اباي وبلىسىندا مۇحتار اۋەزوۆتىڭ مەرەيتويىنا وراي 87 شاقىرىمدىق ۋلترامارافون ءوتتى
مۇحتار اۋەزوۆتىڭ 125 -جىلدىق مەرەيتويىنا وراي ءاليحان بوكەيحان ۋنيۆەرسيتەتى جانە ليەۆ گۋميليەۆ اتىنداعى ە ۇ ۋ قىزمەتكەرلەرى مەن ءبىلىم الۋشىلارىنىڭ ۇيىمداستىرۋىمەن سەمەي - ءبورىلى باعىتىندا ۋلترامارافون ءوتتى. شارانىڭ ماقساتى - جازۋشىنىڭ مەرەيتويىن كەڭ كولەمدە ناسيحاتتاۋ ءارى ازاماتتاردى سالاۋاتتى ءومىر سالتىنا شاقىرۋ.
اكسيا اياسىندا سەمەيدەن بورىلىگە دەيىنگى قاشىقتىقتى كاسىبي مارافونشى، ليەۆ گۋميليەۆ اتىنداعى ەۋرازيا ۇلتتىق ۋنيۆەرسيتەتى الەۋمەتتانۋ كافەدراسىنىڭ دوتسەنتى سالىقجان رامازانوۆ جۇگىرىپ ءوتتى. سەمەي قالاسىنىڭ اۋەزوۆ الاڭىنان باستالعان ۋلترامارافوندا سپورتشى اباي اۋدانى ءبورىلى اۋىلىندا ورنالاسقان مۇحتار اۋەزوۆتىڭ مۋزەي ۇيىنە دەيىنگى 87 شاقىرىم 300 مەتر قاشىقتىقتى 7 ساعات 59 مينۋت 53 سەكۋند ۋاقىت ارالىعىندا باعىندىردى.
ۋلترامارافوننىڭ باستاپقى 10 شاقىرىمىندا سپورتشىمەن بىرگە ءاليحان بوكەيحان ۋنيۆەرسيتەتىنىڭ دەنە شىنىقتىرۋ جانە سپورت باعدارلاماسىنىڭ ستۋدەنتتەرى مەن وقىتۋشىلارى جۇگىردى. سوڭعى 5 شاقىرىم قاشىقتىقتا وعان اباي اۋدانى قاسقابۇلاق ورتا مەكتەبىنىڭ وقۋشىلارى قوسىلدى.
«87 شاقىرىمدى شامامەن 8,5 ساعاتتا جۇگىرىپ وتەم دەپ ويلاعانمىن. الايدا ودان دا ەرتە جۇگىرىپ جەتتىم. بۇعان دەيىن وسى تارىزدەس 6 مارافونعا قاتىسقانمىن. ونىڭ ەشقايسىسىندا 70 شاقىرىمنان ارى اسپاعان ەدىم. بۇل مەن ءۇشىن جاڭا مەجە بولدى»، - دەيدى سالىقجان رامازانوۆ.
مارەگە جەتكەن ۋاقىتتا سپورتشىنى اباي اۋدانىنىڭ اكىمدىگى، ءبورىلى اۋىلىنىڭ تۇرعىندارى، ابايدىڭ «جيدەباي- ءبورىلى» مەملەكەتتىك مۋزەي- قورىعىنىڭ قىزمەتكەرلەرى سالتاناتپەن قارسى الدى.