شىعىس قازاقستانعا وزبەكستاننان 800 قۇرىلىسشى تارتىلماق
كەزدەسۋ بارىسىندا ەكونوميكالىق ىنتىماقتاستىق، ونىڭ ىشىندە تۋريزم سالاسىنداعى سەرىكتەستىك ماسەلەلەرى تالقىلاندى. سونىمەن قاتار، ەڭبەك كوشى-قونى باعىتىنداعى بىرلەسكەن جۇمىس مۇمكىندىكتەرى ءسوز ەتىلدى.
بۇل رەتتە وزبەكستان رەسپۋبليكاسىنىڭ باس كونسۋلى ابرور فاتحۋللايەۆ ءوز ەلىنىڭ ازاماتتارىن ەڭبەككە تارتۋدا ش ق و- نىڭ تاجىريبەسى باسقالارعا ۇلگى ەكەندىگىن اتاپ ءوتتى.
«ەل پرەزيدەنتى وتكەن جىلدىڭ تامىز ايىندا قاۋىپسىز ەڭبەك كوشى-قونىن ۇيىمداستىرۋ تۋرالى قاۋلى شىعاردى. بۇل تۇرعىدا ءبىز شىعىس قازاقستان كومپانيالارىمەن سەرىكتەستىككە مۇددەلىمىز. كەشە «سەرۆيس س م ۋ» كومپانياسىنىڭ باسشىلىعىمەن كەزدەسىپ، قۇرىلىس نىساندارىن كوردىك. وندا جۇمىس ىستەيتىن ميگرانتتارمەن جۇزدەستىك. ەڭ باستىسى، سىزدەردىڭ وبلىستارىڭىزداعى قۇرىلىس كومپانيالارى جۇمىسقا تارتۋ شارالارىن زاڭناماعا سايكەس جۇزەگە اسىرادى»، - دەدى ول.
سونداي-اق ابرور فاتحۋللايەۆ ش ق و- عا جۇمىس كۇشىنىڭ قاجەتتىلىگى بويىنشا قىزمەتكەرلەردى قابىلداۋعا كومەكتەسۋگە دايىن ەكەنىن ايتتى.
«مەموراندۋممەن ءجىتى تانىسىپ شىقتىم. تولىقتاي قولدايمىن. ءبىزدىڭ ءبىرىنشى مىندەتىمىز - وزبەكستاننان كەلگەن ازاماتتاردى قابىلداپ، لايىقتى جاعداي جاساۋ. بارلىق ءتيىستى تاپسىرمالار بەرىلدى. وزبەكستاندىق باۋىرلارىمىز جۇمىس ىستەيتىن قۇرىلىس كومپانيالارىن بىلەمىن، ولارمەن جۋىقتا كەزدەستىم. ەگەر قانداي دا ءبىر كەمشىلىكتەر بولسا، قىسقا مەرزىمدە جويىلادى. جالپى وڭىردە قۇرىلىس سالاسىنداعى كادرلارعا سۇرانىس جوعارى. جاقىن ارادا ءبىز 800 ادامعا ءوتىنىم بەرەمىز»، - دەدى دانيال احمەتوۆ.
سونىمەن قاتار ايماق باسشىسى ماشينا جاساۋ سالاسىندا باۋىرلاس ەلدەردىڭ جاقسى جۇمىس ىستەي الاتىنىن اتاپ ءوتتى. سەبەبى وزبەكستاندا ماشينا جاساۋ زاۋىتى بار، ال شىعىس قازاقستاندا ءتۇرلى تەحنيكالار جيناقتالادى.