قاڭتار وقيعاسىنا قاتىستى 834 ادام سوتتالدى
16 تامىز 19:58

قاڭتار وقيعاسىنا قاتىستى 834 ادام سوتتالدى

نۇر-سۇلتان. قازاقپارات - قاڭتار وقيعاسىنا قاتىستى 834 ادام سوتتالدى.

بۇل تۋرالى ق ر باس پروكۋراتۋراسى 1-قىزمەت باستىعىنىڭ ورىنباسارى ەلدوس قيلىمجانوۆ ايتتى، دەپ حابارلايدى قازاقپارات ءتىلشىسى.

«جالپى ەلىمىز بويىنشا تەرگەۋ ورگاندارى 5300 دەن استام قىلمىستىق ءىستى تىركەدى. ولاردىڭ باسىم كوپشىلىگى - ۇرلىق، توناۋ، قارۋدى ساقتاۋ جانە وزگە دە قىلمىستار. تەرگەۋ امالدارىن جۇرگىزۋ ءۇشىن بارلىعى 1237 كۇدىكتى قاماۋعا الىندى»، - دەدى ول ورتالىق كوممۋنيكاتسيالار قىزمەتىندەگى بريفينگ بارىسىندا.

ونىڭ ايتۋىنشا، جەكە باسىن، دەنساۋلىق جاعدايىن سيپاتتايتىن ماتەريالداردى ەسكەرىپ، 284 ادامنىڭ قاماۋعا الىنۋى ەشقايدا كەتپەۋ تۋرالى قولحاتقا، كەپىل، ءۇي قاماققا جانە جەكە كەپىلگەرلىككە اۋىستىرىلدى.

«955 كۇدىكتى ادام ءىسى سوتقا بەرىلىپ، ءتۇرلى جازالارعا 834 ادام سوتتالدى. ونىڭ ىشىندە 636 ادامعا باس بوستاندىعىنان ايىرۋعا بايلانىستى ەمەس جازا كەسىلدى»، - دەدى ەلدوس قيلىمجانوۆ.

جاڭالىقتار