وڭتۇستىك كورەيا قازاقستان ەكونوميكاسىنا 8,5 ميلليارد دوللار ينۆەستيتسيا سالدى

استانا. قازاقپارات - وڭتۇستىك كورەيا - قازاقستانداعى ەڭ ءىرى 10 ينۆەستور ەلدىڭ ءبىرى. وسى كۇنگە دەيىن اتالعان مەملەكەت ەلىمىزدىڭ ەكونوميكاسىنا 8,5 ميلليارد دوللار ينۆەستيتسيا قۇيعان.

تولىعىراق ق ر پرەمەر-ءمينيسترىنىڭ ورىنباسارى - سىرتقى ىستەر ءمينيسترى مۇرات نۇرتىلەۋ ايتىپ بەردى، دەپ حابارلايدى قازاقپارات ءتىلشىسى.

«قازاقستان مەن وڭتۇستىك كورەيا اراسىندا مازمۇندى ءارى تۇراقتى ساياسي ديالوگ ورناعان. كوپتەگەن وڭىرلىك جانە حالىقارالىق ماسەلەلەر بويىنشا ۇستانىمدارىمىز ۇقساس. اسىرەسە، كوپجاقتى ديپلوماتيادا ءوزارا قولداۋ جولعا قويىلعانىن ەرەكشە اتاپ وتكەن ءجون. ساۋدا مەن ەكونوميكا سالاسىنداعى ىنتىماقتاستىق جىل ساناپ قارقىندى دامىپ كەلەدى. وڭتۇستىك كورەيا - قازاقستانداعى ەڭ ءىرى 10 ينۆەستوردىڭ ءبىرى جانە ازيا قۇرلىعىنداعى اۋقىمى جاعىنان ەكىنشى ساۋدا سەرىكتەسىمىز»، - دەدى مۇرات نۇرتىلەۋ وڭتۇستىك كورەيا رەسپۋبليكاسىنىڭ سىرتقى ىستەر ءمينيسترى پاك جيننىڭ ەلىمىزگە ساپارى بارىسىندا ۇيىمداستىرىلعان بريفينگتە.

ءمينيستردىڭ ايتۋىنشا، بولاشاقتا ەكى مەملەكەت تە ينۆەستيتسيا كولەمىن ۇلعايتۋعا مۇددەلى.

«وسى ۋاقىتقا دەيىن وڭتۇستىك كورەيا رەسپۋبليكاسى قازاقستان ەكونوميكاسىنا 8,5 ميلليارد دوللار ينۆەستيتسيا قۇيدى. بىلتىر بۇل ءۇردىس جالعاسىپ، ءبىر جىلدا ونىڭ كولەمى 1,5 ميلليارد دوللار بولدى. بۇل - ەكىجاقتى ينۆەستيتسيالىق ىنتىماقتاستىق تاريحىنداعى ەڭ جوعارى كورسەتكىش. قازاقستاندا كولىك جاساۋ، قۇرىلىس، مۇناي-حيميا، ازىق-تۇلىك جانە تاعى باسقا سالالاردا «KIA» ،«Hyundai» ،«Lotte» ،«POSCO» ،«SK» سياقتى كورەي بيزنەسىنىڭ قاتىسۋىمەن 740 كومپانيا تىركەلگەن. ولار بىرلەسكەن 28 ءىرى جوبانى جۇزەگە اسىرىپ جاتىر»، - دەيدى ول.

بۇعان دەيىن حابارلاعانىمىزداي، وڭتۇستىك كورەيا پرەزيدەنتى يۋن سوك ەل رەسمي ساپارمەن قازاقستانعا كەلەدى.