تارازدا 85 جاستاعى جۇرگىزۋشى اجەي 60 جىلدا ءبىر دە ءبىر رەت جول ەرەجەسىن بۇزباعان
ليديا الەكساندروۆنا سيدورەنكو 85 جاستا، جۇرگىزۋشى ستاجى - 61 جىل. اجەيدى جولدا ءوزىن ءتارتىپتى ۇستاۋدىڭ ناعىز ۇلگىسى دەپ ايتۋعا بولادى. ول وسى ۋاقىتقا دەيىن ءبىر دە ءبىر مارتە جول ەرەجەسىن بۇزباعان. اجەي وسى ۋاقىتقا دەيىن بارلىعى 4 اۆتوموبيل جۇرگىزگەن ەكەن، الدىمەن «موسكۆيچ-8»، كەيىننەن «موسكۆيچ - 2140» كولىگى بولعان. ونى 1990 -جىلى اقشىل- سارى ءتۇستى «ۆاز-2106» - عا الماستىرعان. ال 2011 -جىلدان بەرى «ۆولگا» گاز-24 كولىگىن ءالى كۇنگە دەيىن ءوزى جۇرگىزىپ كەلەدى. جۇرگىزۋشى كۋالىگىن 1959 -جىلى جامبىل قالاسىندا العان اجەي ەشبىر كولىك ۇيىمىندا جۇمىس ىستەمەگەن. ۇزاق جىلدار بويى وبلىستىق تۇتىنۋشىلار وداعىندا ەڭبەك ەتكەن.
جەرگىلىكتى پوليتسيا قىزمەتى باسقارماسىندا پوليتسيا دەپارتامەنتىنىڭ باستىعى گەنەرال- مايور جانات سۇلەيمەنوۆ ليديا سيدورەنكومەن كەزدەستى. باسقارما اۋلاسىندا قاتارلاسىپ - «ۆولگا»، «موسكۆيچ»، «جيگۋلي» ماركالى جەتى رەتروماشينالار بوي تۇزەگەن بولاتىن. ولاردىڭ كەيبىرىن ليديا الەكساندروۆنا ءوزى جۇرگىزىپ، جاس قىزمەتكەرلەرگە كولىك ايداۋداعى شەبەرلىگىن كورسەتتى.
«كوپتەگەن جىلدار بويى قازاقستان رەسپۋبليكاسىنىڭ زاڭدارىن جانە جول قوزعالىسى ەرەجەلەرىن قاتاڭ ساقتاپ، جوعارى سانا مەن جاۋاپتى ازاماتتىق پوزيتسيا ۇستانعانىڭىز ءۇشىن سىزگە شىن جۇرەكتەن العىسىمدى بىلدىرەمىن. ازاماتتارىمىزدىڭ اراسىندا جۇرگىزۋشىلەر ءتارتىبىن قالىپتاستىرۋعا، نىعايتۋعا قوسقان ۇلەسىڭىز زور دەپ ويلايمىن. سىزگە زور دەنساۋلىق، ۇزاق عۇمىر، وتباسىڭىزعا اماندىق پەن بەرەكە تىلەيمىن»، - دەدى جانات سۇلەيمەنوۆ.
گەنەرال ليديا سيدورەنكوعا العىس حات، شوق گۇل جانە قۇندى سىيلىق تاپسىرا وتىرىپ، ىستىق ىقىلاسىن ءبىلدىردى. ءوز كەزەگىندە ليديا سيدورەنكو پوليتسيا باسشىلىعىنا قامقورلىعى مەن ىقىلاسى ءۇشىن العىس ايتىپ، جۇرگىزۋشىلەرگە اقىل- كەڭەسىن جەتكىزدى.
«قۇرمەتتى جۇرگىزۋشىلەر! جول قوزعالىسى ەرەجەلەرىن مۇلتىكسىز ساقتاڭىزدار، جول ۇستىندە جۇرگىزۋشى رەتىندە ءبىر- بىرلەرىڭىزدى سىيلاڭىزدار. اسىرەسە بۇل جاستارعا قاتىستى. سوندا عانا ءتارتىپ ورناپ، جول- كولىك اپاتتارى، قايعىلى وقيعالار ازايادى»، - دەدى اجەي.
اۆتور: سايا سەمباي
