تۇركىستان وبلىسىندا 863 جاس مامان اۋىلدىق جەرلەرگە بارىپ، جۇمىسقا ورنالاستى
دەپ حابارلايدى قازاقپارات حابار 24 اگەنتتىگىنە سىلتەمە جاساپ.
كەنتاۋ اۋدانىندا دا وسى جوبا اياسىندا جۇمىسقا تۇرىپ، تىرشىلىگىن تۇزەگەن جاستار از ەمەس. سونىمەن قاتار، اۋدانداعى جاستار ورتالىعى دا جاستارعا باعىت- باعدار بەرىپ وتىرادى. بۇل - بايىلدىر اۋىلدىق وكرۋگىنىڭ مادەنيەت ءۇيى. كلۋب مەڭگەرۋشىسى گۇلنۇر دۇيسەنبييەۆا اۋىل بالالارىنا ساحنادا ونەر كورسەتۋدىڭ قىر- سىرىن ۇيرەتىپ جاتىر. جاس مامان - وتىرار اۋدانىنىڭ تۋماسى. تۇركىستانداعى قوجا احمەت ياساۋي اتىنداعى حالىقارالىق قازاق- تۇرىك ۋنيۆەرسيتەتىن اكتەرلىك ونەر ماماندىعى بويىنشا بىتىرگەن. جولداسى ەكەۋى «ديپلوممەن اۋىلعا» باعدارلاماسىمەن وسىندا كەلىپ جۇمىسقا ورنالاسىپتى. قازىر ەكى بالانىڭ اناسى ءوز جۇمىسىنا ءدان ريزا.
«قۇدايعا شۇكىر، باسپانام بار، جۇمىسىم بار. اۋىلداعى جاس بۇلدىرشىندەرگە ساباق بەرەمىن. وزىمە وسى جۇمىسىم ۇنايدى. وسى باعدارلامانىڭ شىققانىنا ۇلكەن راقمەت ايتامىن. جاستارعا ايتارىم، قولدارىنا ديپلومدارىن السا، مەن سياقتى اۋىلعا كەلىپ جۇمىس ىستەسىن، مەن سياقتى باسپانالى بولسىن»، - دەيدى بايىلدىر اۋىلدىق وكرۋگىنىڭ تۇرعىنى گۇلنۇر دۇيسەنبيەۆا.
بۇگىندە كەنتاۋ قالالىق جاستار ورتالىعى جاستاردىڭ ءجيى باس قوساتىن ورنىنا اينالعان. مۇندا ەلباسىنىڭ «سيفرلى قازاقستان» باعدارلاماسىن جاستارعا كەڭىنەن ناسيحاتتاۋ ماقساتىندا «ەلەكتروندى ۇكىمەت» جۇيەسى ەنگىزىلگەن. جاستار وزدەرىنە قاجەتتى بارلىق اقپاراتتى وسى جەردەن كەلىپ الادى.
جالپى، ورتالىقتا جاستارعا قىزمەت كورسەتۋ ءۇشىن بارلىق جاعداي جاسالعان. ماسەلەن، بەلگىلى كاسىپكەرلەردىڭ قاتىسۋىمەن جاستاردى كاسىپكەرلىككە باۋلىپ، كەپىلسىز نەسيە بەرۋگە باعىتتالعان ءتۇرلى سەمينار- ترەنينگتەر ءوتىپ تۇرادى. سونىمەن قاتار جاستاردى سولتۇستىككە قونىس اۋدارىپ، سوندا قالىپ جۇمىس ىستەۋگە ناسيحاتتايتىن بوس جۇمىس ورىندارىنىڭ جارمەڭكەسى ۇيىمداستىرىلادى.
«بۇگىنگى تاڭدا جاستارعا نە قاجەت؟ ول - جاستار اراسىندا قۇقىق بۇزۋشىلىق پەن قىلمىستىڭ الدىن الۋ ماقساتىندا بوس ۋاقىتىن قالاي وتكىزەدى، سوعان جاستاردى بەيىمدەۋ. ەكىنشىسى، ءبىزدىڭ مەملەكەتتىك باعدارلامامىز بار، ياعني جاستار كوبىنە تۇرعىن ءۇي، قولجەتىمدى باسپانا، «ديپلوممەن اۋىلعا»، «سەرپىن» باعدارلاماسىنا قاتىستى كەڭەس بەرەمىز. توعىزقۇمالاق ۇيىرمەلەرى، ۇلتتىق قۇندىلىقتار، ۇلتتىق ويىندارىمىزدى قايتا جاڭعىرتۋ ماقساتىندا ءتۇرلى ۇيىرمەلەر جۇمىس ىستەيدى»، - دەيدى كەنتاۋ قالالىق جاستار ورتالىعىنىڭ جەتەكشىسى قانات بەكمەتوۆ.
سونداي- اق، الداعى 2019 -جىل - جاستار جىلى بولعاندىقتان، ولاردى جۇمىسپەن قامتىپ، ساپالى ءبىلىم الۋىنا باعىتتالعان كەشەندى جۇمىس جوسپارى بەكىتىلگەن. قالا اكىمىنىڭ قولداۋىمەن سپورت الاڭدارى دا اشىلعان.
جالپى، تۇركىستان وبلىسىندا بەس ءجۇز مىڭنان اسا جاس بار. بۇل - وبلىس حالقىنىڭ 26 پايىزى. «سەرپىن-2050» جوباسى اياسىندا 1589 جاس سولتۇستىك وڭىرلەردە ءبىلىم الىپ جاتىر.