كوپبالالى وتباسىلار ءۇشىن پاتەرلەر 8,4 ميلليون تەڭگەدەن باستالماق

استانا. قازاقپارات - يندۋستريا مەن ينفراقۇرىلىمدىق دامۋ مينيسترلىگىنىڭ كوميتەتى كوپبالالى وتباسىلار ءۇشىن ارنالعان پاتەرلەردىڭ باعاسى قانداي بولاتىنىن ايتتى.

ولاردىڭ قۇنى 8,4 ميلليون تەڭگەدەن باستالماق دەپ حابارلايدى KAZ. NUR. KZ.

2 پايىزدىق يپوتەكاعا سالىناتىن ۇيلەردىڭ باعاسى 60 شارشى مەترگە 140 مىڭ تەڭگەدەن كەلگەن.

قۇرىلىس ىستەرى مەن تۇرعىن ءۇي-كوممۋنالدىق شارۋاشىلىعى كوميتەتىنىڭ باسشىسى اكىمشىلىكتە كەزەكتە تۇرعان 487 مىڭ وتباسىلاردىڭ 28 مىڭى كوپبالالى ەكەنىن مالىمدەدى. بۇل 2019-جىلدىڭ 1- قاڭتارىنداعى كورسەتكىش.

انىقتالعانداي، كوپتەگەن كوپبالالى انالار باسقا تىزىمگە كەزەككە تۇرعان. ولار مەملەكەتتىك قىزمەتكەرلەر، مۇگەدەكتەر مەن تولىق ەمەس وتباسى كەزەگىنە تىركەلگەنى بەلگىلى بولدى.

ەندى جالپى كەزەكتەن ءبولىنىپ شىققان 28 مىڭ وتباسى 2 پايىزدىق يپوتەكاعا بەرىلەتىن ءبىرىنشى يەگەرلەرى اتالماق. الداعى جەتى جىلدا 42 مىڭ پاتەر سالۋ جوسپارلانۋدا.

«پاتەرلەردىڭ باعاسى شامامەن 8,4 ميلليون تەڭگەدەن باستالماق. ول 60 شارشى مەترىنە 140 مىڭ تەڭگە ولشەمىمەن ەسەپتەلەتىن بولادى»، - دەدى مارحابات جايىمبەتوۆ.

وعان قوسا، پاتەر باعاسىنىڭ  10 پايىزىن اكىمشىلىك بەرەتىن تۇرعىن ءۇي سەرتيفيكاتتارىمەن تولەۋگە بولادى.