ديماش قۇدايبەرگەن 8- ناۋرىزعا سىي دايىنداپ جاتىر

استانا. قازاقپارات - تانىمال ءانشى ديماش قۇدايبەرگەن ينستاگرامداعى پاراقشاسىندا «اققۋىم» انىنە جازىلعان كليپىنىڭ تيزەرىمەن تانىستىردى، دەپ حابارلايدى قازاقپارات ءتىلشىسى.

«8- ناۋرىزعا مەنەن كىشىگىرىم توسىن سىي. جۋىردا...»، - دەپ جازعان ءانشى كليپىنىڭ ءۇزىندىسىن قوسا جاريالادى.

ايتا كەتسەك، بۇعان دەيىن ءانشىنىڭ فان-كلۋبتارى ديماشتىڭ «اققۋىم» انىنە كليپ ۋكراينادا ءتۇسىرىلىپ جاتقانىن حابارلاعان بولاتىن.

ەسكە سالا كەتسەك، وسىدان بىرنەشە كۇن بۇرىن اتالمىش ءاننىڭ ءسوزىن ورال-قوساي بايسەڭگىر، ءانىن ايمۇرات ماجىكبايەۆ جازعانىن حابارلاعان بولاتىنبىز.

«اقتوبەدەگى مادەني اعارتۋ ۋچيليشەسىندە وقىدىم. اۋىلدان كەلگەن بوزبالامىن، ءان دە سول كەزدە جازىلدى. العاشىندا ءسوزىن دە ءوزىم جازىپ كورگەنمىن، ءبىراق ءساتسىز شىققان سوڭ ورال دوسىما باردىم. قازىر ايتىلىپ جۇرگەن ءاننىڭ ءسوزىن جازىپ بەرگەن ورال. 2000-جىلى «قوش، ماحاببات» پەساسى ساحنالاندى. ءان سول كەزدە ورىندالىپ، جاستار اراسىنا تەز تاراپ كەتتى. بۇرىن «راۋان» راديوسىندا ءجيى بەرىلىپ كەلدى. ال ديماش قۇدايبەرگەن مايرا مۇحامەد قىزى دۋەتپەن ورىندادى»، - دەيدى ءاننىڭ اۆتورى ايمۇرات ماجىكبايەۆ.