قازاقستاننان وڭتۇستىك كورەيا ساتىپ الاتىن تاۋاردىڭ 80 پايىزى مۇناي
بۇل تۋرالى وڭتۇستىك كورەيالىق حالىقارالىق ساۋدا قاۋىمداستىعى مالىمدەدى. قۇجات پرەزيدەنت مۋن چجە ين نۇر- سۇلتانعا مەملەكەتتىك ساپارمەن كەلەر الدىندا بەكىتىلدى. قازاقستاندىق قارا التىنعا سۇرانىس نەلىكتەن ءوستى؟
وڭتۇستىك كورەيا قازاقستاننان ساتىپ الاتىن تاۋاردىڭ 80 پروتسەنتى - مۇناي. بۇل مالىمەتتى كورەي حالىقارالىق ساۋدا قاۋىمداستىعى جاريالادى. ساراپشىلار ونى ا ق ش- تىڭ يرانعا قارسى سانكسيالار ەنگىزىلۋىمەن بايلانىستىرادى. ويتكەنى امەريكا شەكتەۋ سالار الدىندا وڭتۇستىك كورەيالىق كومپانيالار قارا التىندى يسلام رەسپۋبليكاسىنان الىپ وتىردى.
زەرتتەۋشىلەردىڭ مالىمەتىنە ساي، ەلىمىز مۇناي ءوندىرۋ بويىنشا الەمدە ون ەكىنشى ورىندا، ۋران وندىرۋدەن ءبىرىنشى كەلەدى، ال كادميي قورى جاعىنان بەسىنشى تۇر. توت باسپايتىن بولاتتى جاساۋ ءۇشىن قاجەت قازاقستاندىق فەرروحرومعا دا وڭتۇستىك كورەيالىقتاردىڭ قىزىعۋشىلىعى مول.
كيم حەن سۋ، كورەيا حالىقارالىق ساۋدا قاۋىمداستىعىنىڭ ساراپشىسى:
- 2017 -جىلعا دەيىن قازاقستاننان مۇناي يمپورتىنىڭ كولەمى از بولدى، كەيىن 27 ميلليوننان 55 ميلليون باررەلگە ءوستى. ءبىز العان CPCBlend كاسپي قۇبىر كونسورتسيۋمى مۇنايىنىڭ ساپاسى وتە جاقسى. 2018 -جىلى قازاقستاننان شيكى مۇنايدى 1 ميلليارد 100 ميلليون دوللارعا ساتىپ الدىق، بۇل قازاقستاننان كورەياعا اكەلەنگەن ونىمدەردىڭ سەكسەن پايىزىن قۇرايدى.
سوڭعى بەس جىلدا وڭتۇستىك كورەيادان قازاقستانعا جەتكىزىلگەن تاۋارلاردىڭ ىشىندە اۆتوكولىكتەر ءبىرىنشى ورىندا تۇر. قاۋىمداستىق ماماندارىنىڭ ايتۋىنشا، ساتۋ كورسەتكىشتەرى بويىنشا جاپوندىق جانە رەسەيلىك برەندتەردەن كەيىن وڭتۇستىك كورەيالىق كولىكتەرگە سۇرانىس كوپ. سونداي- اق تاڭعى سامال ەلىنەن شىققان كوسمەتيكا ونىمدەرىنىڭ تانىمالدىعى ءوسىپ كەلەدى. وتكەن جىلى قازاقستاندىقتار شامامەن جيىرما ءۇش ميلليون دوللارعا كرەم ساتىپ العان. قازاق ەلى وڭتۇستىك كورەيانىڭ ازىق- تۇلىك ونىمدەرىنە دە قىزىعۋشىلىق تانىتىپ وتىر.
كيم حەن سۋ، كورەيا حالىقارالىق ساۋدا قاۋىمداستىعىنىڭ ساراپشىسى:
- كورەيادان قازاقستانعا قۇرعاق كىلەگەيدىڭ ەكسپورتى ءوسىپ، 7,5 دوللارعا جەتتى، ال كەسپە ساتىلىمى 4 ميلليون 200 مىڭ دوللاردى قۇرادى. قازاقستاندىق كىلەگەي نارىعىندا كورەيا كومپانياسىنىڭ ۇلەسى - 71 پايىز. قازاقستاندىقتار اراسىندا كورەي مەديتسيناسى تانىمال. سوندىقتان ساراپشىلار مەديتسينالىق قۇرال- جابدىقتار ساتىلىمى ارتادى دەپ بولجايدى. سونداي- اق كورەيانىڭ اۋىل شارۋاشىلىق تەحنيكاسى مەن تەحنولوگياسىنا سۇرانىستىڭ ارتۋى كۇتىلەدى.
تاڭعى سامال ەلى كولىكتىك- لوگيستيكالىق جوبالارعا ۇلكەن قىزىعۋشىلىق تانىتىپ وتىر. ونى ساراپشىلار وڭتۇستىك كورەيالىق كومپانيانىڭ قازاقستانداعى ءساتتى تاجىريبەسىمەن بايلانىستىرادى. وتكەن جىلى ول ۇلكەن الماتى اينالما جولىنىڭ قۇرىلىسىن باستادى.
بىلتىر قازاقستان مەن كورەيا اراسىنداعى تاۋار اينالىمى رەكوردتىق كورسەتكىشكە جەتىپ، 3,8 ميلليارد دوللارعا جۋىقتادى. ايتا كەتەيىك، بۇل مەملەكەت كەمە قۇراستىرۋدا الەمدە كوش باستاپ تۇر. كولىك وندىرىسىندە 6-ورىنعا جايعاسقان. بىلتىر وڭتۇستىك كورەيا قازاقستاننان 3 ميلليارد- قا جۋىق دوللاردىڭ ءونىمىن ساتىپ الدى. كورەيلەر تاراپىنان قازاقستاندىق فەرروقۇيما، تيتان، ۋران، بولات، تەمىر، التىن مەن مۇنايعا سۇرانىس بار.
يمپورت تا ايتارلىقتاي، 900 ميلليون دوللاردان استى. بىزگە كورەيا وندىرىسىندەگى سىمدار مەن شوعىرسىمدار، مەتالل ونىمدەرى مەن كولىك جابدىقتارى قاجەت. بۇگىندە ەلىمىزدە 421 ورتاق كاسىپورىن جۇمىس ىستەپ تۇر.
www.24.kz