مەملەكەت باسشىسى استاناداعى 85 -مەكتەپ-ليتسەيىن اشتى
جاڭا مەكتەپ قازاقستان مەن اراب مەملەكەتىنىڭ حالىقارالىق ىنتىماقتاستىعىن دامىتۋ شەڭبەرىندە كاتار مەملەكەتىنىڭ دامۋ قورىنىڭ قولداۋىمەن سالىنعان.
ءبىلىم ورداسىنىڭ جوبالىق قۋاتى 1200 ورىنعا ارنالعان. جاڭا ءبىلىم ورداسىندا ەكى اۋىسىمدا جۇمىس جاساۋ جوسپارلانعان. مەكتەپتە 48 وقۋ كابينەتى بار. باعىتى - جاراتىلىستانۋ- ماتەماتيكالىق. وقىتۋ قازاق جانە ورىس تىلدەرىندە وتەدى.
№85 -مەكتەپ- ليتسەيدە وقىتۋ مەملەكەتتىك ءبىلىم بەرۋ ستاندارتتارىنىڭ تالاپتارىنا سايكەس، يننوۆاتسيالىق تەحنولوگيالاردى قولدانۋ ارقىلى جۇرگىزىلەتىن بولادى. ۇيلەسىمدى جاھاندىق تۇلعانى تاربيەلەۋ ءۇشىن لينگۆيستيكالىق، ينكليۋزيۆتىك ساياساتتى، اكادەميالىق ادالدىق جانە باعالاۋ ساياساتىن ۇستانۋ كوزدەلگەن.
1-11 سىنىپتاردا «ماتەماتيكا جانە وي دامىتۋ»، «روبوتوتەحنيكا»، «شاحمات»، «STEM»، «Scratch» باعدارلامالاۋ ورتاسى» اتتى ليتسەي كومپونەنتتەرى وقۋشىلاردىڭ جاراتىلىستانۋ- ماتەماتيكالىق عىلىم سالاسىنداعى بىلىمدەرىن كەڭەيتۋگە باعىتتالعان.
5-9 -سىنىپتاردا گيمنازيا كومپونەنتىنە «ەnglish Club» ، شىعىس ءتىلى جانە حيميا، بيولوگيا، فيزيكا، ينفورماتيكا پاندەردى اعىلشىن تىلىندە وقىتۋ قوسىلادى.
10-11-سىنىپتاردا «بيزنەس نەگىزدەرى»، «دراما»، «ويلاۋ ديزاينى» جانە مامانداندىرىلعان ءبىلىم بەرۋ كۋرستارى قوسىمشا ەنگىزىلەدى.
ايتا كەتسەك، جاڭا 2018-2019 وقۋ جىلىندا ەلوردالىق 105 ءبىلىم وردالارىنا (85 مەملەكەتتىك، 1 كەشكى مەكتەپ، 15 جەكەمەنشىك جانە 4 رەسپۋبليكالىق دەڭگەيدەگى مەكتەپتەر) 160 مىڭعا جۋىق وقۋشى ساباققا بارادى. ونىڭ 18 مىڭ بالاسى ءۇشىن قوڭىراۋ العاش رەت سوعىلاتىن بولادى.
ءبىرىنشى ساباقتىڭ تاقىرىبى ەلوردامىزدىڭ 20 جىلدىق مەرەيتويىنا ارنالماق. بالالارعا استانا قالاسىنىڭ قالىپتاسۋ تاريحى، ونىڭ دامۋى، كورىكتى جانە ماڭىزدى تاريحي وقيعالار تۋرالى باياندالادى.
