قازاقستاندا جۇرگەن رەسەيلىك ءنومىرلى 88 مىڭ كولىكتىڭ تىركەۋدەن شىعارىلعانى انىقتالدى
بۇل تۋرالى ق ر ءى ءى م اكىمشىلىك پوليتسيا كوميتەتى ءتوراعاسىنىڭ ورىنباسارى سەرىك ءتۇسىپوۆ ايتتى، دەپ حابارلايدى قازاقپارات ءتىلشىسى.
«وسى جىلدىڭ تامىزىنان باستاپ مەملەكەتتىك كىرىستەر كوميتەتىمەن، ۇلتتىق قاۋىپسىزدىك كوميتەتىمەن بىرلەسىپ، كورشىلەس ەلدەردەن قازاقستان رەسپۋبليكاسىنىڭ اۋماعىنا كىرەتىن كولىكتەردىڭ بارلىعىن تەكسەرە باستادىق. بىزگە قىلمىستىق كولىكتەردىڭ، ەسەپتەن شىعارىلعان كولىكتەردىڭ اكەلۋىنە قاتىستى كوپتەگەن فاكتى انىقتالدى. اتاپ ايتقاندا، رەسەي فەدەراتسياسىنان اكەلىنگەن كولىكتەردى تەكسەردىك. ۇلتتىق قاۋىپسىزدىك كوميتەتىمەن بىرگە اۆتوكولىكتەردى جالعان قۇجاتپەن اكەلۋگە قاتىستى شامامەن 10 فاكتىنى انىقتادىق. رەسەي فەدەراتسياسىندا ەسەپتەن شىعارىلعان رەتىندە كورسەتىلگەن شامامەن 150 كولىكتىڭ اكەلىنگەنىنە قاتىستى فاكتى دە بار. وسىعان وراي ىشكى ىستەر مينيسترلىگى شەتەلدە تىركەلگەنىمەن قازاقستان اۋماعىندا جۇرگەن بارلىق كولىك قۇرالدارىنا قاتىستى ساقتاندىرۋ كومپانيالارىنا سۇرانىس جىبەردى.
بۇل مالىمەتتەر قارسى تەكسەرۋ جۇرگىزۋ ءۇشىن ر ف ىشكى ىستەر مينيسترلىگىنە دە جونەلتىلدى. جاۋاپتاردىڭ ناتيجەسىندە قازاقستان اۋماعىندا جۇرگەن رەسەيلىك تىركەۋدەگى 88 مىڭ كولىكتىڭ ر ف ىشكى ىستەر مينيسترلىگىندە تىركەۋ ەسەبىندە تۇرماعانى انىقتالدى. ياعني، تىركەلمەگەن نەمەسە قازاقستان ازاماتتارىنا ساتىلعان جانە سودان كەيىن ولاردىڭ يەسى - رەسەي ازاماتى تۇرعىلىقتى جەرى بويىنشا تىركەۋ ەسەبىنەن شىعارىپ تاستاعان»، - دەدى ول.
ونىڭ اتاپ وتۋىنشە، «جول ءجۇرىسى تۋرالى» ق ر زاڭىنا سايكەس، جول قوزعالىسىنا بەكىتىلگەن تارتىپپەن تىركەلگەن كولىك قۇرالدارى عانا جىبەرىلەدى. وسىعان وراي قازىرگى ۋاقىتتا ىشكى ىستەر مينيسترلىگى اتالعان ساناتتاعى كولىكتەردىڭ جۇرگىزۋشىلەرىمەن جۇمىس ىستەپ جاتىر.
«قازاقستان اۋماعىندا جۇرگەن وزگە كولىكتەرگە، اتاپ ايتقاندا شەتەلدىك تىركەۋى بار اۆتوموبيلدەرگە قاتىستى ايتار بولساق، قۇقىق بەلگىلەيتىن، كولىك قۇرالىنىڭ تىركەلگەندىگىن راستايتىن قۇجاتى بولعان كەزدە ولار جول ءجۇرىسى ەرەجەسىن بۇزباي جانە قازاقستان اۋماعىندا بولۋ ەرەجەسىن ساقتاي وتىرىپ جۇرە بەرەدى. بۇعان قوسا، ر ف ىشكى ىستەر مينيسترلىگى ءوز اۋماعىندا ىزدەۋدە تۇرعان، قازاقستان اۋماعىنا رەسەيدەن اكەلىنگەن 606 اۆتوموبيلگە قاتىستى اقپارات ۇسىندى. ولار قانداي دا ءبىر قىلمىسقا قاتىسى بار نەمەسە قىلمىستىڭ نىسانى سانالاتىن كولىكتەر. وسىعان وراي ولاردىڭ قايدا جۇرگەنىن انىقتاۋ جۇمىسى جۇرگىزىلىپ جاتىر. قازىردىڭ وزىندە 200-دەن استام كولىك تابىلدى. ولاردىڭ تۇرعان جەرى جانە قازىرگى يەسى تۋرالى اقپارات پرتسەسسۋالدىق ءىس- ارەكەت جۇرگىزۋ ءۇشىن ىزدەۋگە باستاما جاساعان تاراپقا بەرىلدى. اۆتومبيلدەر تۇراققا قويىلدى»، - دەدى سەرىك ءتۇسىپوۆ.
اۆتور: مارلان جيەمباي