قازالىدا 80 جاستاعى جەلاياق قاريا تۇرادى
تەمىرجول سالاسىنىڭ ارداگەرى اققويان ىرساليەۆ جاستايىنان سالاۋاتتى ءومىر سالتىن ۇستانادى. وقۋشى كەزىندە بوكسپەن اينالىسقان. ال وتان الدىنداعى ازاماتتىق بورىشىن اۋە- دەسانت اسكەرى قاتارىندا وتەپ، پاراشيۋتپەن 281 رەت سەكىرگەن ەكەن. كۇنى بۇگىنگە دەيىن ءوزىن جاعىمسىز ادەتتەردەن اۋلاق ۇستاپ كەلەدى جانە ارداگەرلەر اراسىندا وتەتىن دويبى، شاحمات، نىسانا كوزدەۋ، جۇگىرۋ جارىستارىنا تۇراقتى تۇردە قاتىسىپ، جۇلدەلى ورىندار الىپ ءجۇر. سونداي- اق، كۇن سايىن تاڭەرتەڭ جۇگىرىپ، جاتتىعۋ جاسايدى.
«1988-جىلى قاپال-اراسان شيپاجايىندا دەمالدىم. سوندا قايراتكەر دىنمۇحامەد قونايەۆ تا دەمالىپ جاتىر ەكەن. ول كىسىمەن تانىستىم. زيالى، سالماقتى ادام. ەكەۋمىز كۇندە ەكى شاقىرىم جۇگىرەتىن بولىپ كەلىستىك. وسىنداي ۇلى اداممەن قىسقا ۋاقىت بولسا دا ديدارلاسىپ قالعانىما قۋانامىن. ال 2011 -جىلدان بەرى الماتى مارافونىنا قاتىسىپ ءجۇرمىن. مارافونشىلار ءارتۇرلى ديستانسيا بويىنشا جۇگىرەدى. مەن وتكەن جىلعى مارافوندا 22 شاقىرىمدى باعىندىردىم. 70 جاستان اسقان ادامدار اراسىنان ءبىرىنشى ورىندى جەڭىپ الدىم. ال بيىلعى الماتى حالىقارالىق مارافون جارىسىندا 1780- بولىپ تىركەلىپ، 21 شاقىرىمدى 3 ساعات 15 مينۋتتا جۇگىرىپ ءوتتىم. ءسويتىپ، التىن مەدالعا يە بولدىم. مەدالدى قالا اكىمى باۋىرجان بايبەك تاپسىردى. باسقا دا جەتىستىكتەرىم جەتەرلىك. مۇنىڭ ءبارى تىڭعىلىقتى دايىندىقتىڭ ارقاسى. سەبەبى، كۇن سايىن كەمىندە 10 شاقىرىم جۇگىرەمىن، ال مارافوننىڭ الدىندا 30 شاقىرىمدى باعىندىرامىن»، - دەدى اققويان ىرساليەۆ.
قازالى اۋداندىق ارداگەرلەر كەڭەسىنىڭ ءتوراعاسى ورازعالي بەكبانوۆ جەلاياق قاريانىڭ شاپشاڭ قوزعالاتىنىن، كوڭىلى سەرگەك، مىنەزى ەلگەزەك ەكەنىن ايتادى.
«مارافون جارىسىنا اققوياندى شىعارىپ سالاردا «سىر ءوڭىرىنىڭ نامىسىن قورعاۋعا بارا جاتقان جالعىز ارداگەرسىڭ، ورىن الىپ كەلەتىنىڭە سەنەمىن» دەپ ءۇمىت ارتقانمىن. سەنىمدى اقتاپ، ءبىزدى قۋانتىپ تاستادى. سپورتتى سەرىك ەتكەن، قايرات-جىگەرى مىقتى وسىنداي قاريالار جاستارعا ۇلگى بولادى»، - دەيدى و. بەكبانوۆ.
سارسەنقۇل نازار