قاڭتار وقيعاسىنان كەيىن يزولياتوردا كۇدىكتىنى ۇرىپ ولتىرگەن 7 پوليتسەي سوتتالدى

الماتى. قازاقپارات - قاڭتار وقيعاسىنان كەيىن الماتىدا يزولياتوردا كۇدىكتىنى ۇرىپ ولتىرگەن پوليتسيا قىزمەتكەرلەرىنە قاتىستى سوت ۇكىمى شىعارىلدى، دەپ حابارلايدى قازاقپارات ءتىلشىسى.

المالى اۋداندىق سوتى الماتى قالاسى پوليتسيا دەپارتامەنتى ۋاقىتشا ۇستاۋ يزولياتورىنىڭ جەتى قىزمەتكەرىنە قاتىستى ولىمگە اكەپ سوققان، باسقا تۇلعالارعا زيان كەلتىرۋ ماقساتىندا بيلىگىن اسىرا پايدالانىپ، زورلىق-زومبىلىق قولداندى، قىزمەتتە ارەكەتسىزدىك تانىتتى دەگەن ايىپ بويىنشا قىلمىستىق ءىستى قارادى.

سوتتا 2022-جىلدىڭ 9- قاڭتارىندا جاپپاي تارتىپسىزدىكتەرگە قاتىستى دەگەن كۇدىك بويىنشا جابىرلەنۋشى ا. ۋاقىتشا ۇستاۋ يزولياتورىنا جەتكىزىلگەنى انىقتالدى. ول ۋاقىتشا ۇستاۋ يزولياتورى كامەراسىندا ازاپتاۋدان كوز جۇمدى.

سۋديا كۇدىكتىنى ءولتىردى دەپ ايىپتالعان 7 پوليتسيا قىزمەتكەرىن ق ر ق ك 146-بابى بويىنشا كىنالى دەپ تانىدى.

«التى ادامعا 8 جىلدان 10 جىلعا دەيىنگى مەرزىمگە باس بوستاندىعىنان ايىرۋ جازاسى تاعايىندالدى. قىزمەتتە ارەكەتسىزدىك تانىتقان ءبىر قىزمەتكەر 5 جىلعا سوتتالدى. سوتتالۋشىلاردىڭ بارلىعى پوليتسيا شەنىنەن ايىرىلدى»، - دەپ حابارلادى الماتى قالالىق سوتىنىڭ باسپا ءسوز قىزمەتىنەن.

سونداي-اق، سۋديا سوتتالۋشىلارعا مارقۇمنىڭ تۋىستارىنا 20 ميلليون تەڭگە مورالدىق شىعىن تولەۋگە مىندەتتەدى.

ۇكىم زاڭدى كۇشىنە ەنگەن جوق.