ەسكەرتكىشىن قامتيدى. سولاردىڭ ءبىرى - تاسقا قاشاپ سالىنعان 4 مىڭداي تاڭباسى بار تاڭبالى شاتقالى. شاتقال يۋنەسكو قورعاۋىندا. تاڭداۋلى سەگىزدىڭ قاتارىندا ءۇندىستانداعى 182 مەترلىك ۆالابحاي پاتەل ءمۇسىنى، قىرعىزستانداعى ىستىقكول، تاجىكستانداعى ناۆرۋز سارايى، وزبەكستانداعى «پوي كالون» ارحيتەكتۋرالىق انسامبلى، رەسەيدەگى «التىن ساقينا» باعدارى بار. قىتاي دامين سارايىن، پاكىستان موعولداردان قالعان لاحور قالاسىن ۇسىندى. «ش ى ۇ تۋريزم نارىعى ءوسىپ كەلەدى. جوبا ءبىرىڭعاي تۋريستىك باعداردى قالىپتاستىرۋعا باعىتتالعان»، - دەيدى ش ى ۇ باس حاتشىسى ۆلاديمير نوروۆ.

ونىڭ ايتۋىنشا، جالپى الەمدە تۋريزمنەن كەلەتىن تابىس كوبەيە تۇسۋدە. بىلتىر الەمدىك تۋريزم نارىعى 5 پايىزعا ءوسىپ، جالپى تابىس 5 تريلليون دوللاردى قۇراعان. ەكونوميكالىق فورۋمنىڭ ۇيىمداستىرۋ كوميتەتىنىڭ باس حاتشىسىنىڭ ورىنباسارى ۆان كانۆەيدىڭ پىكىىرىنشە، ش ى ۇ ەلدەرىنىڭ تاريحي- مادەني مۇرالارىنىڭ الەۋەتى تولىق پايدالانىلىپ وتىرعان جوق.

«قىتايلىقتار اراسىندا شەتەلگە ساياحاتتاۋ كورسەتكىشى كۇرت ارتىپ وتىر. جىل سايىن 150 ميلليون ادام شەتەل اسادى. سولاردىڭ 2 ميلليونعا جۋىعى رەسەيگە بارادى، ال ورتالىق ازيا ەلدەرىنە باراتىندار تىم از»، - دەدى ول.

اۆتور: سامال ەندىبايەۆا