قىتايدان ەۆاكۋاتسيالانعان 89 ستۋدەنت نۇر-سۇلتانداعى اۋرۋحانادان شىعارىلدى
«2020 -جىلى 2-اقپاندا ۋحان قالاسىنان ستۋدەنتتەر جەتكىزىلدى. ونىڭ ىشىندە بەلارۋستىڭ – 5، ارمەنيانىڭ 1 ازاماتى بار. ولار 14 كۇندىك كارانتيندە بولدى. بۇل ۋاقىت ارالىعىندا ءبىرقاتار زەرتتەۋ جۇرگىزدىك، سونىڭ ىشىندە كوروناۆيرۋس بار- جوعىن انىقتادىق. ولاردىڭ ەشبىرىندە كوروناۆيرۋس ينفەكتسياسى انىقتالعان جوق. بۇگىن ولار ۇيلەرىنە جىبەرىلدى»، - دەدى نۇر-سۇلتان قالاسى قوعامدىق دەنساۋلىق ساقتاۋ باسقارماسىنىڭ شتاتتان تىس باس ينفەكسيونيسى ساۋلە اتىعايەۆا.
كوپسالالى مەديتسينالىق ورتالىقتىڭ ديرەكتورى مۇحتار تولەۋتايەۆ 89 ستۋدەنتتىڭ كيىمدەرى اۋىستىرىلىپ، قازاقستاندىق ۇيالى بايلانىس وپەراتورلارىنىڭ نومەرلەرىمەن قامتاماسىز ەتىلگەنىن ايتتى.
«ولار كوروناۆيرۋس ينفەكتسياسى تارالعان جاقتان كەلگەندىكتەن، بارىنە تۇسىنىستىكپەن قارادى. 1-2، 3-4 ورىندىق جەكە بولمەلەرگە ورنالاستىرىلدى. ورتالىقتا بەلارۋس، ارمەنيا مەملەكەتتەرى مەن قازاقستاننىڭ ءارتۇرلى وڭىرلەرىنىڭ تۋمالارى جاتتى، بارلىعىن قوسقاندا - 89 ادام. بۇل عيماراتتىڭ ەرەكشەلىگى - بولمەلەر تولىق يزولياتور رەتىندە جاسالعان. ياعني ءبىر- بىرىمەن اۋا الماسپايدى. ستۋدەنتتەرگە بەس ۋاقىت تاماق بەرىلدى، كيىمدەرىن اۋىستىرىپ، قازاقستاندىق SIM- كارتالارمەن قامتاماسىز ەتىلدى»، - دەدى مۇحتار تولەۋتايەۆ.
الماتىلىق اجار ناقىپبەك قىتايدا 2018 -جىلدان بەرى ءتىل ۇيرەنۋ كۋرسىندا ءبىلىم الۋدا.
«قىتايدى 2018 -جىلدان بەرى ءتىل كۋرسىندا وقىپ كەلەمىن. نەگىزى قىزدار پەداگوگيكالىق ۋنيۆەرسيتەتىنىڭ ستۋدەنتىمىن. قىتايدا ستۋدەنت الماسۋ باعدارلاماسى بويىنشا وقىعانمىن. بۇل جەردە دارىگەرلەردىڭ بىزگە دەگەن قارىم- قاتىناسى جاقسى بولدى»، - دەيدى ول.
سونداي-اق، بەلارۋس رەسپۋبليكاسىنىڭ ازاماتى قازاقستاندىقتارعا العىس ايتتى.
«مەن ۋحانداعى كومپانيالاردىڭ بىرىندە جۇمىس ىستەگەن ەدىم. ۋحاننان نۇر-سۇلتان قالاسىنا 2 -اقپان كۇنى كەلدىك. قازاق حالقىنا بەلارۋس ازاماتتارىنا قاجەت كەزدە پانا بولىپ، كومەك كورسەتكەندەرى ءۇشىن العىس ايتامىن. دارىگەرلەرگە، مەدبيكەلەرگە راحمەت. بىزگە وتە جاقسى قاراپ، بەس ۋاقىت تاماقتاندىردى. ءوزىمىزدى شيپاجايدا جاتقانداي سەزىندىك. قىتايداعى ماسەلە شەشىمىن تاۋىپ، جاعداي تۇراقتالىپ جاتسا - جۇمىسقا قايتىپ بارامىن»، - دەيدى ۆاديم پەنتال.