الماتىلىق دارىگەرلەر 80 جاستاعى كەيۋانانىڭ باس ميىنا وتە كۇردەلى وپەراتسيا جاسادى
اۋرۋحانا باسپا ءسوز قىزمەتىنىڭ مالىمەتىنشە، ناۋقاستى مامىردىڭ 15 ى كۇنى №4-قالالىق كلينيكالىق اۋرۋحانانىڭ قابىلداۋ بولىمشەسىنە جەدەل جاردەم بريگاداسى الىپ كەلدى. ناۋقاس سويلەۋ قابىلەتىنىڭ بۇزىلۋىنا، بەت اسيممەترياسىنا، سول جاق اياق-قولدارىنىڭ السىزدىگى مەن ۇيۋىنا، جالپى السىزدىككە شاعىمداندى. كەيۋاناعا مي ارتەريالارىنىڭ ترومبوزىنان تۋىنداعان تسەرەبرالدى ينفاركت دياگنوزى قويىلىپ، شۇعىل تۇردە جانساقتاۋ بولىمىنە جاتقىزىلدى.
«ەمدەۋ ءادىسىن تاڭداعان كەزدە ناۋقاستىڭ جاسىن ەسكەردىك. كلينيكالىق دياگنوستيكالىق جانە زەرتحانالىق زەرتتەۋلەر جۇرگىزىلدى، ونىڭ ىشىندە باس ميعا كت، قان تامىرلارىن ۋلترادىبىستىق زەرتتەۋ، رەنتگەن، ەكگ جاسالدى. تەراپيەۆت، كارديولوگ، نەيروحيرۋرگ، انەستەزيولوگ- رەانيماتولوگ ماماندار ناۋقاستى قاراپ شىقتى. وتا جاساۋ شەشىمى قابىلداندى: باس جانە مويىن تامىرلارىنىڭ وبسترۋكتسياسىن ەندوۆاسكۋليارلىق جويۋ - سەلەكتيۆتى تسەرەبرالدى انگيوگرافيا جاسالدى. وڭ جاق ورتاڭعى مي ارتەرياسىنىڭ م1 سەگمەنتىندەگى ترومبتاردى ءبىر مەزگىلدە ترومبواسپيراتسيالاۋمەن (ساقتاۋ تەحنيكاسى) رەنتگەندىك ەندوۆاسكۋليارلىق مەحانيكالىق ترومبوەكستراكتسيا جاسالدى»، - دەيدى №4-قالالىق كلينيكالىق اۋرۋحانانىڭ نەيروحيرۋرگيا بولىمشەسىنىڭ مەڭگەرۋشىسى نۇرجان اجىبەكوۆ.
دارىگەردىڭ سوزىنشە، ناۋقاستىڭ مي تامىرلارىنا جاسالعان وپەراتسيا 50 مينۋتقا سوزىلدى.
«وتادان كەيىن جاعدايى تۇراقتالعانشا ناۋقاس جانساقتاۋ بولىمىندە كەزەكشى مەديتسينا قىزمەتكەرلەرىنىڭ قاتاڭ باقىلاۋىندا بولدى. جاعدايى تۇراقتالعاننان كەيىن ودان ءارى ەمدەلۋ ءۇشىن نەيروحيرۋرگيا بولىمىنە اۋىستىرىلدى»، - دەپ قورىتىندىلادى ەمدەۋشى دارىگەر الدوعار باقتيار ۇلى. بۇگىنگى كۇنى اۋرۋحانادا 8 كۇن ەم العان زادا بايىمبەتوۆا ساۋىعىپ ۇيگە شىعۋعا دايىندالىپ جاتىر. «قىزىما قوناققا قىزىلوردادان كەلدىم. كەنەت جاعدايىم ناشارلاپ، قول-اياعىم ۇستاماي، شۇعىل تۇردە وسى اۋرۋحاناعا ءتۇستىم. جاقسى دارىگەرلەردى كەزدەستىرگەنىم ءۇشىن جاراتقانعا العىسىم شەكسىز. وتادان كەيىن قول-اياعىم قايتادان دۇرىس ىستەيدى، ءوز بەتىممەن جۇرە الامىن، قولىمدى كوتەرە الامىن. اۋرۋحانا ۇجىمىنا مىڭ العىس»، - دەيدى زادا بايىمبەتوۆا.
اۆتور: الما مۇقانوۆا