ارحەولوگتار شىعىستاعى ەلەكە سازىنان 850 التىن بۇيىم تاپتى
زەرتتەۋ جۇمىستارىنىڭ ناتيجەسىندە تابىلعان 850 التىن بۇيىمنىڭ بارلىعى سالتاناتتى ات شەرۋىنە ارنالعان. عالىمداردىڭ باعامداۋىنشا، قازىنا ورتا ساق داۋىرىنە تيەسىلى. شامامەن ءبىزدىڭ زامانىمىزعا دەيىنگى V- IV عاسىرلاردىڭ ەنشىسىندەگى جادىگەرلەر.
«قازىنانى قورعاننىڭ وزىنەن تاپقان جوقپىز. بۇل كوسەمنىڭ زيراتى قۇلشىلىق ورنى ەكەنىنەن حابار بەرەدى. كوسەم قايتىس بولعان سوڭ وسى اۋماق كيەلى ورىن دەپ سانالىپ، وعان كەلگەن حالىق اتا-بابا رۋحىنا سىيىنعان. ساقتار مەن كەيىنگى تۇرىك تايپالارىندا وسىنداي ءداستۇر بولعان. سوعان بايلانىستى ءبىز مۇندا ەل بيلەگەن كوسەم جەرلەندى دەگەن تۇجىرىم جاسادىق»، - دەدى ابدەش تولەۋبايەۆ.
تابىلعان ارتەفاكتىلەردەن ساق قوعامى باي مەن كەدەي دەپ توپقا بولىنگەنىن اڭعارۋعا بولادى.
عالىمداردىڭ پىكىرىنشە، ۇلكەن قۇلاقتى جولبارىس-پانتەرا ۇلگىسىندە جاسالعان القا ەرەكشە قىزىعۋشىلىق تۋدىرادى. ميفولوگيالىق جانۋاردىڭ اياعىنا ىلىنگەن قوڭىراۋ دا بار.
سونداي-اق عالىمداردى ەكى شىنجىر سىمداعى اقىق تاستارى بار القا قىزىقتىردى.
«ەجەلگى شەبەرلەر ءبىرىن-ءبىرى قايتالاماعانى كورىنىپ تۇر. ءاربىر شەبەردىڭ وزىندىك قولتاڭباسى بايقالادى. بارلىق تابىلعان زات مۇقيات جاسالعان. ات- ابزەلدەرىنىڭ دەنى جۇقا فولگادان ازىرلەنگەن. التىننان تىعىزدالىپ جاسالعان ات-ابزەلدەرىن بۇعان دەيىن كەزدەستىرگەن جوقپىن»، - دەدى ابدەش تولەۋبايەۆ.
تاعى ءبىر ەرەكشە دۇنيەنىڭ ءبىرى - مىسىق تۇقىمداستارعا جاتاتىن ميفولوگيالىق قۇلاقتى جىرتقىش اڭ بەينەلەنگەن القا.
ايتا كەتەيىك، تارباعاتاي جەرىن مەكەندەگەن ساقتاردىڭ بۇل قولونەرلەرى ءبىزدىڭ داۋىرىمىزگە دەيىنگى V- IV عاسىرلارعا تيەسىلى.
تابىلعان جادىگەرلەردىڭ ەرەكشەلىگى - ساپاسى مەن ءبىر-بىرىنە ۇقسامايتىندىعىندا جاتىر.
سونداي-اق ارحەولوگ قورعاننان 50 مەتر جەردە قولا مەن التىن قۇياتىن ۇستاحانا تابىلعانىن اتاپ ءوتتى.
ابدەش تولەۋبايەۆتىڭ ايتۋىنشا، تابىلعان جادىگەرلەر - بۇل زەرتتەۋ جۇمىستارىنىڭ باستاپقى ناتيجەسى عانا. ويتكەنى ارحەولوگتاردىڭ الداعى ۋاقىتتا اتقاراتىن جۇمىستارى جەتەرلىك. تاياۋ ارادا ولار 4 كىشى قورعاندى زەرتتەۋگە كىرىسەدى.