باتىس قازاقستاندا 88 ەلدى مەكەندى سۋ باسۋى مۇمكىن

ورال. قازاقپارات - باتىس قازاقستان وبلىسىندا الداعى كوكتەمدە سۋ باسۋ قاۋپى جوعارى، دەپ حابارلايدى قازاقپارات ءتىلشىسى.

وبلىستىق ت ج دەپارتامەنتىنىڭ باستىعى جاسۇلان جۇماشەۆتىڭ ايتۋىنشا، بيىل قاردىڭ ادەتتەگىدەن بىرنەشە ەسە كوپ جاۋۋىنا بايلانىستى جاعداي، اسىرەسە، ورال قالاسى، سونداي-اق تاسقالا، بايتەرەك، قازتالوۆ اۋداندارىندا كۇردەلى.

وبلىستىق توتەنشە جاعدايلار جونىندەگى كوميسسيا وتىرىسىندا وڭىردەگى 36 مىڭنان استام تۇرعىن مەكەندەيتىن 88 ەلدى مەكەندى سۋ باسۋ قاۋپى بار ەكەنى بەلگىلى بولدى. قاردىڭ بيىكتىگى وتكەن جىلدارمەن سالىستىرعاندا، 1,5-3 ەسەگە دەيىن ارتىق.

ورال قالاسىندا ايرىقشا نازار اۋدارۋدى قاجەت ەتەتىن اۋماقتىڭ ءبىرى - ساياجايلار ەكەندىگى بەلگىلى. وتكەن جىلى ساياجايلاردى 13 مىڭ ادام تۇراقتى مەكەندەسە، بيىل 14 مىڭنان استى، ولاردىڭ 5 مىڭى - بالالار. سۋ باسۋ قاۋپى تونگەن جاعدايدا ولاردى كوشىرۋ قاجەتتىگى تۋىندايدى.

«قازگيدرومەت» ر م ك ب ق و فيليالىنىڭ ديرەكتورى نۇرجان شياپتىڭ سوزىنە قاراعاندا، قاردىڭ بيىكتىگى جانىبەك اۋدانىندا 33، تاسقالادا 56، ال ورال قالاسىندا 60 سانتيمەترگە جەتكەن. وعان قوسا قارداعى ىلعال قورى دا جوعارى بولىپ وتىر. مىسالى، ورالدا 125 م م (قالىپتى مولشەرى 59 م م)، تاسقالادا 134 م م (قالىپتىسى 78 م م)، بايتەرەك اۋدانىنىڭ يانۆارتسيەۆ اۋىلى مەن جانىبەك اۋدانىندا 86 م م- گە جەتكەن. ال توڭنىڭ تەرەڭدىگى كەرىسىنشە جىلداعىدان بىرنەشە ەسە كەم. كۇزگى ىلعال جەتكىلىكسىز بولعاندىقتان، جالپى ىلعال قورىنىڭ 20-30 پايىزى توپىراققا ءسىڭۋى مۇمكىن. دەگەنمەن الداعى ايلاردا دا جاۋىن-شاشىن تۇسەتىندىگىن ەسكەرۋ كەرەك. وبلىس وزەندەرى ناۋرىزدىڭ ءۇشىنشى ونكۇندىگى مەن ءساۋىردىڭ ءۇشىنشى ون كۇندىگى ارالىعىندا تاسىپ، «مىنەز كورسەتۋى» ىقتيمال. وزەندەردەگى ىلعال قورىنىڭ مولشەرى قالىپتى دەڭگەيدەن 100 پايىزعا كوپ. ونىڭ ۇستىنە قاردىڭ ىلعال قورى ەكى ەسەگە ارتىپ، 545 ميلليون تەكشە مەترگە (قالىپتى مولشەرى 256 ميلليون تەكشە مەتر) جەتىپ وتىر.

ايتا كەتەيىك، مۇنداي قالىڭ قار قورى وبلىستا سوڭعى وتىز جىلدا بولماعانى بەلگىلى. 1987-جىلى وڭىردە وسىنداي قارلى قىس بولعان ەدى.