ماڭعىستاۋلىق جاستار 80 جاستاعى قارياعا ءۇي سالىپ بەردى
«اقتاۋدىڭ قايىرىمدى جاندارى» اتتى ەرىكتىلەر توبى باستاماشى بولعان اسارعا جۇزدەگەن جاس اتسالىسقان. ءبىرى شاتىرىن اكەلىپ بەرسە، ەندى ءبىرى كىرپىشىن قالاۋعا جاردەمدەستى. ساتىبالدى الايەۆ قيراعالى تۇرعان ءۇيدى وسىدان 50 جىل بۇرىن ءوزى تۇرعىزعان ەدى. سوڭعى جىلدارى قابىرعاسى سوگىلىپ، شاتىرىنان سۋ اعا باستاعان. قاپتاعان سارى قۇمىرسقالار ەدەن مەن قابىرعانى تەسىپ، جەپ تاستاعان. ءۇيدى جاڭارتۋعا 80-نەن اسقان قاريانىڭ شاماسى كەلمەسى انىق. ءۇمىت ارتىپ وتىرعان جالعىز ۇلىنىڭ دەنساۋلىعى تاعى جوق، ەڭبەككە جارامسىز.
السۇلۋ وتەشقاليەۆا، ەرىكتىلەر توبىنىڭ بەلسەندى مۇشەسى:
- ءبىز اتامىزعا ازىق- تۇلىك اكەلىپ، كومەكتەسىپ تۇراتىن ەدىك. كەلىپ جۇرگەن كەزدە اتانىڭ جاعدايىن كورىپ، بارلىعىمىز «ءۇي سالىپ بەرەيىك» دەگەن شەشىمگە كەلدىك. وسى شەشىمىمىزدى حالىق قولداپ، بارلىعى ءۇي جابدىقتارىمەن كومەكتەسىپ، ەكى ايدا ءۇي سالىپ بەردىك.
ەرىكتىلەر توبىنىڭ باستاماسىن ءوڭىردىڭ جاستارى ءىلىپ اكەتتى. مامىر ايىندا باستالعان قۇرىلىسقا جۇزگە جۋىق ادام اتسالىسقان. كاسىپكەر جاستاردان باستاپ، قاراپايىم تۇرعىندارعا دەيىن قول ۇشىن بەردى. ءبىرى تاسىن ءتۇسىرىپ، ەندى ءبىرى شاتىرىن اكەپ بەرسە، تاعى ءبىرى ءۇيدى سالىپ، قابىرعاسىن سىلاعان. قايىرىمدى جاندار ءۇي ىشىندەگى جيھازىنا دەيىن الىپ بەرگەن. اۋىلدىڭ قىز- كەلىنشەكتەرى كورپە- توسەگىن تىگىپ بەرگەن. ەكى بولمەلى جاڭا ۇيگە قونىستانعان قاريانىڭ قۋانىشىندا شەك جوق.
ساتىبالدى الايەۆ، زەينەتكەر:
- قايىرىمدى جاندارعا كوپ راقمەت. العىسىم شەكسىز بالالارعا.
بابالارىمىزدىڭ اسارلاتۋ ءداستۇرىن جاڭعىرتۋدى كوزدەگەن ماڭعىستاۋلىق جاستاردىڭ بۇل - العاشقى جوباسى. ءتۇرلى ماماندىق يەلەرىنەن قۇرىلعان ەرىكتىلەر توبى الداعى ۋاقىتتا باسپاناعا اسا مۇقتاج جاندارعا ءۇي سالىپ بەرۋدى جالعاستىرماق نيەتتە.
www.24.kz