وڭتۇستىك كورەيادا سوڭعى 80 جىلدا بولماعان تابيعات اپاتىنان 7 ادام قازا بولدى

سەۋل. قازاقپارات - سەۋل مەن ونىڭ ماڭىنداعى ايماقتاردا سوڭعى 80 جىلدا بولماعان نوسەر جاۋىن جاۋىپ، سالدارىنان جەتى ادام قازا تاپتى، تاعى التاۋى ءىز-ءتۇزسىز جوعالىپ كەتكەن.

ۇيلەردى، كولىكتەردى، عيماراتتار مەن مەترو ستانتسيالارىن سۋ باسىپ قالدى، دەپ حابارلايدى قازاقپارات Yonhap اگەنتتىگىنە سىلتەمە جاساپ. سەۋلدىڭ كەيبىر بولىكتەرى، باتىستاعى ينچحون پورت قالاسى جانە كەنگي پروۆينسياسىنا دۇيسەنبى كۇنى كەشكە ساعاتىنا 100 م م-دەن استام جاۋىن جاۋدى، دوندجاك ايماعىندا ساعاتىنا 141,5 م م- دەن اسىپ كەتتى، بۇل 1942 -جىلدان بەرگى ەڭ مول جاۋىن- شاشىن. سەۋلدەگى تولاسسىز جاۋعان جاڭبىر بەس ادامنىڭ ءومىرىن قيدى، تورتەۋى ءىز- ءتۇزسىز جوعالدى. 163 ادام باسپاناسىز قالىپ، مەكتەپتەر مەن باسقا مەملەكەتتىك مەكەمەلەردى پانالادى.

كەنگيدو پروۆينسياسىندا ەكى ادام قازا تاۋىپ، تاعى ەكەۋى ءىز- ءتۇزسىز جوعالعان، توعىز ادام جارالاندى. ۇكىمەتتىڭ حابارلاۋىنشا، ءورت ءسوندىرۋ قىزمەتى 88 ادامدى قۇتقارعان.

جاۋعان نوسەر كوپتەگەن قوعامدىق نىسانداردىڭ جۇمىسىن توقتاتتى. سەۋل، ينچحون جانە باسقا جەرلەردە سەگىز تەمىر جولدى سۋ باسىپ، كەيبىر تەمىرجولدار مەن مەترو جەلىلەرىندە قىزمەت كورسەتۋ ۋاقىتشا توقتاتىلدى دەپ حابارلاندى. قاۋىپسىزدىك ماقساتىندا ەلدەگى جولداردىڭ 80-گە جۋىق ۋچاسكەسى، ءۇش جەراستى بولىگى جانە وزەن جاعاسىنداعى 26 اۆتوتۇراق جابىلدى. ون توعىز جولاۋشى پارومىنىڭ باعىتى توقتاتىلدى. كورەيانىڭ مەتەورولوگيالىق باسقارماسىنىڭ مالىمەتى بويىنشا، ەلدىڭ ورتالىق جانە باسقا ايماقتارىندا ساعاتىنا 50 م م- گە دەيىن جاڭبىر جاۋدى، سەۋلدە دۇيسەنبىدەن سەيسەنبىگە دەيىن جينالعان جاۋىن- شاشىن مولشەرى 422 م م- گە جەتتى. سارسەنبىگە دەيىن ەل استاناسى مەن گانگۆون پروۆينسياسىندا جاۋىن- شاشىن مولشەرى 300 م م- گە دەيىن ارتۋى مۇمكىن دەپ بولجانىپ وتىر. كورەيانىڭ ورمان قىزمەتى سەيسەنبى كۇنى تاڭەرتەڭ بۇكىل ەل بويىنشا 47 قالا مەن وكرۋگكە كوشكىن قاۋپى تۋرالى ەسكەرتۋ جاسادى، ونىڭ ىشىندە سەۋلدەگى توعىز اۋدان، ينچحون، كەنگيدو، كانۆوندو، سولتۇستىك جانە وڭتۇستىك چحۋنچحون پروۆينسيالارى بار.

فوتو: en.yna.co.kr