استاناداعى قىسقى بال: ۇيىمداستىرۋشىلار قايىرىمدىلىق جوبالارعا 80 ميلليون تەڭگەدەن استام قارجى جينادى
جينالعان قاراجات قوردىڭ «ءار بالاعا لايىقتى مەكتەپ» جانە «جول ءجۇرۋ گرانتتارى» الەۋمەتتىك جوبالارىن جۇزەگە اسىرۋعا جۇمسالادى، دەپ حابارلايدى قازاقپارات ءتىلشىسى.
«بولاشاق» قورى قامقورشىلىق كەڭەسىنىڭ ءتوراعاسى دينارا گاپلان جۋرناليستەرگە جىل سايىنعى قىسقى قايىرىمدىلىق بالىن قور سوڭعى 10 جىل بويى وتكىزىپ كەلە جاتقانىن ايتتى. بالدى ۇيىمداستىرۋشىلار ءۇشىن - بۇل ەڭ الدىمەن كوپتەگەن كومپانيانىڭ قولداۋىمەن جەبەۋشىلىك جانە دەمەۋشىلىك اكتىسى. مۇنىڭ ءبارى دە سەرىكتەستەردىڭ ارقاسىندا عانا مۇمكىن بولىپ وتىر. بالدىڭ تۇپكىلىكتى ءمانى قوردىڭ ۆيزيت كارتاسىنا اينالعان دەبيۋتانتتاردىڭ ونەر كورسەتۋى عانا ەمەس، سونىمەن بىرگە جينالعان قاراجات ەسەبىنەن جۇزەگە اسىرىلاتىن باعدارلامالار دا.
«ءبىز ءۇشىن ەڭ الدىمەن قاراجات جيناۋ، سونىمەن قاتار قورىمىزدىڭ تاراپىنان جۇزەگە اسىرىلاتىن جوبالاردى قىسقاشا تانىستىرۋ دا وتە ماڭىزدى»، - دەدى دينارا گاپلان.
بيىل قازاقستان رەسپۋبليكاسى پرەزيدەنتى تەلەراديوكەشەنىنىڭ بەلسەندى اقپاراتتىق قولداۋىمەن ءوتىپ جاتقان قايىرىمدىلىق بالىنىڭ ارقاسىندا 10 جىلدىڭ ىشىندە 800 ميلليون تەڭگەدەن استام قاراجات جينالدى. «بولاشاق» قورى تۇسكەن قاراجاتقا 70 مامانداندىرىلعان وڭالتۋ مەكەمەسىن، ونىڭ ىشىندە قازاقستاننىڭ 22 قالاسىندا 46 ينكليۋزيۆتى قولداۋ كابينەتىن اشتى جانە جابدىقتادى. ينكليۋزيۆ سالاسىندا 500 دەن استام مامانداندىرىلعان جۇمىس ورنى اشىلدى. 3 مىڭ مامان مەن اتا-انا ينكليۋزيۆتى ءبىلىم بەرۋ مەن مىنەز-قۇلىقتى قولدانبالى سارالاۋ بويىنشا وقۋدان ءوتتى. از قامتىلعان وتباسىلاردان شىققان بالالارعا جانە ەرەكشە قاجەتتىلىگى بار ادامدارعا 93 جول ءجۇرۋ جانە 17 ءبىلىم بەرۋ گرانتتى تاعايىندالدى.
ۇيىمداستىرۋشىلاردىڭ اتاپ وتۋىنشە، ەرەكشە بالالاردىڭ قۇقىقتارىن جۇزەگە اسىرۋ ءۇشىن «بولاشاق» قورى ينكليۋزيۆتى ءبىلىم بەرۋ بولىگىندە ق ر زاڭنامالىق اكتىلەرىنە 70 تەن استام ساپالى ۇسىنىم مەن تۇزەتۋلەر ەنىگىزدى.
سونىمەن قاتار قوردىڭ قولداۋىمەن جىل سايىن ديسلەكسياسى مەن ديسگرافياسى بار 500 دەن استام بالا بىلىكتى مامانداردان كومەك الادى. حالىقارالىق گەندىك دەرماتوز جونىندەگى قاۋىمداستىققا وپەراتسيالار جاساۋعا، ارناۋلى كوسمەتيكالار ساتىپ الۋعا جانە جۇمىس ەرەكشەلىگى بۋللەزدى ەپيدەرموليزمگە (كوبەلەك بالالار) شالدىققان بالالارمەن جۇمىس ىستەۋ سانالاتىن قازاقستاندىق دارىگەرلەردىڭ ءبىلىمىن جەتىلدىرۋگە جاردەمدەستى.
جىلدان جىلعا كوپتەگەن كومپانيا الەۋمەتتىك جاۋاپكەرشىلىك تانىتىپ، بالدى ۇيىمداستىرۋعا قولداۋكورسەتىپ كەلەدى. وسى جىلداردىڭ ىشىندە بالدى وتكىزۋگە 150 دەن استام دەمەۋشى مەن سەرىكتەس قوسىلدى.
بىرەگەي لوتتار - ونەر تۋىندىلارى، انتيكۆارياتتار مەن سپورتتىق اتريبۋتيكالار ءباسساۋداسى كەشتىڭ شىرقاۋ شەگىنە اينالدى.
بيىل ساۋدا-ساتتىققا 1940-1950-جىلدارى قولدان توقىلعان كىلەم، «بورتە» قويىلىمى باس كەيىپكەرىنىڭ ساۋكەلەسى، ا ق ش- تىڭ 14-پرەزيدەنتى فرانكلين ءپيرستىڭ قولى قويىلعان 1856-جىلعى جەر ۋچاسكەسىن ۇسىنۋ تۋرالى قۇجات، 1911-جىلعى بۇكىل الەم حالىقتارى اندەرىنىڭ نوتا كىتابى، اسىل تۇقىمدى انگۋس ءىرى-قارا مالى جانە باسقا دا لوتتار شىعارىلدى.
داڭقتى «دوس-مۇقاسان» توبىنىڭ گيتاراسى ءباسساۋدانىڭ باستى لوتىنا اينالدى. مۋزىكالىق اسپاپتى ءانسامبلدىڭ نەگىزىن قالاعان دوسىم سۇلەيەۆ سىيعا تارتقان. ول ءدال وسى گيتارامەن «جان دوسىم» ءانىن شىعارعان ەدى. بىرەگەي گيتارا مەن «دوس-مۇقاسان» توبىنىڭ ۆينيلدى پلاستينكاعا جازىلعان العاشقى حيت اندەرى اۋكتسيوندا 11 ميلليون تەڭگەگە ساتىلدى. قور سەرىكتەستەرىنىڭ اتىنان تىگىلگەن باعالى سىيلىقتار ۇتىسى دا كەش قوناقتارىنىڭ كوڭىلىنە قۋانىش سىيلادى.
جالپى، ءار جىلدارى قىسقى قايىرىمدىلىق بالىنا الەكساندر ۆينوكۋروۆ، يليا يلين، گەننادي گولوۆكين سىندى وليمپيادا چەمپيوندارى مەن تانىمال سپورتشىلار قولداۋ كورسەتتى.
ۇيىمداستىرۋشىلاردىڭ ايتۋىنا قاراعاندا، بال تاريحىنداعى ەڭ قىمبات لوت رەجيسسەر اقان ساتايەۆتىڭ «توميريس» فيلمىندەگى رەكۆيزيت - تۇمار پاتشايىمنىڭ القاسى بولدى.
30 جۇپ دەبيۋتانتتاردىڭ جارقىن قويىلىمدارى بال قوناقتارىنىڭ كوڭىلىنەن شىقتى. قىسقى قايىرىمدىلىق بالدارىن قويۋشى-حورەوگراف، قازاق ۇلتتىق حورەوگرافيا اكادەمياسىنىڭ اعا وقىتۋشىسى، قازاقستان رەسپۋبليكاسىنىڭ ءبي سپورتى فەدەراتسياسىنىڭ مۇشەسى ەۆگەني مويسەيەۆپەن بىرگە ماماندىقتارى ءار ءتۇرلى جاستار بىرنەشە اي بويى بار ىقىلاسىن سالىپ جاتتىقتى.
ءداستۇرلى تۇردە بال دەبيۋتانتتاردىڭ ونەر كورسەتۋىمەن باستالادى. وسىدان كەيىن ءىس-شاراعا قاتىسۋشىلاردىڭ ءبارى ۆالس بيلەيدى.
قىسقى بال - بۇل ءمان-ماعىناسى بار ءىس-شارا. ءتىپتى دەبيۋتانتتاردى ىرىكتەۋدە، كاستينگ ۋاقىتىندا ۆولونتەرلىك قىزمەتتە تاجىريبەسى بار جاستارعا باسا نازار اۋدارىلادى. ولار سول ارقىلى قوردىڭ جۇيەلى جوبالارىنا قولداۋ كورسەتەدى، دەپ اتاپ وتەدى ۇيىمداستىرۋشىلار.
بال دەبيۋتانتتارىنىڭ ءبىرى، 24 جاستاعى دياس مىرزاليەۆ مۇنداي ءىس-شاراعا العاش رەت قاتىسقان.
«تارازدىڭ تۋماسىمەن، استانادا تۇرىپ جاتقانىما 2 جىل بولدى. ستۋدەنت كەزىمدە، سوناۋ 2017-جىلى-اق بالعا قاتىسقىم كەلگەن ەدى. ءبىراق، الماتىدا وقىپ جۇرگەندىكتەن ءساتى تۇسپەدى. استاناعا قونىس اۋدارا سالىسىمەن الەۋمەتتىك جەلىلەر ارقىلى ءجىتى قاداعالاي باستادىم. بيىل جارنامانى كوز شالعان ساتتەن-اق تىركەلدىم. بوسقا دايىندالمادىق، سەنىمدى بيلەپ شىقتىق. ەڭ الدىمەن ۇلكەن ءبىر ءىستىڭ، قايىرىمدىلىق شارانىڭ بولىگى بولعىم كەلدى. بۇل ءىس-شارا كوپتەگەن بالاعا كومەكتەسەدى»، - دەدى دياس.
ينكليۋزيۆتى ءبىلىمدى جانە تالانتتى جاستاردى قولداۋ ماقساتىندا وتكەن قايىرىمدىلىق بالىندا 80 ميلليون تەڭگەدەن استام قاراجات جينالدى.
جينالعان قاراجات قوردىڭ «ءار بالاعا لايىقتى مەكتەپ» جانە «جول ءجۇرۋ گرانتتارى» الەۋمەتتىك جوبالارىن جۇزەگە اسىرۋعا جۇمسالاتىن بولادى. قايىرىمدىلىق قاراجاتىنىڭ قايدا جاراتىلىپ جاتقانى اشىق بولۋى ءۇشىن قوردىڭ bolashakcharity.kz سايتىندا قارجىلىق ەسەپ-قيساپ جاريا ەتىلەدى.
«ينكليۋزيا - بۇل قاراپايىم مەكتەپتە وقيتىن اۋتيزمى بار بالالاردىڭ قۇقىقتارى عانا ەمەس. بۇل داۋن سيندرومى، سال ارۋىنا شالدىققان بالالاردىڭ، يمميگرانت بۇلدىرشىندەردىڭ، ومىرلىك قيىن جاعدايعا تاپ بولعان جانە وزگە دە ساناتتاعى بالالاردىڭ دا قۇقىقتارى. ق ر كونستيتۋتسياسىنا جانە بارلىق ادامزات زاڭدارىنا سايكەس، ءار بالادا ساپالى ءبىلىم الۋ جانە دارىنىن دامىتۋ مۇمكىندىگى بولۋى ءتيىس. ءبىلىم - شىن مانىندە سالىم سالۋدى قاجەت ەتەتىن سالا. ويتكەنى، بولاشاق ءبىلىمدى ۇلتتىڭ ارقاسىندا قالىپتاسادى»، - دەپ اتاپ وتەدى قوردان.
2022-جىلعى XIII قىسقى قايىرىمدىلىق بالى اقپاراتتىق سەرىكتەستەرىنىڭ ءبىرى «قازاقپارات» حالىقارالىق اقپارات اگەنتتىگى مەن Jibek Joly تەلەارناسى بولدى.