كوروناۆيرۋس جۇقتىرعانداردىڭ 85 پايىزى مەديتسينا نازارىنان تىس قالۋى مۇمكىن - دارىگەر
دەپ حابارلايدى قازاقپارات ءتىلشىسى.
«ك ۆ ي اۋىر ءتۇرىن انىقتاۋ سونشالىقتى قيىن ەمەس. ەگەر دەنە تەمپەراتۋراسى 38 گرادۋستان تۇسپەي قويسا جانە ج ر ۆ ي بەلگىلەرى بىلىنسە، ول سىرقاتتىڭ اۋىر ءتۇرى. ودان بولەك جوتەل، ەنتىگۋ پايدا بولىپ، تابەت جوعالسا، بىردەن دارىگەرگە جۇگىنۋ قاجەت. سونداي- اق، سوزىلمالى اۋرۋى بار ادامداردا سىرقات اۋىر جۇرەدى. قانت ديابەتى، ارتەريالىق گيپەرتەنزيا، جۇرەك اۋرۋى بار ادامداردىڭ جاعدايى كۆي كەزىندە قيىنداي تۇسەدى»، - دەيدى ول.
ونىڭ ايتۋىنشا، سيمپتومسىز ناۋقاستار ۆيرۋس تاسىمالداۋشى بولعاندىقتان ولاردى وقشاۋلاعان دۇرىس.
«بۇگىندە العاشقى مەديتسينالىق- سانيتارلىق كومەك جۇيەسى ءتيىمسىز. اۋرۋدىڭ انىقتالۋى مەن ادامداردىڭ جۇگىنۋى بار بولعانى 14 پايىز، سايكەسىنشە، شامامەن 85 پايىز ناۋقاس مەديتسينا نازارىنان تىس قالۋى مۇمكىن. ادامداردا اۋرۋدىڭ بەلگىسى بىلىنبەۋى مۇمكىن، دەگەنمەن ولار ۆيرۋس تاسىمالداۋشى بولا الادى. ونى تەك زەرتحانالىق تالداۋ ارقىلى عانا انىقتاي الامىز. ءبىراق، ەگەر ادامدار ۇنەمى مەديتسينالىق تەكسەرىستەن وتسە مۇنداي جاعداي بولماس ەدى. سوزىلمالى اۋرۋلارى بار ادامداردىڭ يممۋندىق جۇيەسى دۇرىس ىستەمەيدى. ءسويتىپ ولار وسى ينفەكتسيانىڭ سيمپتومسىز تاسىمالداۋشىلارى بولادى. ەگەر ول ناۋقاس وسىنى بىلەتىن بولسا، وندا مىندەتتى تۇردە وقشاۋلانىپ، ماسكا تاعۋى قاجەت»، - دەيدى پروفەسسور.
ءسوز اراسىندا، ول ماسكا تاعۋ تارتىبىنە دە توقتالدى. «ماسكا تاعىپ جۇرۋگە مىندەتتىمىز. بۇل بۇگىنگى كۇننىڭ باستى شارتى. ماسكا - مەديتسينالىق قۇرال. ول سوناۋ XIV عاسىردان بەرى قولدانىلىپ كەلەدى. وبا، باسقا دا جۇقپالى اۋرۋلار كەزىندە قولدانىلا باستاعان. سودان بەرى ءوزىنىڭ تيىمدىلىگىن كورسەتتى. كوروناۆيرۋس تىنىس جولدارى ارقىلى جۇعاتىندىقتان ماسكا تاققان ءجون. ناۋقاس تۇشكىرىپ، سويلەگەن كەزدە، ول اۋاعا تارايدى دا 20-30 مينۋتتان كەيىن اينالاسىنداعى زاتتارعا قونادى. جالپى ۆيرۋستتىڭ ءوزى اۋادا 25 مينۋتتاي ءومىر سۇرەدى. وسى ۋاقىت ارالىعىندا ءبىراز ادامعا جۋعۋى ابدەن مۇمكىن. سوندىقتان قوعامدىق ورىنداردا، اۆتوبۋستا ماسكا تاعۋ كەرەك. ءبىر رەتتىك ماسكانى ەكىنشى رەت تاعۋعا بولمايدى، ال ماتادان تىگىلگەن ماسكانى ءبىر رەت قولدانعاننان كەيىن كىر سابىنمەن جاقسىلاپ جۋعان دۇرىس. قازىر ادامدار ماسكاعا سپيرت سەۋىپ الادى ەكەن. بۇل دۇرىس ەمەس. تىنىس الۋ جولدارىن زاقىمدايسىزدار. تاعى ءبىر ايتارىم، ماسكانى دۇرىس تاققان ءجون. ول اۋىز بەن مۇرىندى تولىق جاۋىپ تۇرۋ كەرەك. وزدەرىڭىز بايقاساڭىزدار كوشەدەگى ادامداردىڭ باسىم بولىگىندە ماسكا تەك اۋزىن جاۋىپ تۇرادى، مۇرنى اشىق»، - دەپ قوستى ول.
دارىگەر دەنساۋلىقتى نىعايتۋ ءۇشىن كوبىرەك قوزعالىپ، تازا اۋادا ءجۇرىپ، جاقسى تاماقتانۋ كەرەكتىگىن ايتتى.
«قازىر كارانتين جاعدايى بولعان سوڭ ادامداردىڭ كوپشىلىگى ۇيىنەن شىقپاي وتىر. كەيبىرى كەڭسەدە جۇمىس ىستەيدى، ياعني قوزعالىس از. بۇل ادام دەنساۋلىعىنا كەرى اسەر ەتەدى. ازاماتتارعا تازا اۋادا سەرۋەندەپ، كوبىرەك قوزعالۋعا كەڭەس بەرەمىن. ودان بولەك، 7-8 ساعات ۇيىقتاعان ابزال، ال كوروناۆيرۋستان جازىلىپ شىققان ادامدار كۇندىز دە ۇيىقتاۋلارى كەرەك. سونداي- اق، بويىڭىزعا كۇش- قۋات بەرەتىن ءنارلى تاعامداردى قابىلداعان ءجون»، - دەيدى راۋشان تەسوۆا- بەردالينا.
اۆتور: الما مۇقانوۆا