قازاقستان مەن قىتايدىڭ بىرلەسكەن 8 جوباسى بيىل قاي وبلىستاردا ىسكە اسىرىلادى

استانا. قازاقپارات - قازاقستان مەن قىتاي ىنتىماقتاستىعىنىڭ 51 جوباسى بويىنشا وسى ۋاقىتقا دەيىن 4 جوبا ىسكە اسىرىلعان.

ال بيىل وڭتۇستىك قازاقستان، قوستاناي، شىعىس قازاقستان، قىزىلوردا وبلىستارى مەن الماتى قالاسىندا تاعى 8 جوبا اياقتالادى. قازاقپارات ءتىلشىسىنىڭ جولداعان رەسمي ساۋالىنا ق ر ينۆەستيسيالار جانە دامۋ ۆيتسە-ءمينيسترى ارىستان قابىكەنوۆ وسىلاي جاۋاپ بەردى.

«قىتاي حالىق رەسپۋبليكاسى الەمدىك دەڭگەيدەگى ەڭ ماڭىزدى جانە ءىرى ينۆەستورلاردىڭ ءبىرى بولىپ تابىلادى. قازىرگى كەزدە قازاقستان- قىتاي ىنتىماقتاستىعى جوعارى دەڭگەيدەگى بايلانىستاردىڭ شاپشاڭ ديناميكاسىمەن جانە ساۋدا- ەكونوميكالىق ىنتىماقتاستىقتىڭ كەڭ اۋقىمىمەن سيپاتتالادى.

قىتاي حالىق رەسپۋبليكاسىنىڭ باسشىسى باستاماشى بولعان «جىبەك جولى ەكونوميكالىق بەلدەۋى» باعدارلاماسى ەكىجاقتى ىنتىماقتاستىققا جاڭا سەرپىن بەردى. بۇل باعىتتا 2015 -جىلدان باستاپ قازاقستان مەن قىتاي يندۋستريالاندىرۋ جانە ينۆەستيتسيالار سالاسىندا بىرلەسكەن باعدارلامانى جۇزەگە اسىرۋدا، ونىڭ اياسىندا جالپى سوماسى 27 ميلليارد ا ق ش دوللاردان اساتىن 51 جوبا جۇزەگە اسىرىلادى»، - دەلىنگەن جاۋاپتا.

ۆەدومستۆونىڭ حابارلاۋىنشا، بۇل جوبالار مەتاللۋرگيا، مۇناي جانە گاز وڭدەۋ، حيميا جانە مۇناي- حيميا ونەركاسىبى، كولىك جاساۋ، ەلەكتر ەنەرگەتيكاسى، جەڭىل جانە قۇرىلىس ونەركاسىبى، اۋىل شارۋاشىلىعى ونىمدەرىن قايتا وڭدەۋ، كولىك جانە لوگيستيكا سالالارىندا ىسكە اسىرىلۋدا.

«جوبالاردى جۇزەگە اسىرۋ 14 وبلىستى، سونداي-اق الماتى مەن استانا قالالارىن قامتيدى. ەڭ كوپ جوبا سانى الماتى (11)، قاراعاندى (5) جانە وڭتۇستىك قازاقستان (5) وبلىستارىندا جۇزەگە اسىرىلىپ جاتىر. 2015-2017 -جىلدار كەزەڭىندە يندۋستريالاندىرۋ جانە ينۆەستيتسيا سالاسىنداعى قازاقستان- قىتاي ىنتىماقتاستىعىنىڭ 51 جوباسى بويىنشا 4 جوبا ىسكە اسىرىلدى»، - دەپ جاۋاپ بەردى ۆيتسە- مينيستر ارىستان كابيكەنوۆ.

ىسكە اسىرىلعان ءتورت جوبانىڭ ىشىندە پاۆلودار وبلىسىندا ۇنتاق پوليپروپيلەن ءوندىرىسى، سولتۇستىك قازاقستان وبلىسىندا راپس مايىن ءوندىرۋ، قوستاناي وبلىسىندا JAC اۆتوموبيلدەرى شىعارۋ بويىنشا جوبالار جۇزەگە اسىرىلعان. سونداي-اق، 2017 -جىلى قازاقستاننىڭ ترانزيتتىك الەۋەتىن دامىتۋ ءۇشىن الەمدەگى ەڭ ءىرى «COSCO Shipping» لوگيستيكالىق كومپانياسى «قورعاس شىعىس قاقپاسى» ارناۋلى ەكونوميكالىق ايماقتارداعى «قۇرعاق پورتىنىڭ» 49 پايىزىن ساتىپ العان.

«وسى جىلى وڭتۇستىك قازاقستان، قوستاناي، شىعىس قازاقستان، قىزىلوردا وبلىستارى مەن الماتى قالاسىندا 8 جوبانىڭ ىسكە قوسىلۋىمەن شامامەن 1400 جاڭا جۇمىس ورىندارى قۇرىلادى. اتالعان ءوندىرىس ورىندارى ءمورقالىپتىق تالشىقتار، كەپتىرىلگەن تۇيە جانە بيە ءسۇتى، مەتالل بۇيىمدارى، قۇبىر ونىمدەرى جانە تاعى باسقا ونىمدەردى شىعاراتىن بولادى»، - دەيدى ارىستان كابيكەنوۆ.

ق ر ي د م كوپتەگەن جوبالاردى جەكەمەنشىك كومپانيالار جۇزەگە اسىراتىندىقتان جانە قارجىلاندىرۋ قۇرىلىمىن، سونداي-اق جوبالار تەحنيكالىق جانە تەحنولوگيالىق جابدىقتاردى قالىپتاستىرۋ ساتىسىندا تۇرعاندىعىنا بايلانىستى ەگجەي-تەگجەيلى اقپارات بەرۋ ءۇشىن جوبانىڭ باستاماشىلارىمەن الدىن-الا ۇيلەستىرۋ قاجەتتىلىگى تۋرالى حاباردار ەتەدى.

ال «قازاقستاندا قازىرگى ۋاقىتتا قانشا قىتايلىق كومپانيا قانداي سالالاردا جۇمىس ىستەپ جاتىر؟» دەگەن سۇراققا كەلەسىدەي جاۋاپ بەرىلگەن.

«قازاقستان رەسپۋبليكاسى ۇلتتىق ەكونوميكا مينيسترلىگى ستاتيستيكا كوميتەتىنىڭ دەرەكتەرىنە سايكەس، 2018 -جىلعى 1 -مامىرداعى جاعداي بويىنشا قازاقستاندا قىتاي حالىق رەسپۋبليكاسىنىڭ 3084 زاڭدى تۇلعا، فيليال مەن وكىلدىك تىركەلگەن، ولاردىڭ 1231 ى جۇمىس ىستەۋدە»، - دەيدى ۆيتسە- مينيستر ارىستان كابيكەنوۆ.

 

اۆتور: ايان بەكەن ۇلى