قازاقستاندىق عالىمداردىڭ جوباسى 850 ميلليون تەڭگە تابىس تاپتى

استانا. قازاقپارات - ق ر ءبىلىم جانە عىلىم مينيسترلىگىنە قاراستى «عىلىم قورى» ا ق- تىڭ گرانتتىق قارجىلاندىرۋى اياسىندا جۇزەگە اسىرىلعان وتاندىق جوبالار 852 ميلليون تەڭگە تابىس تاۋىپ وتىر.

استانادا سەنات دەپۋتاتتارىمەن كەزدەسۋدە «عىلىم قورى» ا ق باسقارما ءتوراعاسى انۋاربەك سۇلتانعازين وسىلاي دەدى، دەپ حابارلايدى قازاقپارات ءتىلشىسى.

«وتكەن جىلى ءبىز 852 ميلليون تەڭگە كوممەرتسيالىق تابىس تاپتىق. جەمىسىن بەرگەن ناقتى جوبالار بارشىلىق. ماسەلەن، كوكشەتاۋ مينەرالدى سۋى ءوز ونىمدەرىن شىعارا وتىرىپ، 441 ميلليون تەڭگە كوممەرتسيالىق كىرىس كوردى»، - دەيدى انۋاربەك سۇلتانعازين.

باسقارما ءتوراعاسى تەحنيكالىق باعىتتاعى وتاندىق ونىمدەر تۋرالى دا ءسوز قوزعادى.

«قازتەحنيكوس» ءونىمى بار. ءبىزدىڭ عالىمدار جارىقديودتى شامدار ءۇشىن ارنايى قۋات كوزىن ويلاپ تاپتى. ول ءونىم جارىق ديودتى شامداردىڭ قىزمەت ەتۋ مەرزىمىن ەكى ەسەگە ارتتىرادى. ياعني، وسى ءونىم ارقىلى شامعا قاتتى جۇكتەمە تۇسپەي، قىزمەت كورسەتۋ مەرزىمى ۇزارادى. بۇل جوبا ءقازىردىڭ وزىندە ەلىمىزدىڭ 11 وڭىرىندە ىسكە اسىرىلىپ جاتىر»، - دەيدى انۋاربەك سۇلتانعازين.

ەسكە سالا كەتسەك، «عىلىم قورى» ا ق باسقارما ءتوراعاسى انۋاربەك سۇلتانعازين ءۇش كونكۋرستىڭ ناتيجەسى بويىنشا ماقۇلدانعان جوبالارعا وتاندىق بيزنەس وكىلدەرى بۇرىنعىدان كوبىرەك اقشا بولە باستاعانىن ايتقان بولاتىن.

«العاشقى كونكۋرسقا بار-جوعى 337 جوبا كەلىپ ءتۇستى دە، سونىڭ ناتيجەسى بويىنشا 32 جوبا قارجىلاندىرۋ بويىنشا قولداۋ تاپتى. ال 2017 -جىلى وتكىزگەن كونكۋرسقا 502 جوبا ءتۇستى. ولاردىڭ ىشىندە 72 جوبا قولداۋعا يە بولدى. سونىمەن قاتار، ءۇشىنشى كونكۋرسقا 431 جوبا قابىلدانىپ، ونىڭ 78 ى ىرىكتەلدى. وسىلايشا، ىسكە اسىرىلعان جوبالاردى ەسەپتەپ وتىرساق، ءۇش كونكۋرس بويىنشا ماقۇلدانعان جوبالارعا بولىنەتىن قاراجاتتىڭ 40,3 پايىزىن بيزنەس وكىلدەرى اۋدارعان. دەمەك، بيزنەس قازىرگى تاڭدا قازاقستاندا عىلىممەن جۇمىس ىستەۋگە بولاتىنىنا سەندى»، - دەيدى انۋاربەك سۇلتانعازين.