تۇركىستان وبلىسىندا جاسى 80 نەن اسقان قاريا شاڭىراق كوتەردى
ەرلى-زايىپتى وسىدان 4 اي بۇرىن وتباسىن قۇرۋعا بەل بايلاعان. قارتتار ۇيىندە 10 جىلدان بەرى تۇرىپ كەلە جاتقان سالتانات ەشانقوجايەۆا جولداسىن كەزىكتىرگەنىنە قۋانىشتى ەكەنىن ايتتى. ءبىر-ءبىرىن تانىپ، شاڭىراق كوتەرگەندەرىنە 4 ايدان اسقان.
«دەمالىپ وتىرسام، قاسىما كەلىپ «مەنى سەنى ۇناتىپ قالدىم» دەدى. مەن سەنەن ۇلكەنمىن عوي دەسەم، «ەشتەڭە ەتپەيدى جاسىڭدى ءبولىسىپ الامىز» دەپ قالجىڭدادى»، - دەدى 2№ ارنايى الەۋمەتتىك قىزمەت كورسەتۋ ورتالىعىنىڭ تۇرعىنى سالتانات ەشانقوجايەۆا.
جاسىمىز 80 نەن اسسا دا ءوزىمىزدى سەرگەك سەزىنەمىز دەگەن ەرلى-زايىپتى قارتتار ۇيىندە ۋاقىتىمىز وتە كوڭىلدى وتەدى دەيدى.
«ماحاببات بولۋى كەرەك. سىيلاستىق بولعان سوڭ ماحاببات تا بولادى عوي»، - دەيدى 2№ ارنايى الەۋمەتتىك قىزمەت كورسەتۋ ورتالىعىنىڭ تۇرعىنى قاشىمبەك مۇساقۇلوۆ.
وبلىستىق 2№ ارنايى الەۋمەتتىك قىزمەت كورسەتۋ ورتالىعىندا 167 ادام بار. مەكەمە قىزمەتكەرلەرىنىڭ ايتۋىنشا، مۇندا ءبىر- ءبىرىن ۇناتىپ، وتاۋ قۇرعىسى كەلەتىندەر ءجيى كەزدەسەدى.
«ورتالىقتا 120 ەر، 54 ايەل جانە 49 مۇمكىندىگى شەكتەۋلى جان تۇرادى. قازىر كەلۋشىلەر سانى ازايدى. مەنىڭ مۇندا جۇمىس ىستەپ جاتقانىما 8 جىل بولدى. وسى ارالىقتا بايقاعانىم، كوبى وتباسىندا اجەلەر قايتىس بولعان سوڭ، اتاسىن كۇتە الماي، وسىندا الىپ كەلەدى»، - دەدى 2№ ارنايى الەۋمەتتىك قىزمەت كورسەتۋ ورتالىعىنىڭ قىزمەتكەرى داشتي كاريموۆ.
ايتا كەتەيىك، ورتالىقتا قاريالارعا بارلىق جاعداي جاسالعان. دەگەنمەن قارتتار ءۇيىنىڭ ءوز شاڭىراعىنداي بولا الماسى انىق. مۇنى ەسكەرگەن ماماندار، ورتالىقتى پانالاعانداردىڭ وتباسىنا ءتۇسىندىرۋ جۇمىسىن جۇرگىزگەن. ناتيجەسىندە، 7 قاريانى تۋىسى ۇيىنە قايتا الىپ كەتكەن.