سامۇرىق- قازىنادا 800-گە جۋىق شەتەلدىك ازامات ەڭبەك ەتەدى
6 قازان, 14:50

سامۇرىق- قازىنادا 800-گە جۋىق شەتەلدىك ازامات ەڭبەك ەتەدى

استانا. قازاقپارات - «ەلىمىزگە كەلىپ جاتقان رەسەي ازاماتتارى «سامۇرىق- قازىنا» قورى جانە وعان قاراستى كومپانيالاردا جۇمىس ىستەي الا ما؟». بۇل ماسەلەگە قوردىڭ قوعاممەن بايلانىس جانە وزگەرىستەردى باسقارۋ جونىندەگى ديرەكتورى عيبرات اۋعانوۆ تۇسىنىك بەردى، دەپ حابارلايدى قازاقپارات ءتىلشىسى.

«رەسەي ازاماتتارىنا قاتىستى تىيىم جوق. ەگەر ازاماتتىڭ جۇمىس ىستەۋگە رۇقساتى بولسا، تالاپقا سايكەس كەلسە، تەك قانا «سامۇرىق- قازىنا» ەمەس، باسقا دا كومپانيادا جۇمىس ىستەي الادى. HR قازاقستاننىڭ ەڭبەك زاڭناماسىنا ساي جۇمىس ىستەيدى. رەسەي ازاماتتارى اراسىندا قابىلەتتى كانديدات بولسا، ولار بوس جۇمىس ورنىنا جاريالانعان بايقاۋعا قاتىسا الادى»، - دەدى عيبرات اۋعانوۆ اتالعان ۆەدومستۆودا وتكەن باسپا ءسوز ءماسليحاتىندا.

ونىڭ ايتۋىنشا، بۇگىندە قوردا 800-گە جۋىق شەتەل ازاماتى ەڭبەك ەتىپ جاتىر.

«سامۇرىق- قازىنا قورىندا جالپى سانى 250 مىڭنان استام ادام جۇمىس ىستەيدى. ونىڭ ىشىندە 749-ى - شەتەلدىك مامان. اتاپ ايتقاندا، شەتەل ازاماتتارىنىڭ 613- ءى - وندىرىستىك، ال 133- ءى اكىمشىلىك- باسقارۋ پەرسونالى»، - دەيدى ول.

سونداي- اق «سامۇرىق- قازىنا» وكىلى قورعا قاراستى بارلىق كومپانياداعى بوس جۇمىس ورىندارى «SamrukQyzmet» ءبىرىڭعاي رەكرۋتينگ پورتالىندا جاريالاناتىنىن ايتتى.

«ۇمىتكەرلەردى باستاپقى ىرىكتەۋ پروتسەسى اۆتوماتتاندىرىلعان. بۇل ادامي فاكتور جانە سىبايلاس جەمقورلىق قاۋپىنىڭ الدىن الادى. ءار ۇمىتكەردىڭ ءوتىنىشى جەكە قارالادى جانە بارلىعىمەن كەرى بايلانىس ورناتىلادى. پورتال ىسكە قوسىلعالى 20 مىڭنان استام بوس جۇمىس ورنى جاريالاندى. وسى كۇنگە دەيىن 7 مىڭنان استام ادام جۇمىسقا تۇردى. بۇگىندە «SamrukQyzmet» پورتالىندا 123 مىڭنان استام ءوتىنىش بەرۋشى تىركەلدى»، - دەدى ع. اۋعانوۆ.

فوتو: www.sk.kz

اۆتور

داۋلەت ىزتىلەۋ

جاڭالىقتار