استانا اۋەجايىنان شەتەلگە 83 ميلليون تەڭگە الىپ ۇشپاق بولعان جولاۋشى توقتاتىلدى
بۇل تۋرالى قازاقپارات مەملەكەتتىك كىرىستەر كوميتەتىنە سىلتەمە جاساپ حابارلايدى.
«استانا قالاسى بويىنشا مەملەكەتتىك كىرىستەر دەپارتامەنتىنىڭ «اۋەجاي-استانا» كەدەن بەكەتىنىڭ قىزمەتكەرلەرى 6- قاراشادا «استانا-تاشكەنت» حالىقارالىق رەيسى جولاۋشىلارىنىڭ قول جۇگىن كەدەندىك تەكسەرۋ كەزىندە قازاقستان رەسپۋبليكاسىنىڭ ازاماتتارىنان دەكلاراتسيالانباعان 83601000 تەڭگە كولەمىندە، اتاپ ايتقاندا 180000 ا ق ش دوللارىن (قولما-قول قاراجات) انىقتادى. كەدەندىك تەكسەرۋ كەزىندە زاڭ بۇزۋشىلار لاۋازىمدى تۇلعالارعا كەدەرگى كەلتىرگەن. زاڭ بۇزۋشىلارعا قاتىستى ماتەريالدار قازاقستان رەسپۋبليكاسى قىلمىستىق كودەكسىنىڭ 234-بابى بويىنشا قىلمىستىق ءىس قوزعاۋ تۋرالى شەشىم قابىلداۋ ءۇشىن استانا قالاسىنىڭ ەكونوميكالىق تەرگەۋ دەپارتامەنتىنە جىبەرىلدى»، - دەلىنگەن كوميتەت حابارلاماسىندا.
ايتا كەتسەك، ق ر پرەزيدەنتىنىڭ 2022-جىلعى 14- ناۋرىزداعى 830№ جارلىعىنا سايكەس قولما-قول شەتەل ۆاليۋتاسىن جانە (نەمەسە) شەتەل ۆاليۋتاسىنداعى قاراجاتتى رەسپۋبليكا ۇلتتىق بانكىنىڭ باعامى بويىنشا 10000 (ون مىڭ) ا ق ش دوللارىنان اساتىن سومادا اكەتۋگە تىيىم سالىنادى.