الماتىدا 85 جاستاعى كۇيەۋ جىگىت پەن 96 جاستاعى قالىڭدىق نەكە قيدى
ءبىرىنىڭ جاسى 80 نەن اسقان، ال ەكىنشىسى 90 دى ەڭسەرگەن قاريالار كوپ جىلدان كەيىن نەكەسىن زاڭداستىردى.
ولاردىڭ ماحاببات بۇلاعىنان ءنار العان وقيعاسىنا ارنا تىلشىلەرى دە كۋا بولىپ قايتتى.
مۇندا نەكەنى راسىمدەۋ شارالارى بارلىعىنا بىردەي، جاس ەرەكشەلىگىنە قارامايدى. ءتىپتى نەكە جۇزىگىن الماسۋ دا داستۇرگە ساي جۇرگىزىلدى.
تەك بۇگىنگى نەكە قيۋدىڭ ءبىر وزگەشەلىگى، كارانتينگە بايلانىستى ادەتتەگىدەي سالتانات زالىندا ەمەس، نەكە سارايىنىڭ تەرەزەسى ارقىلى وتكىزىلدى. تاعى ءبىر قىزىعى، ەرىنىڭ جاسى - 85 تە، جۇبايى - 96 دا.
بۇل جۇپتىڭ ماحابباتى سوناۋ 1985-جىلى باستالىپتى. باستاپقى كەزدە دوستىق قارىم-قاتىناس بولعان. ەلەنا يۆان قىزى وپەرا تەاترىندا كوپ جىل ەڭبەك ەتىپ، زەينەتكە شىققان. ءبىراق ۇيدە قاراپ وتىرا الماي، قايتا جۇمىسقا شىعادى.
«جاس تەحنيكتەر ستانتسياسىندا جۇمىس ىستەي باستادىم. ءبىز اندرەي ميحايلوۆيچپەن سول جەردە تانىستىق. 35 جىل جولداس بولدىق» دەيدى ەلەنا ەشتوكينا.
اندرەي ميحايلوۆيچ جاس تەحنيكتەر ستانتسياسىندا ۇلدارعا شەگە قاعۋدى، ۇشاق جاساپ، عارىش كەمەلەرىن قۇراستىرۋدى ۇيرەتكەن. ارينە، ونىڭ ءبارى ماكەت بولاتىن. ەڭ باستى ماقسات - بالالاردى ىنتالاندىرىپ، بىلىمگە، ونەرتاپقىشتىققا بەيىمدەۋ ەدى.
ەلەنا يۆانوۆنا ءوزى شىعارماشىلىق ورتادان شىققاندىقتان بۇل وعان قاتتى ۇنايدى. ول وپەرا تەاترىندا اريالار ورىنداماعان، حوردا ءان ايتقان. ءبىراق ۇنەمى جەكە پارتياسى بولعانىن ارمانداپتى. ەندى مىنە، كوپ جىل جالعىزدىقتان كەيىن «جەكە ءومىرىم باستالدى، كوپتەن كۇتكەن ارمانىم ورىندالىپ، جار اتاندىم» دەپ ازىلدەيدى.