قازاقستان 85 مىڭ توننا بەنزيندى سىرتقا ساتادى
بۇل تۋرالى ەل الدىندا ەسەپ بەرىپ جاتقان ەنەرگەتيكا ءمينيسترى قانات بوزىمبايەۆ ايتتى، دەپ حابارلايدى قازاقپارات ءتىلشىسى.
ءمينيستردىڭ ايتۋىنشا، ءۇش بىردەي مۇناي وڭدەۋ زاۋىتىندا جاڭعىرتۋ جۇمىستارى اياقتالعاندىقتان ىشكى نارىقتىڭ بەنزين، ديزەل جانە كەروسينگە دەگەن سۇرانىسى وتاندىق ءوندىرىس ەسەبىنەن 100 پايىز قامتىلىپ وتىر.
«بەس ايدىڭ قورىتىندىسى بويىنشا، ءوندىرۋ دەڭگەيى وتكەن جىلدىڭ وسى كەزەڭىمەن سالىستىرعاندا ءبىرشاما ارتتى. ماسەلەن، بەنزين 13,8 پايىز، ديزەل وتىنى 13,2 پايىز، اۋە كەروسينى 298,6 پايىز ارتىق ءوندىرىلدى. وتاندىق اي-92 جانە اي-95 بەنزيندەرى 20-30 پايىز ارتىعىمەن ءوندىرىلىپ جاتىر.
سونىڭ ارقاسىندا اي-92 بەنزينىنە بولشەك ساۋدا باعاسى ءبىر جىل ىشىندە 6,9 پايىزعا تومەندەدى. ياعني ءبىر ءليترى ءۇشىن 147,6 تەڭگە بولىپ تۇر. اي-95 جانە اي-96 بەنزيندەرىنىڭ باعاسى دا 3,8 پايىز تومەندەپ، ءبىر ليترى ءۇشىن 168,6 تەڭگە بولدى. جازعى ديزەل وتىنىنىڭ باعاسى 1 پايىزعا تومەندەپ، ءبىر ليترى 191,8 تەڭگەگە ساتىلىپ جاتىر»، - دەيدى ەنەرگەتيكا ءمينيسترى.
قانات بوزىمبايەۆ مۇنداي پروفيتسيت مۇناي وڭدەۋ زاۋىتتارىنىڭ تولىپ كەتۋىنە الىپ كەلگەن.
«وسىنىڭ ارقاسىندا مۇناي وڭدەۋ كولەمى امالسىزدان تومەندەدى. ال ول ديزەل مەن اۋە كەروسينىنىڭ وندىرىسىنە كەرى اسەر ەتۋى مۇمكىن ەدى. سوندىقتان، ىشكى نارىقتى باقىلانبايتىن ەكسپورتتان قورعاۋ ءۇشىن اشىق ءتۇستى مۇناي ونىمدەرىنە ەكسپورتتىق كەدەندىك باج تومەندەتىلدى. ەۋرازيالىق ەكونوميكالىق وداقتىڭ كەدەندىك اۋماعىنان تىسقارى جەرلەرگە بەنزين ەكسپورتى اشىلدى. اي-92 بەنزينىن 60-70 مىڭ توننا كولەمىندە، ال اي-95 بەنزينىن 10-15 مىڭ توننا كولەمىندە ەكسپورتتاۋدى جوسپارلاپ وتىرمىز»، - دەيدى قانات بوزىمبايەۆ.
سونداي-اق، مينيستر قازاقستان بەنزينىن ەكسپورتتاۋ بويىنشا شەتەلدىك وكىلدەرمەن كەلىسىمدەر ءجۇرىپ جاتقانىن اتادى.
«ءبىزدىڭ ەۋرازيا ەكونوميكالىق وداعىنداعى ارىپتەستەرىمىز دە بەنزين ەكسپورتتاۋىمىزعا قىزىعۋشىلىق تانىتىپ وتىر. ءبىز ولاردىڭ الدىنا ناقتى تالاپتار قويدىق»، - دەدى مينيستر