سەمەيدە ءسوزدى كەرىسىنشە ايتاتىن 8 جاسار قىز بالا تۇرادى
8 جاسار ادەليا ابىلقاسىموۆا كەز كەلگەن ءسوزدى، سويلەمدى سول ساتتە كەرىسىنشە ايتىپ بەرە الاتىن قابىلەتكە يە، دەپ حابارلايدى قازاقپارات.
ادەليا سەمەيدەگى №28 -مەكتەپتىڭ وقۋشىسى. 3-سىنىپقا اياق باساتىن ونىڭ بويىنداعى ەرەكشە قابىلەت كوپشىلىكتى تاڭعالدىرادى. سەبەبى، ول كەز كەلگەن ءسوزدى، ءبۇتىن ءبىر سويلەمدى مۇدىرمەستەن سول مەزەتتە كەرى ايتىپ بەرە الادى. باستاپقىدا وقۋشىنىڭ بويىنداعى ەرەكشە قابىلەتكە ۇستازدارى مەن سىنىپتاستارى، دوستارى كۇدىكپەن قاراعان. كەيىن ءتۇرلى سوزدەر مەن سويلەمدەردى ايتىپ سىناعاننان كەيىن كوزدەرى جەتكەن ەكەن.
بۇل قاسيەت ونىڭ بويىندا بالا كەزىنەن بار. اناسى التىنايدىڭ سوزىنشە، قىزىنىڭ بويىنداعى ايرىقشا دارىندى بىلسە دە، ەش ارەكەت جاساماعان. ءبىراق سوڭعى ءبىر جىلدا جەتىلدىرۋ ماقساتىندا كۇندەلىكتى ءتۇرلى جاتتىعۋلار جاساۋدى قولعا الىپتى.
«كەز كەلگەن ادام سوزدەردى كەرىسىنشە بىردەن ايتىپ بەرە المايدى. باستاپقىدا ءبىزدىڭ ايتقان سوزدەردى، كەيىن قىسقا سويلەمدەرىمىزدى كەرىسىنشە ايتىپ ءجۇردى. ءبىراق بۇل ارەكەتىن ويىنعا ساناپ، اسا ءمان بەرمەدىك. كەيىننەن ءسوزىمىزدى كەرىسىنشە دۇرىس ايتاتىنىن بايقادىق. قازىر كۇندەلىكتى وڭاي ءسوز، سويلەمنەن باستاپ كۇردەلى سويلەمدەرگە دەيىن ايتىپ، جەتىلدىرۋ ماقساتىندا ءتۇرلى جاتتىعۋلار جاسايمىز»، - دەيدى اناسى.
ادەليا بوس ۋاقىتىندا سۋرەت سالعاندى، قىزىقتى كىتاپ وقىعاندى ۇناتادى. ءوزىنىڭ بويىنداعى ەرەكشە قاسيەتتى جەتىلدىرىپ، بويجەتكەندە قازاقستانداعى گيننەسستىڭ رەكوردتار كىتابىنا ەنگىسى كەلەتىن ارمانى بارىن جەتكىزدى. ال «بولاشاقتا كىم بولعىڭ كەلەدى؟» دەگەن سۇراعىمىزعا ول: «ادام اناتومياسىن زەرتتەيتىن عالىم بولعىم كەلەدى»، - دەپ جاۋاپ بەردى.
«ماعان بارلىق پاندەر ۇنايدى. ءبىرىنشى سىناپتان باستاپ ۇزدىك وقۋشىمىن. ال وسكەندە ادام اناتومياسىن زەرتتەيتىن عالىم بولعىم كەلەدى. وسى سالا ماعان وتە قىزىقتى. جانە اناممەن، اپايىممەن كۇندەلىكتى جاتتىعۋ جاسايمىز. ولار ماعان سوزدەر، سويلەمدەر ايتادى. مەن كەرىسىنشە ايتىپ بەرەمىن. كەي كەزدە ۇزاق كۇردەلى سويلەمدەردى كوز الدىما ەلەستەتىپ الىپ ايتامىن. سوندىقتان قازىر مۇدىرمەستەن ايتۋعا ۇيرەنىپ ءجۇرمىن»، - دەيدى ادەليا.
كىشكەنتايىنان العىر قىز تەرىسىنەن وقۋ ەش قيىندىق تۋدىرمايتىنىن ايتادى. ءقازىر ءتىپتى كوپشىلىگى قىزىعۋشىلىق تانىتىپ، سوزدەرىن كەرىسىنشە ايتىپ بەرۋدى ۇسىناتىن كورىنەدى. ەشكىمنىڭ ءسوزىن تاستامايتىن قىز تەرىسىنەن وقۋدان ءوزىنىڭ دە كوڭىلى كوتەرىلىپ قالاتىن ايتادى.