قازاقستاندا 88 شەتەلدىك تەلەارنا كورسەتىلمەيتىن بولدى
وعان شەتەلدىك تەلەارنالاردىڭ قازاقستان زاڭناماسىنا ەنگەن تالاپتاردى ورىنداماۋى سەبەپ بولىپ وتىر.
تىيىم سالىنعان ۇيىمدار اراسىندا MUSICBOX، دوجد، Fashion TV، Fox News Channel, THT- Comedy سىندى تانىمال ويىن- ساۋىق تەلەارنالارى بار.
«قازىر قازاقستاندا 306 شەتەلدىك تەلە- راديو ارنا تىركەۋدە تۇر. ولاردىڭ قىزمەتىن رەتتەۋ ماقساتىندا مينيسترلىك جىل باسىندا زاڭناماعا تۇزەتۋلەر ەنگىزدى. وعان سايكەس، شەتەلدىك ارنالار قازاقستان رەسپۋبليكاسىندا ءوز وكىلدىگىن اشۋى مىندەتتەلدى. بارلىق تالاپتاردى ورىنداۋ ءۇشىن جارتى جىل ۋاقىت تا بەرىلدى. قازىرگى ۋاقىتتا 219 تەلەارنا ءتيىستى تالاپتاردى ورىندادى. مينيسترلىك قالعان 88 ارنانىڭ ەل اۋماعىندا حابار تاراتۋىن توقتاتۋدى قاراستىراتىن بۇيرىق ازىرلەدى»، - دەپ جازدى ق ر اقپارات جانە كوممۋنيكاتسيالار ءمينيسترى داۋرەن ابايەۆ Facebook-تە.
«تەلەديدار جانە راديو حابارلارىن تاراتۋ تۋرالى» ق ر زاڭىنا (18-1-باپ) ەل اۋماعىندا حابار تاراتىن بارلىق شەتەلدىك تەلە جانە راديوارنالاردىڭ وكىلدىك اشۋ مىندەتتەمەسى 2017 -جىلى ەنگىزىلگەن.
اتالعان زاڭ 2018 -جىلدىڭ 9 -قاڭتارىندا كۇشىنە ەنگەن جانە شەتەلدىك تەلە- راديوارنالار ق ر اۋماعىندا زاڭدى تۇلعانى نەمەسە وكىلدىگىن (فيليالىن) 2018 -جىلدىڭ 9 -شىلدەسىنە دەيىن تىركەۋگە مىندەتتى بولعان.
بەلگىلەنگەن مەرزىم اياقتالعان سوڭ مينيسترلىك زاڭدى تۇلعانى نەمەسە وكىلدىگىن (فيليالىن) تىركەمەگەن بارلىق شەتەلدىك تەلە جانە راديوارنالاردىڭ تىركەۋ كۋالىكتەرىن قايتارۋ تۋرالى شەشىم شىعاردى. بۇل ءوز كەزەگىندە اتالعان تەلە جانە راديوارنالاردىڭ ق ر اۋماعىندا حابار تاراتۋ قۇقىعىن جويادى.
مينيسترلىكتىڭ حابارلاۋىنشا، قازاقستان اۋماعىندا حابار تاراتۋىن جالعاستىرعىسى كەلەتىن شەتەلدىك تەلە جانە راديوارنالار ءوز وكىلدىكتەرىن اشىپ، قايتادان تىركەۋگە تۇرۋى قاجەت.
قازاقستان رەسپۋبليكاسى اۋماعىندا ءوز وكىلدىكتەرىن اشپاعان 88 تەلەارنانىڭ ءتىزىمى مينيسترلىك سايتىندا جاريالانعان.