كارانتين رەجيمىن بۇزعاندارعا 83 مىڭ تەڭگە ايىپپۇل سالىنادى: ساراپشى پىكىرى
بۇل پىكىردى ق ر پرەزيدەنتى جانىنداعى قازاقستان ستراتەگيالىق زەرتتەۋلەر ينستيتۋتىنىڭ ءبولىم باسشىسى الۋا جولدىبالينا ءبىلدىردى، دەپ حابارلايدى قازاقپارات ءتىلشىسى.
«بۇگىن قازاقستاندا مەملەكەتتىك كوميسسيانىڭ شەكتەۋ شارالارىن ەڭگىزۋ تۋرالى شەشىمى جاريالاندى. كارانتيندىك رەجيمدى بۇزعان جاعدايدا، قازاقستاندىقتار ءۇشىن جاڭا ايىپپۇلداردى بەكىتۋ - ماڭىزدى شارالاردىڭ ءبىرى. كارانتين رەجيمى مەن سانيتارلىق- ەپيدەميولوگيالىق تالاپتار بۇزىلعان جاعدايدا جەكە تۇلعالار 30 ا ە ك نەمەسە 83340 تەڭگە (شامامەن 204 دوللار)، كاسىپكەرلىك سۋبەكتىلەرى 230 ا ە ك نەمەسە 638940 تەڭگە (شامامەن 1560 دوللار) جانە ودان جوعارى اكىمشىلىك جاۋاپكەرشىلىككە تارتىلادى. بۇعان دەيىن كوروناۆيرۋس بويىنشا كارانتين رەجيمىن بۇزعانى ءۇشىن 5 اەك كولەمىندە ايىپپۇل سالىندى»، - دەيدى ساراپشى.
ونىڭ ايتۋىنشا، كوپتەگەن ەلدەر ءوز ازاماتتارىن تارتىپكە كەلتىرۋ ءۇشىن وسى ءماجبۇرلى شارانى ەنگىزۋدە.
مىسالى، 29-ماۋسىمدا ازەربايجان پارلامەنتى سانيتارلىق-گيگيەنالىق جانە كارانتين رەجيمىن بۇزعانى ءۇشىن ايىپپۇل مولشەرىن بەكىتتى. جەكە تۇلعالار 200-400 مانات ارالىعىندا (100-200 دوللار)، لاۋازىمدى تۇلعالار - 3-4 مىڭ ماناتقا دەيىن (1500-2000 دوللارعا دەيىن) ايىپپۇل تولەيدى. الەۋمەتتىك جاۋاپكەرشىلىكتى ارتتىرۋ ماقساتىندا ازەربايجاندا ايىپپۇل سوماسى 2 ەسەگە ارتتى.
«ءبىرقاتار ەلدە ماسكا رەجيمىن بۇزعانى ءۇشىن دە ايىپپۇل سالىنادى. تۇركيادا 22-ماۋسىمنان باستاپ ماسكا كيۋ تالاپتارىن بۇزعانى ءۇشىن 900 ليرا (130 ا ق ش دوللارىنان استام) ايىپپۇل تولەيدى. ارگەنتينا قوعامدىق ورىنداردا ماسكانىڭ جوقتىعى ءۇشىن 500 مىڭ پەسوعا (شامامەن 7 مىڭ دوللار) ايىپپۇل سالۋعا نيەتتى. ۋكراينا ۇكىمەتى ازاماتتاردىڭ ماسكا كيۋ تالاپتارىن ورىنداماعانى ءۇشىن ارنايى جاۋاپكەرشىلىك بەلگىلەنەتىن زاڭ جوباسىن ماقۇلدادى»، - دەدى ق س ز ي وكىلى. كورشىلەس رەسەيدە ماسكا-قولعاپ رەجيمىن بۇزعانى ءۇشىن دە ايىپپۇل بەلگىلەنگەن: كولىكتە - 5 مىڭ رۋبل (70 دوللار)، كوشەلەر مەن ءۇي- جايلاردا - 4 مىڭ رۋبل (56 دوللار).
«يتاليا ۇكىمەتى دە كارانتيندى بۇزعاندارعا جازانى كۇشەيتۋ ماسەلەسىن تالقىلاۋدا، اتاپ ايتقاندا، ايىپپۇلدى 3000 ەۋروعا دەيىن ۇلعايتپاق. قازىرگى ۋاقىتتا يتالياداعى ايىپپۇل سوماسى 206 يەۆرونى قۇرايدى. ءبىز ءۇشىن دە قازىر الەۋمەتتىك قاشىقتىق، ماسكا رەجيمىن ساقتاۋ، ايىپپۇل سالۋعا جول بەرمەۋ اسا ماڭىزدى»، - دەدى الۋا جولدىبالينا.
ەسكە سالايىق، بۇگىن مەملەكەتتىك كوميسسيا ەپيدەميولوگيالىق جاعدايدى تۇراقتاندىرۋ جونىندەگى شارالاردى بەكىتكەن بولاتىن. وعان سايكەس، بيىلعى 5-شىلدەدەن باستاپ ەلىمىزدە 14 كۇنگە ءبىرقاتار شەكتەۋ شارالارىن ەنگىزۋ شەشىمى قابىلداندى. ال كارانتين تالاپتارىن بۇزعان جەكە جانە زاڭدى تۇلعالارعا ايىپپۇل سالىنادى. سونداي-اق بۇعان دەيىن ەۋروپا ەلدەرىندە پاندەمياعا بايلانىستى ەنگىزىلگەن تالاپتاردى بۇزعانى ءۇشىن قاراستىرىلعان ايىپپۇل سومالارىن جازعان ەدىك.
اۆتور: ايجان سەرىكجان قىزى