قاراعاندى وبلىسىنىڭ 86 جاستاعى تۇرعىنى ك ۆ ي-عا قارسى ۆاكسينا الدى

قاراعاندى. قازاقپارات - قاراعاندى وبلىسى، بۇقار جىراۋ اۋدانى بوتاقارا كەنتىنىڭ تۇرعىنى قاناعات جۇماش ۇلى العاشقىلاردىڭ ءبىرى بولىپ كوروناۆيرۋسقا قارسى ەكپە الدى.

اقساقال ءوزىن جانە جاقىندارىن جۇقتىرۋدان قورعاعىسى كەلەدى جانە اۋىلداستارى مەن وبلىس تۇرعىندارىن ودان ۇلگى الۋعا شاقىرادى، دەپ حابارلايدى قازاقپارات ءتىلشىسى.

قاريا 86 جاستا. ءومىر بويى ول ەسەپشى بولىپ جۇمىس ىستەگەن. ءاردايىم وتە بەلسەندى بولعان جانە بوس وتىرماۋعا تىرىسقان. سوندىقتان زەينەتكە شىعىپ، بيزنەسپەن اينالىسۋدى شەشكەن. قارتايعانىنا قاراماستان، جەكە كاسىپكەرلىك اشىپ، اۋدان تۇرعىندارىنا سالىق ەسەپتەرىن جاساۋعا جانە ولاردى مەملەكەتتىك كىرىستەر ورگاندارىنا تاپسىرۋعا كومەكتەسەدى. ون ءتورتىنشى ساۋىردە بۇقار جىراۋ اۋدانىندا العاشقى ەگۋ پۋنكتتەرى اشىلعان كەزدە زەينەتكەر ۆاكسيناتسيالاۋعا نيەت ءبىلدىردى. ەمحاناعا العاشقىلاردىڭ ءبىرى بولىپ كەلگەن ول دارىگەردىڭ قاراۋىنان ءوتىپ، «سپۋتنيك V» ۆاكسيناسىنىڭ ءبىرىنشى كومپونەنتىن الدى.

«مەن مۇندا تۋعان- تۋىستارىما، جاقىندارىما، سونداي-اق اۋىلداستارىما ۇلگى كورسەتۋ ءۇشىن كەلدىم. دەنساۋلىقتى ساقتاۋ ءۇشىن ءارقايسىمىز ۆاكسيناتسيادان ءوتۋىمىز كەرەك. قورقۋدىڭ قاجەتى جوق! ەگەر ءبىز قورقاتىن بولساق، جاعداي تەك ناشارلاي تۇسەدى. جاقسىلىققا سەنۋ كەرەك. ماعان قاراڭىزدارشى، مەن 86 جاستامىن، تولىققاندى ءومىر سۇرگىم كەلەدى»، - دەپ اتاپ ءوتتى قانات جۇماش ۇلى.

ءوز ىسىنەن باسقا، اقساقال سپورتپەن دە بەلسەندى اينالىسادى. بيليارد، شاحمات، دويبى ويناعاندى ۇناتادى. ونىڭ 10 بالاسى، 21 نەمەرەسى جانە 11 شوبەرەسى بار ايتا كەتۋ كەرەك، بۇگىنگى تاڭدا بۇقار جىراۋ اۋدانىندا ءۇش ۆاكسيناتسيا پۋنكتى جۇمىس ىستەيدى: ەكەۋى بوتاقارا كەنتىنىڭ ەمحاناسىندا جانە بىرەۋى عابيدەن مۇستافين اتىنداعى اۋىلدا. ەگۋ ناۋقانى باستالعاننان بەرى بارلىعى 285 ادام «سپۋتنيك V» ۆاكسيناسىنىڭ ءبىرىنشى كومپونەنتىن الدى.

اۆتور: اگاتا مۋحامەدجانوۆا