ەلدەن 80 مىڭنان استام مەديتسينالىق قولعاپتى شىعارماق بولعاندار ۇستالدى
ەلىمىزدە كوروناۆيرۋس ينفەكتسياسىنىڭ تارالۋىنا جول بەرمەۋ جونىندەگى ق ر پرەمەر-ءمينيسترىنىڭ وكىمى بار. سوعان سايكەس، مەديتسينالىق جانە جەكە قورعانىش قۇرالدارىن ەلدەن سىرتقا شىعارۋعا تىيىم سالىنعان.
«قوستاناي وبلىسى ەكونوميكالىق تەرگەۋ دەپارتامەنتى قىزمەتكەرلەرىنىڭ جەدەل-ىزدەستىرۋ شارالارى ناتيجەسىندە شەكارا بەكەتىندە مەديتسينالىق قولعاپتاردى سىرتقا تاسىمالداماق بولعان اۆتوكولىك ۇستالدى. مەملەكەتتىك كىرىستەر ورگاندارىنىڭ تەكسەرىسى بارىسىندا كولىك يەسىندە ءتيىستى قۇجاتى بولماعان. 41 قوراپ مەديتسينالىق قولعاپ تابىلدى. بارلىعى 80400 دانا تاركىلەندى. اتالعان ءىس ماتەريالدار مەملەكەتتىك كىرىستەر ورگاندارىنا جىبەرىلدى. جەكە تۇلعالاردى اكىمشىلىك جاۋاپكەرشىلىككە تارتۋ ءۇشىن ۇسىنىم حات جولداندى»، دەلىنگەن قوستاناي وبلىسى ەكونوميكالىق تەرگەۋ دەپارتامەنتىنىڭ باسپا ءسوز حابارلاماسىندا.
ەندى مەديتسينالىق قولعاپتارعا قاتىستى شەشىمدى وكىلەتتى ورگاندار شىعارادى.