قازاقستاندىق 8 جاسار ءبۇلدىرشىن شاڭحاي كينوفەستيۆالىنىڭ سىيلىعىنا يە بولدى

بەيجىڭ-شاڭحاي. قازاقپارات - 8 جاسار قازاقستاندىق اكتريسا ديلناز نۇرسەيىت 22-شاڭحاي كينوفەستيۆالىندە «ۇزدىك جاڭا ەسىم» اتالىمىندا CCTV-6 تەلەارناسىنىڭ سىيلىعىنا يە بولدى، دەپ حابارلايدى قازاقپاراتتىڭ قىتايداعى مەنشىكتى ءتىلشىسى.

جەتكىنشەك قازاقستان مەن قىتاي بىرلەسىپ تۇسىرگەن «كومپوزيتور» فيلمىندە باقىتجان بايقاداموۆتىڭ جيەنىنىڭ ءرولىن سومداعان بولاتىن. سونداي-اق، «كومپوزيتور» فيلمىنىڭ پروديۋسەرلىك توبى دا ۇيىمداستىرۋ كوميتەتىنىڭ قۇرمەتتى سىيلىعىن الدى.

ەسكە سالا كەتەيىك، قازاقستان مەن قىتاي رەجيسسەرلەرى بىرگە تۇسىرگەن «كومپوزيتور» كوركەم فيلمى مامىر ايىندا پروكاتقا شىققان بولاتىن. كوركەم لەنتا قىتايلىق كومپوزيتور سيان سينحايدىڭ سوۆەت وداعىنا، ونىڭ ىشىندە الماتىعا ەۆاكۋاتسيالانعان كەزى مەن تانىمال قازاق كومپوزيتورى باقىتجان بايقاداموۆپەن دوستىعى تۋرالى باياندايدى.

فيلمدى ش. ايمانوۆ اتىنداعى «قازاق فيلم» كينوستۋدياسى جانە قىتايلىق «Shineworks Pictures» ، «China film coproduction corporation» كومپانيالارى بىرگە تۇسىرگەن. سيان سينحايدىڭ قازاق جەرىندە جازعان تانىمال شىعارمالارىنىڭ ءبىرى - «تۇركى ءانى» (1942 -جىلدىڭ جەلتوقسانىندا جازىلعان). گۋانجوۋداعى كونسەرۆاتوريا مەن كونسەرت زالى جانە الماتىداعى ءبىر كوشە سيان سينحايدىڭ ەسىمىن يەلەنگەن.

2005-جىلى 100 جىلدىق مەرەيتويىنا وراي ماكاودا كومپوزيتورعا ءۇش مەترلىك ەسكەرتكىش ورناتىلدى. ال سازگەردىڭ الماتىداعى ەسكەرتكىشى 1999-جىلى تۇرعىزىلعان. ونىڭ اشىلۋ سالتاناتىنا ق ح ر سول كەزدەگى ءتوراعاسى جياڭ زىمين مەن ق ر تۇڭعىش پرەزيدەنتى نۇرسۇلتان نازاربايەۆ قاتىسقان بولاتىن.

ەسكە سالا كەتسەك، ەلباسى نۇرسۇلتان نازاربايەۆ قىتايعا بارعان كەزىندە «Shinework Pictures»  كينوكومپانياسىنىڭ باسشىسى دجوناتان شەن ق ر تۇڭعىش پرەزيدەنتىنە «كومپوزيتور» فيلمى جازىلعان ديسكىنى سىيعا تارتقان.