اتىراۋدا فاريزا وڭعارسىنوۆانىڭ 80 جىلدىعى اتالىپ وتۋدە

None
None
اتىراۋ. قازاقپارات - اتىراۋدا اقىن فاريزا وڭعارسىنوۆانىڭ 80 جىلدىعىنا ارنالعان «پاتشا - ءسوزدىڭ فاريزاسى» اتتى رەسپۋبليكالىق اپتالىق ءوتىپ جاتىر، دەپ حابارلايدى قازاقپارات ءتىلشىسى.

شارا اقىننىڭ ەسكەرتكىشىنە گۇل شوقتارىن قويۋدان باستالىپ، ح. دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىندە جالعاسىن تاپتى.

«ار مەن اقىن» دەرەكتى فيلمىنىڭ تۇساۋى سوندا كەسىلىپ، «جىر - مەنىڭ جالعىز تارلانىم» اۋديوديسكىسى تانىستىرىلدى.

اقىننىڭ ءوزى وقىعان ولەڭدەر جازىلعان اۋديوديسكىنى بەلگىلى جازۋشى انەس ساراي مەن اتىراۋ مەملەكەتتىك ۋنيۆەرسيتەتىنىڭ پروفەسسورى قادىر وتەگەن ۇلى جالپاق جۇرتقا ۇسىندى.

اپتالىق اياسىندا «پاتشا -  ءسوزدىڭ فاريزاسى» اتتى عىلىمي-پراكتيكالىق كونفەرەنتيا دا ۇيىمداستىرىلدى. وعان وبلىس اكىمىنىڭ ورىنباسارى ايگۇل اجىعاليەۆا قاتىسىپ، شارانىڭ ۇلكەن ماڭىزىن اتاپ ءوتتى.

«فاريزا وڭعارسىنوۆا - اتىراۋ جەرىندە تۋعان. قازىرگى ح. دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىنىڭ العاشقى قارلىعاشتارىنىڭ ءبىرى. ول ءسوز ونەرىنىڭ قاس شەبەرى، اسقان دارىن يەسى. ونىڭ شىعارماشىلىعىنىڭ ءمانى مەن ەرەكشەلىكتەرىن تولىق اشۋ قيىننىڭ قيىنى. ونىڭ تۋىندىلارى - قازاقتىڭ اقىن قىزدارى شىعارماشىلىعىنىڭ بيىگى. اقىننىڭ ولەڭدەرى - ماڭگىلىك»، - دەدى ا. اجىعاليەۆا.

سوڭعى جاڭالىقتار