ەلوردادا «سەرگەك» كامەرالارى 800 مىڭنان استام ەرەجە بۇزۋ فاكتىلەرىن تىركەدى
بۇل تۋرالى ەلوردالىق پوليتسيا دەپارتامەنتى اكىمشىلىك پوليتسيا باسقارماسىنىڭ باسشىسى ەلجان شوپەكوۆ ايتىپ بەردى، دەپ حابارلايدى قازاقپارات ءتىلشىسى.
«اپتا سايىن ساپتىق بولىمشەلەر مەن ۋچاسكەلىك ينسپەكتورلار «جاياۋ جۇرگىنشى» جەدەل- الدىن الۋ شاراسىن جۇرگىزەدى، اسىرەسە اپات بولۋ قاۋپى جوعارى ورىنداردا ءجيى جۇرگىزىلەدى. ماسەلەن، جىل باسىنان بەرى 14 مىڭنان استام جاياۋ جۇرگىنشى تارتىلدى، بۇل وتكەن جىلدىڭ كورسەتكىشىنەن ەكى ەسەگە ارتىق. بارلىق قابىلدانعان شارالارعا قاراماستان، جاياۋ جۇرگىنشىلەردىڭ تارتىبىنە قاتىستى ماسەلەلەر شەشىلمەي كەلەدى. ەرەجە بۇزۋشىلارمەن پروفيلاكتيكالىق جۇمىس نەگىزىنەن تىركەۋ كامەرالارىنىڭ كومەگىمەن جۇرگىزىلەدى»، - دەدى ەلجان شوپەكوۆ پ د بريفينگىندە.
ونىڭ ايتۋىنشا، قالا بويىنشا 6 مىڭنان استام «سەرگەك» كامەراسى ورناتىلعان. «بۇل كامەرالار 800 مىڭنان استام ەرەجە بۇزۋ فاكتىلەرىن تىركەدى، مىسالى جىلدامدىق رەجيمىن بۇزۋ - 406 مىڭ، بەلگىلەردىڭ تالاپتارىن ەلەمەۋ - 384 مىڭ، باعدارشامنىڭ تىيىم سالاتىن سيگنالىنا ءوتۋ بويىنشا - 914 وقيعا انىقتالعان. «كوركەم تەلەكوم» كومپانياسى «جۇك كولىگىنىڭ جول ءجۇرۋ بولىگىندە ورنالاسۋى» بۇزۋشىلىعىن انىقتاۋ ءۇشىن جاڭا قوسىمشا فۋنكتسيا ازىرلەدى جانە ەنگىزدى. وزدەرىڭىز بىلەتىندەي، جۇك كولىگىن ءۇشىنشى جولاقتا جۇرگىزۋگە بولمايدى. جول قوزعالىسىنىڭ قاۋىپسىزدىگىنە اسەر ەتەتىن نەگىزگى فاكتور ەلوردانىڭ كوشە- جول جەلىسىنىڭ جاي- كۇيى مەن دامۋى بولىپ قالا بەرەدى»، - دەپ اتاپ ءوتتى سپيكەر.
سونىمەن بىرگە، سپيكەر جاڭا وقۋ جىلى قارساڭىندا قالالىق پوليتسيا دەپارتامەنتى جالپى ءبىلىم بەرەتىن جانە مەكتەپكە دەيىنگى وقۋ ورىندارىنا جاقىن كوشە- جول جەلىسىنە قوسىمشا تەكسەرۋ جۇرگىزىلگەنىن اتاپ ءوتتى. بۇل تەكسەرۋمەن 94 مەكتەپ، 100 مەكتەپكە دەيىنگى مەكەمە جانە 11 قوسىمشا ءبىلىم بەرۋ مەكەمەسى وتەتىن اۆتوجول ۋچاسكەلەرى قامتىلعان. تەكسەرۋ ناتيجەسى بويىنشا اكىمدىكتىڭ قۇزىرەتتى مەملەكەتتىك مەكەمەلەرىنە 152 ۇيعارىم بەرىلگەن.
اۆتور: ايجان سەرىكجان قىزى