سەرگەي پەن: عىلىمعا 82 ميلليارد تەڭگە قارجى بولىنەدى، ال جالاقى - 136 مىڭ
«ونىڭ باستى سەبەبى - عالىمداردىڭ جالاقىسىنىڭ تومەندىگى. ەگەر باكالاۆريات، ماگيستراتۋرا، دوكتورانتۋرا تۇلەكتەرى عىلىممەن اينالىسقىسى كەلسە دە، ەكونوميكالىق جاعدايلار كەدەرگى كەلتىرەدى. قازىر دارىندى جاستاردى اكادەميالىق جولعا شاقىرۋ قيىن. ەلىمىزدە عىلىمعا 82 ميلليارد تەڭگەگە جۋىق قارجى بولىنەدى. سوعان قاراماستان عىلىم كوميتەتىنە قاراستى عىلىمي ۇيىمداردىڭ ورتاشا جالاقىسى 136 مىڭ تەڭگەنى قۇرايدى. مۇنداي جالاقى كىمگە كەرەك؟ دوللارمەن ەسەپتەسەك، بۇل جالاقى ءتىپتى 10 جىل بۇرىن دا از بولعان. ەلىمىزدەگى تىكەلەي قارجىلاندىرۋ جۇيەسىن عالىمداردىڭ ەڭبەكاقىسىن جوعارى جالاقى تولەنەتىن مەملەكەتتىك قىزمەتشىلەردىڭ ساناتىمەن تەڭەستىرەتىن نەمىستەردىڭ مودەلىنە كوشۋدى ۇسىنامىن»، - دەپ ءتۇسىندىردى سەرگەي پەن ADAL BILIM الاڭىنداعى تىكەلەي ەفيردە.
تالقىلاۋ بارىسىندا جاس عالىم ماقسات جاباعين دا وتاندىق عىلىم سالاسىن گرانتتىق قارجىلاندىرۋ تۇجىرىمداماسىن قايتا قاراۋدى ۇسىندى. اتالعان سالاداعى پروبلەمالاردى شەشۋدىڭ جولدارىن ۇسىنىپ، عالىمداردى تىكەلەي قارجىلاندىرۋدىڭ وزگە جولىن ۇسىندى.
«بىزدەگى گرانتتىق قارجىلاندىرۋ جۇيەسىندە ۇنەمى عالىمنىڭ ءوزى ەمەس، عىلىمي يدەياسى ءبىرىنشى ورىندا تۇرادى. سوندىقتان بولاشاقتا بۇل تۇجىرىمدامانى قايتا قاراستىرىپ، الدىڭعى ورىنعا عالىمداردى قويۋ قاجەت. PhD دارەجەسىن قورعاعانداردىڭ ءبارىنىڭ عىلىمي زەرتتەۋلەرىنە كونكۋرسسىز- اق العاشقى گرانتتارىن بەرۋ كەرەك. كەيىن ول كاسىبي تۇرعىدا داميدى جانە بىلىكتىلىگى ارتقان سايىن وعان كەلەسى گرانتتار بەرىلەدى. ەگەر ول قانداي دا ءبىر پوزيتسيالىق كەزەڭدە ءتيىستى تالاپتارعا ساي كەلمەي قالسا، گرانتتىق قارجىلاندىرۋ بويىنشا باسەكەلەستىك ورتاعا تۇسەدى. ياعني بۇل - عالىمداردى تىكەلەي قارجىلاندىرۋ جۇيەسىنىڭ بالاماسى»، - دەدى ق ر ب ع م ع ق «ۇلتتىق بيوتەحنولوگيا ورتالىعىنىڭ» ادام گەنەتيكاسى زەرتحاناسىنىڭ مەڭگەرۋشىسى ماقسات جاباعين.