17:12, 07 - تامىز 2019 | GMT +6
قۇرمانعازى اتىنداعى كونسەرۆاتوريانىڭ ەسەپشىسى 8 جىلعا سوتتالدى
الماتى. قازاقپارات - الماتىدا المالى اۋداندىق سوتىندا قۇرمانعازى اتىنداعى قازاق ۇلتتىق كونسەرۆاتورياسىنىڭ بۇرىنعى ەسەپشىسى عاليا جۇماعۇلوۆانىڭ سوتى اياقتالدى، دەپ حابارلايدى قازاقپارات ءتىلشىسى.
المالى اۋداندىق سوتىنىڭ باسپا ءسوز قىزمەتى حابارلاعانداي، عاليا جۇماعۇلوۆاعا 128 ميلليون تەڭگەنى جىمقىردى دەگەن ايىپ تاعىلعان بولاتىن.
«سۋديا عاليا جۇماعۇلوۆانى ايىپتى دەپ تاۋىپ، 8 جىلعا باس بوستاندىعىنان ايىرۋ تۋرالى ۇكىم شىعاردى. سونىمەن قاتار، وعان ماتەريالدىق جاۋاپكەرشىلىگى بار لاۋازىمدارعا ورنالاسۋعا 10 جىلعا تىيىم سالىندى. سوتتالۋشىنىڭ كامەلەتتىك جاسقا تولماعان بالاسى بارىنا بايلانىستى جازاسىن وتەۋ مەرزىمى 5 جىلعا كەيىنگە شەگەرىلدى»، - دەدى المالى اۋداندىق سوتىنىڭ باسپا ءسوز قىزمەتىنەن.
ءىس ماتەريالدارىنا سايكەس، ع. جۇماعۇلوۆا قۇرمانعازى اتىنداعى قازاق ۇلتتىق كونسەرۆاتورياسىنا 127994593 تەڭگە كولەمىندە ماتەريالدىق شىعىن كەلتىرگەن.
اۆتور: گۇلميرا عوسمانالي