ەلوردانىڭ ءتارتىپ ساقشىلارى 80 كەلى ماريحۋانا ساتپاق بولعان كۇدىكتىنى قولعا ءتۇسىردى

نۇر-سۇلتان. قازاقپارات - نۇر-سۇلتان قالاسى پوليتسيا دەپارتامەنتى ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى ەلوردا اۋماعىنا ەسىرتكى اكەلىپ، وتكىزۋمەن اينالىساتىن ادامداردى ۇستاۋ بويىنشا جەدەل-ىزدەستىرۋ ءىس-شارالارىن وتكىزدى، دەپ حابارلايدى قازاقپارات اتالعان ۆەدومستۆوعا سىلتەمە جاساپ.

«جەدەل ىزدەستىرۋ ءىس-شارالارى بارىسىندا ابىلاي حان داڭعىلىنىڭ بويىنداعى تۇرعىن ءۇي-جايعا ءتىنتۋ جۇرگىزۋ كەزىندە بۇرىن بىرنەشە رەت سوتتالعان 49 جاستاعى جامبىل وبلىسىنىڭ تۇرعىنى ۇستالدى. ودان سالماعى 80 كەلىدەن اساتىن «ماريحۋانا» تابىلىپ، تاركىلەندى. بۇل 40000 رەتتەن استام قولدانۋعا بولاتىن دوزانى قۇرايدى»، - دەپ حابارلايدى قالالىق پوليتسيا دەپارتامەنتى.

حابارلامادا ايتىلعانداي، كۇدىكتى اتالعان ەسىرتكىنى ساتپاقشى بولعان.

«اتالعان فاكتى سوتقا دەيىنگى تەرگەپ-تەكسەرۋدىڭ ءبىرىڭعاي تىزىلىمىنە تىركەلدى. قازىرگى ۋاقىتتا ۇستالعان ادام ۋاقىتشا ۇستاۋ يزولياتورىنا قامالدى. وسى ىسكە قاتىسى بار ادامداردى انىقتاۋ جانە ۇستاۋ بويىنشا ءىس-شارالار جۇرگىزىلۋدە»، - دەلىنگەن حابارلامادا.

جالپى جىل باسىنان بەرى ەلوردا پوليتسەيلەرى 150 كەلىدەن استام ءتۇرلى ەسىرتكى قۇرالدارىن تاركىلەگەن. «ەسىرتكىنى وتكىزۋ» بابى بويىنشا 73 جانە سونداي-اق ءتۇرلى ەسىرتكى قۇقىق بۇزۋشىلىقتارى بويىنشا 370 قىلمىستىق ءىس قوزعالدى.