ومىراۋمەن ەمىزۋ الەمدە 800 مىڭ بالانىڭ ءومىرىن قۇتقارادى

نۇر-سۇلتان. قازاقپارات - دۇنيەجۇزىلىك بالا ەمىزۋ اپتالىعىنا وراي، الماتى قالاسى قوعامدىك دەنساۋلىق ساقتاۋ باسقارماسىنىڭ N29 قالالىق ەمحاناسىنىڭ باس دارىگەرى، جوعارى ساناتتى اكۋشەر-گينەكولوگ اقميرا سادىقوۆا ومىراۋمەن ەمىزۋدىڭ پايدالى تۇستارىن اڭگىمەلەپ بەردى، دەپ حابارلايدى قازاقپارات ءتىلشىسى.

انا سۇتىمەن ەمىزۋ - دۇنيەجۇزىلىك دەنساۋلىق ساقتاۋ ۇيىمى جانىنداعى انا مەن بالانىڭ دەنساۋلىعىن قورعاۋ ورتالىعىنىڭ ءبىر باعدارلاماسى. بۇل باعدارلامانى 170 ەل قابىلداعان جانە ونىڭ ىشىندە قازاقستان دا بار. 1990-جىلدان باستاپ، 1-7- تامىز ارالىعىندا الەمنىڭ 170 مەملەكەتى انا سۇتىمەن قورەكتەندىرۋ، ەمىزۋ اپتالىعىن وتكىزىپ كەلەدى.

بالاعا قاجەتتى دارۋمەن انا سۇتىمەن بەرىلەدى

ومىراۋمەن ەمىزۋدىڭ بالا ءۇشىن، انا ءۇشىن، جانۇيا ءۇشىن جانە ەلىمىز ءۇشىن دە پايداسى بار. بالا ءۇشىن انا ءسۇتى - ەڭ جاقسى تاعام. بالانى 9 اي كوتەرگەن انا اعزاسىنداعى ءاربىر جاسۋشا بالاعا قانداي ميكروەلەمەنتتىڭ قاجەت ەكەنىن سەزەدى. ياعني، انا ءوز ءسۇتى ارقىلى اقۋىز، كومىرسۋ، ماي، پايدالى دارۋمەن، مينەرالداردى تۋرا بالاعا كەرەك مولشەردە بەرە الادى. سونداي-اق، انا ءسۇتىن «بالانىڭ يممۋنيتەتى» دەپ اتايدى. سەبەبى، انا سۇتىندە يممۋنوگلوبۋليندەر بار. ول ءسابيدىڭ ءارتۇرلى ۆيرۋس، ينفەكسيا، ميكروبتارعا قارسى كۇرەسۋىنە مۇمكىندىك بەرەدى. ەمىزۋ بالانىڭ اناسىنا دەگەن سۇيىسپەنشىلىگىن ارتتىرادى جانە بالا اناسىنىڭ ماحابباتىن سەزەدى. سۇيىسپەنشىلىكتە وسكەن بالا باسقانى دا سۇيۋگە قابىلەتتى بولادى.

جاڭا تۋعان ءسابيدى ءبىر ساعاتتا انا ومىراۋىنا سالۋ كەرەك. بالا ەمگەندە، انانىڭ گورموندىق تەڭگەرىمى دۇرىستالادى، جاتىرى جيىرىلىپ، بوسانۋدان كەيىنگى قان كەتۋدەن قورعايدى. ومىراۋ وبىرى نەمەسە انالىق بەزدەگى وبىردىڭ الدىن الۋعا بولادى. پسيحولوگيالىق تۇرعىدا دا، ايەل توعىز اي كوتەرگەن ءسابيىن باۋىرىنا الىپ، قوعام الدىنداعى انالىق بورىشىن ورىنداعانىن ۇعىنادى.

ومىراۋدان كۇشتەپ شىعارۋعا بولمايدى

بالانى 6 ايعا دەيىن تەك قانا انا سۇتىمەن قورەكتەندىرگەن ابزال. التى ايدان كەيىن ومىراۋ سۇتىمەن قاتار قوسىمشا تاعامداردى بەرىپ باستاۋ كەرەك. بالانىڭ ءوزى ومىراۋدان بىرتىندەپ باس تارتۋى ءتيىس، ونى كۇشتەپ شىعارۋ دۇرىس ەمەس. ءۇش جاسقا دەيىن بالا انا سۇتىنەن ايىرىلعىسى كەلمەسە، تۇنگى ەمىزۋدى قالدىرۋعا بولادى. اتا-بابالارىمىز كەزىندە بالانى 5-6 جاسقا دەيىن ەمىزگەن جانە ونىڭ دۇرىستىعىن عالىمدار دالەلدەدى. سەبەبى، قوسىمشا تاماق جەي وتىرىپ، ەمشەكتەن باس تارتپاعان بالا تولىق ۋىز المادى دەگەن ءسوز. ەمشەكتى ازايتقاندا، باس تارتۋعا جاقىنداعاندا، انا ومىراۋىنان مايلى، قۇنارلى ۋىزدىڭ بولىنەتىنى سودان. سەبەبى، ومىراۋ بالا اعزاسىنا قاجەتتى زاتتاردى بەرىپ وتىر.

ايەلدىڭ جۇمىسقا شىعۋى نەمەسە ستۋدەنت اتانۋى دا ءسابيدى سۇتتەن ايىرۋعا سەبەپ ەمەس. اسىرەسە ستۋدەنت انالار ءسۇتتى ساۋىپ، بوتەلكەنى كۇتۋشىگە قالدىرا الادى جانە كەيىنگى ۋاقىتتا ءوز ومىراۋىمەن ەمىزۋىنە بولادى. دەنە ءبىتىمىن ويلاعان ايەلدەردىڭ دە ەمىزۋدى كۇرت ءۇزۋى دۇرىس ەمەس. سەبەبى، جۇكتىلىكتە كەز كەلگەن انا ورتا ەسپپەن 20 كەلىگە دەيىن سالماق قوسادى. ىشتەگى بالانىڭ سالماعى - 3 كەلىنىڭ اينالاسىندا عانا، ونىڭ جولداسى مەن ۇلكەيگەن جاتىردىڭ كولەمى شامامەن 2 كەلى، ءارى كەتسە 6 كەلىنى عانا قۇرايدى. ال قالعان 14 كەلىنى جۇكتى ورگانيزم بالانى ومىراۋمەن ەمىزۋگە قور رەتىندە جينايدى. ەگەر انا بالانى 6 ايعا دەيىن ومىراۋمەن قورەكتەندىرسە، 2 جاسقا دەيىن قوسىمشا تاعام بەرە وتىرىپ، تاعى دا ەمىزسە، 14 كەلى قايتادان سىلىنىپ تۇسەدى. ياعني، جيناعان قور بالاعا جۇمسالادى. ال اياق استى ومىراۋدان كۇشتەپ شىعارۋ اعزا ءۇشىن گورموندىق سترەسس بولادى جانە ەندوكريندىك ماسەلەلەر تۋىنداۋى مۇمكىن. تەك قانا ايەل كەلەسى بالاعا جۇكتى بولعاندا، اعزاعا جۇك بولماۋى ءۇشىن، ءماجبۇرلى تۇردە بالانى ومىراۋدان شىعارۋعا تۋرا كەلەدى.

انانىڭ ءسابيىن ەمىزۋىنە جاعداي جاسايىق

انا ءوز اعزاسىنا زيان كەلتىرمەۋى ءۇشىن قۇنارلى تاماقتانۋى ءتيىس. سەبەبى، سۇتكە جەتىسپەي جاتقان پايدالى ميكروەلەمەنتتەر انانىڭ ءوز جاسۋشاسىنان بولىنەدى، وسىلايشا سابيگە ءسۇت ارقىلى جىبەرىلەدى. سوندىقتان، انا ەش تاعامنان ءوزىن شەكتەمەي، ءجيى تاماقتانۋى ءتيىس. اسىرەسە سۇيىق تاعامدار مەن سۋسىندى كوبىرەك ىشكەن ءجون. بالانى ەمىزۋدە «ەمىرەنۋ» دەگەن ۇعىم بار. ياعني، ايەل ارتىق ەشتەڭەنى ويلاماي، بالاسىمەن ەموتسينالدىق بايلانىس ورناتۋى ءتيىس. ايەل اشۋلانعاندا، مازاسىزدانعا دۇرىس ءسۇت شىقپايدى.

سوسىن بوس رەزەڭكە ەمىزىكتەردى مۇمكىندىگىنشە قولدانباعان ءجون. ياعني، ەمىزدىككە بوي ۇيرەتكەن ءسابي ومىراۋدى ەمبەي كەتۋى مۇمكىن. سەبەبى، ەمىزدىك پەن ومىراۋدى پايدالانعاندا، بالانىڭ ءتۇرلى بۇلشىقەتتەرى قوزعالادى. بۇل اۋىز قۋىسىنداعى بۇلشىقەتتەردىڭ دۇرىس قالىپتاسپاۋىنا اكەپ سوعادى. جاڭادان شىعاتىن ءتىستىڭ، تاڭدايدىڭ قالىپتاسۋىنا، ءتىستىڭ ساۋلىعىنا دا ىقپال ەتەدى. انا ومىراۋىنداعى، تەرىسىندەگى ميكروفلورا بالادا اۋرۋ تۋدىرمايدى. سەبەبى، انانىڭ يممۋنيتەتى ءسۇت ارقىلى بالاعا بەرىلەدى. ال رەزەڭكە ەمىزىك ستەريلدى ەمەس. سايكەسىنشە، بوتەن زاتتار ءتۇرلى اۋرۋ تۋدىرۋى مۇمكىن. جالپى، ەمىزۋ اپتالىعىنىڭ بيىلعى ۇرانى - «انانىڭ ءسابيىن ەمىزۋىنە جاعداي جاساۋ» دەپ اتالادى. ول تەك انا مەن بالاعا ەمەس، قورشاعان ورتاسىنا، جانۇياسىنا، جۇمىس بەرۋشىگە، كورشىلەر مەن تۋىستارىنا قاتىستى. بارلىعى بىرىگىپ، انانىڭ بالانى ەمىزۋىنە جاعداي جاساۋى قاجەت. مەديتسينالىق قىزمەتكەرلەر ءوز تاراپىنان دۇرىس اقپارات بەرسە، جۇمىس بەرۋشى ەڭبەك كودەكسىنە سايكەس، ءتيىستى دەمالىسىمەن قامتاماسىز ەتەدى. جاس بوسانعان ايەل 18 اپتا اقىلى دەمالىستا وتىرا الادى. ءارى قاراي قاجەت بولعان جاعدايدا 3 جىلعا ءۇزىلىس الا الادى جانە ونىڭ جۇمىس ورنى ساقتالادى. جاقىندارى مەن تۋىستارى دا بارىنشا قولداۋ كورسەتكەندەرى ءجون. انا ەش ماسەلەگە الاڭداماي، بالاسىن ءوسىرۋى ءتيىس.

يۋنيسەف دەرەكتەرىنە سايكەس، الەمدە انا سۇتىمەن ەمىزۋ جىل سايىن 800 مىڭ بالانىڭ ءومىرىن قۇتقارادى جانە 20 مىڭ انانى ومىراۋ وبىرىنان قورعايدى.