قارجى ءمينيسترى: ەڭ تومەنگى جالاقىنى كوتەرۋ ءۇشىن 85,8 ميلليارد تەڭگە بولىنەدى

استانا. قازاقپارات - قارجى ءمينيسترى ءاليحان سمايىلوۆ قازاقستان پرەزيدەنتىنىڭ جولداۋىندا ايتىلعان مىندەتتەردى ورىنداۋ ءۇشىن قانشا قاراجات بولىنەتىنىن ايتتى، دەپ حابارلايدى قازاقپارات ءتىلشىسى.

قارجى ءمينيسترىنىڭ ايتۋىنشا، الداعى ءۇش جىلدا پرەزيدەنتتىڭ جولداۋىنداعى مىندەتتەردى ورىنداۋعا 1 تريلليون 288 ميلليارد تەڭگە قاراستىرىلعان.

«ناقتىراق ايتقاندا، ەڭ تومەنگى ايلىق جالاقىنى كوتەرۋ ءۇشىن 85,8 ميلليارد تەڭگە بولىنەدى. تيىسىنشە، بۇل قاراجات 275 مىڭ قىزمەتكەردىڭ ايلىعىن وسىرۋگە باعىتتالادى. وڭدەۋ ونەركاسىبى مەن ەكسپورتتى ىلگەرلەتۋ ءۇشىن 500 ميلليارد تەڭگە بولىنەدى. ول قاراجاتتىڭ 322 ميلليارد تەڭگەسى - ۇلتتىق قور مەن رەسپۋبليكالىق بيۋدجەتتەن بۇرىن ءبولىنىپ، قايتا پايدالانىلىپ جاتقان قاراجات. شاعىن جانە ورتا بيزنەستى دامىتۋ ءۇشىن ءۇش جىلدىڭ ىشىندە 90 ميلليارد (ياعني، جىلىنا 30 ميلليارد تەڭگە) ءبولۋ قاراستىرىلعان»، - دەيدى مينيستر بۇگىنگى ۇكىمەتتىڭ باسپا ءسوز ورتالىعىندا وتكەن جيىندا.

ءاليحان سمايىلوۆتىڭ ايتۋىنشا، اگروونەركاسىپ كەشەنىن دامىتۋ ءۇشىن ءۇش جىلدىڭ ىشىندە 300 ميلليارد تەڭگە (جىلىنا 100 ميلليارد تەڭگە) بولىنبەك. سونىمەن قاتار، الداعى 5 جىلدا «نۇرلى جەر» باعدارلاماسى اياسىندا 2 ميلليون ادامدى ۇيمەن قامتۋ ءۇشىن 76,6 ميلليون ش. م. باسپانا سالۋ كوزدەلگەن.

«قوسىمشا جالعا بەرىلەتىن ۇيلەردىڭ قۇرىلىسىنا 30 ميلليارد تەڭگە بولىنەتىن بولادى. بۇل 250 مىڭ وتباسىنىڭ تۇرعىن ءۇي ماسەلەسىن شەشۋگە مۇمكىندىك بەرەدى. ءبىلىم نىساندارىن سالۋ ءۇشىن ءۇش جىلدا 50 ميلليارد تەڭگە ءبولۋ كوزدەلگەن. بالالاردىڭ قاۋىپسىزدىگىن قامتاماسىز ەتۋ ءۇشىن، سونىمەن قاتار مەكتەپتەگى پسيحولوگتاردىڭ جۇمىسىن كۇشەيتۋگە 16,8 ميلليارد تەڭگە قاراستىرىلادى (جىلىنا 5,6 ميلليارد تەڭگە)»، - دەيدى ءاليحان سمايىلوۆ.

ەسكە سالا كەتسەك، وسى جىلدىڭ 5 - قازانىندا قازاقستان رەسۋپبليكاسىنىڭ پرەزيدەنتى نۇرسۇلتان نازاربايەۆ قازاقستان حالقىنا «قازاقستاندىقتاردىڭ ءال- اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» جولداۋىن جاريالاعان بولاتىن.

اۆتور: ايان بەكەن ۇلى