رەكوردتىق كورسەتكىش: ءبىر كۇندە 8,4 ميلليون ادامعا ۆاكسينا سالىندى
ءۇندىستان - الەمدەگى ەڭ ءىرى ۆاكسينا وندىرۋشىلەردىڭ ءبىرى. الايدا ونىڭ ءوزىنىڭ ۆاكسينالاۋ بويىنشا كامپانياسى باياۋ قارقىنمەن ءجۇردى. سوندىقتان ەل بيلىگى حالىقتىڭ ەرەسەك بولىگىنىڭ بارلىعىنا كوروناۆيرۋسقا قارسى تەگىن ۆاكسينا سالۋدى كوزدەيتىن جاڭا ساياسات ەندىرۋگە شەشىم قابىلدادى.
وعان ساي، فەدەرالدى ۇكىمەت ەلدە وندىرىلەتىن ۆاكسينالاردىڭ 75 پايىزىن ساتىپ الىپ، ءۇندىستان شتاتتارى اراسىندا بولەتىن بولادى. دەنساۋلىق ساقتاۋ مينيسترلىگىنىڭ دەرەكتەرى بويىنشا، ۆاكسينالاۋ بويىنشا جاڭا ستراتەگيانىڭ ىسكە اسىرىلۋىنىڭ ءبىرىنشى كۇنى ءۇندىستاندا ۆاكسينا العان ازاماتتاردىڭ رەكوردتىق سانى تىركەلدى - 8,4 ميلليون.
بۇل، سونىمەن قاتار، ەلدەگى ۆاكسينالاۋ كومپانياسى باستالعاننان بەرى ءبىر كۇن ىشىندە سالىنعان ماكسيمالدى دوزا بولىپ وتىر.
«بۇگىنگى ۆاكسينالاۋدىڭ رەكوردتىق سانى قۋانتىپ وتىر. ۆاكسينا - ءبىزدىڭ COVID-19-بەن كۇرەستەگى ەڭ مىقتى قارۋىمىز. ەكپە الدىرعان ازاماتتاردىڭ بارلىعىن قۇتتىقتايمىز، سونىمەن قاتار ازاماتتاردى ۆاكسينامەن قامتاماسىز ەتۋ ماقساتىندا ايانباي ەڭبەك ەتىپ جۇرگەن مايدانگەرلەرگە العىسىمىزدى ايتامىز»، - دەپ جازدى ءۇندىستاننىڭ پرەمەر-ءمينيسترى نارەندرا مودي Twitter- دە.
سونىڭ وزىندە قازىرگى كەزدە ءۇندىستان حالقىنىڭ 5-تەن شامالى عانا جوعارى پايىزى ۆاكسينا العان، كوپتەگەن شتاتتاردا ۆاكسينا تاپشىلىعى ساقتالۋدا. ساراپشىلاردىڭ ايتۋىنشا، جەلتوقساندا 950 ميلليون ادامعا ەكپە سالىپ ۇلگەرۋ ءۇشىن كۇنىنە 10 ميلليون ادام ۆاكسينا الىپ وتىرۋى كەرەك.
اۆتور: ءبيبىحان سەرىكوۆا