اسقار جۇماعاليەۆ ەلەكتروندىق دەنساۋلىق پاسپورتى حالىقتىڭ 80 پايىز بولۋىن تاپسىردى
«جوبانى بەلسەندى جانە كاسىبي تۇردە ىسكە قوسىپ جاتقاندارىڭىز بايقالادى. بۇل جۇمىستى جالعاستىرۋ كەرەك. قازىر نەگىزگى جۇمىستار جۇرگىزىلىپ جاتىر. جەرگىلىكتى دەڭگەيدە كومپيۋتەرلەر ساتىپ الىنىپ، اقپاراتتىق جۇيەلەر دامۋدا. سوندىقتان اتالعان جۇيەلەردىڭ دۇرىس جۇمىس ىستەۋىن قامتاماسىز ەتۋ ماڭىزدى. مۇنى جىل سوڭىنا دەيىن اياقتاۋ كەرەك»، - دەدى اسقار جۇماعاليەۆ تانىستىرۋ راسىمىندە.
ۆيتسە- پرەمەردىڭ ايتۋىنشا، جۇيەنى ىسكە قوسقاننان كەيىن دارىگەرلەر مەن پاتسيەنتتەردى وقىتۋ كەرەك. سونىمەن قاتار ەلەكتروندىق پاسپورتتى تولىقتىرۋ قاجەت.
«قازىر ەلىمىزدەگى كەي ازاماتتاردا ەلەكتروندىق پاسپورت بار ەكەنىن بىلەمىن. الايدا كورسەتكىشتى 80 پايىزعا جەتكىزۋ كەرەك. قازىر زاڭعا وزگەرىستەر ەنگىزۋ بويىنشا جۇمىس ىستەپ جاتىرسىزدار. اتالعان جۇيە 2019 -جىلدىڭ 1 - قاڭتارىندا جۇمىس ىستەۋى ءتيىس»، - دەپ تاپسىرما بەردى ۆيتسە- مينيستر.
ق ر دەنساۋلىق ساقتاۋ ءمينيسترى ەلجان ءبىرتانوۆ دەنساۋلىق ساقتاۋ سالاسىندا اقپاراتتىق تەحنولوگيالار كەڭىنەن ەنگىزىلىپ جاتقانىن اتاپ ءوتتى.
«قازىر جاڭا سەگمەنتتى - پاتسيەنتتەرگە ارنالعان موبيلدى قوسىمشالاردى بەلسەندى دامىتىپ جاتىرمىز. بۇل قوسىمشالار ەمحانالار مەن مەديتسينالىق اقپاراتتىق جۇيەلەرمەن بايلانىستىرىلعان. ياعني، قازىرگى تاڭدا ءجۇزمىڭداعان ادام موبيلدىك قوسىمشانى قولدانادى - جۇكتى ايەلدەر مەن قانت ديابەتىنە شالدىققاندار جەكەلەگەن قوسىمشالاردى جۇكتەپ الىپ، باقىلاۋعا تۇرا الادى. ءبىز ءۇشىن ماڭىزدى تاعى ءبىر جايت - اۋرۋلاردى ەسەپكە الۋ. ماسەلەن، انا ءولىمى بويىنشا: ايەل استانادا بوسانىپ، ۇيىنە قايتادى. ەكى اپتادان سوڭ، قىزۋى كوتەرىلىپ، سەپسيسپەن اۋرۋحاناعا تۇسەدى. وعان دياگنوز قويعاندا، جۇكتىلىگى ەسەپكە الىنبايدى. مۇنداي جاعداي بىرنەشە رەت كەزدەستى، شىن مانىندە ستاتيستيكانىڭ باسقاشا ەكەنىن كوردىك. ال قازىر ەلەكتروندىق پاسپورت ارقىلى بارلىق اۋرۋ تاريحىن كورۋگە بولادى. ەندى پاتسيەنتتىڭ دياگنوزىن جوعالتىپ الۋ، قانداي دا ءبىر جايتتاردى جاسىرىپ قالۋدان ارىلامىز. بۇل مەديتسينالىق كومەك ساپاسىنا ەلەۋلى اسەر ەتەدى»، - دەپ اتاپ ءوتتى مينيستر.
اۆتور: ايجان سەرىكجان قىزى