ۇيدەن نان ءپىسىرىپ ساتاتىن قازاقستاندىقتار 8,7 ميلليارد تەڭگە پايدا تاپقان

نۇر-سۇلتان. قازاقپارات - بيىلعى جىلدىڭ ءبىرىنشى توقسانىندا ەلىمىزدەگى ءۇي شارۋاشىلىقتارى 29,9 ميلليارد تەڭگە سوماسىنا ءونىم وندىرگەن.

بۇل وتكەن جىلدىڭ سايكەس كەزەڭىمەن سالىستىرعاندا 3,1 پايىزعا كوپ، دەپ حابارلايدى قازاقپارات ءتىلشىسى Energyprom.kz-كە سىلتەمە جاساپ.

Energyprom.kz اقپاراتى بويىنشا، قازاقستاندىقتار كوبىنە ۇيدەن نان ءپىسىرىپ ساتۋمەن اينالىسادى.

ماسەلەن، بيىلعى ءۇش ايدا ەلىمىزدىڭ ءۇي شارۋاشىلىقتارىنىڭ نان ساتۋدان تاپقان پايداسى 8,7 ميلليارد تەڭگەنى قۇراعان. بۇل وتكەن جىلمەن سالىستىرعاندا 6,2 پايىزعا كوپ. سونداي-اق توقاش جانە ۇننان جاسالاتىن وزگە دە كونديتەرلىك ونىمدەردى ۇيدەن ءپىسىرىپ ساتاتۋدان تۇسكەن قاراجات 6,9 پايىزعا ارتىپ، 8 ميلليارد تەڭگەنى قۇرادى.

بۇل ورايدا، ونىمدەردى كوبىنە الماتى وبلىسىندا ورنالاسقان ءۇي شارۋاشىلىقتارى وندىرگەن. ولار بيىل ءوز ونىمدەرىن 6,2 ميلليارد تەڭگەگە وتكىزگەن. اتالعان باعىتتا كىرىسى كوپ وڭىرلەردىڭ ۇشتىگىنە تۇركىستان (6 ميلليون تەڭگە، ءوسىم %3,5) جانە پاۆلودار (5,3 ميلليون تەڭگە، ءوسىم %18,5) وبلىستارى كىردى. ال جەكە ءونىم ءوندىرۋ كولەمى ەڭ از ءونىر - ماڭعىستاۋ وبلىسى. قازاقستاندىقتاردىڭ جەكە ءونىم جاساۋ سالاسىنداعى كىرىسى ارتقانمەن، وعان جۇمسالاتىن شىعىندار دا وسكەن.

اتاپ ايتقاندا، ازاماتتار ءۇش ايدا 29,9 ميلليارد تەڭگە پايدا تاپسا، ونىڭ 14,7 ميلليارد تەڭگەسى شىعىندارعا جۇمسالعان.