بانكروتتىق جاريالاعان 7 مىڭنان اسا ادامنىڭ ءوتىنىشى قاناعاتتاندىرىلمادى

استانا. قازاقپارات - قارجى ۆيتسە-ءمينيسترى ەرجان ءبىرجانوۆ ءوزىن سوتسىز بانكروت دەپ جاريالاعىسى كەلگەن كەي ازاماتتاردىڭ ءوتىنىشى نەگە قاناعاتتاندىرىلماعانىن ءتۇسىندىردى، حابارلايدى قازاقپارات ءتىلشىسى.

«بۇگىندە بانكروتتىق بويىنشا كەلىپ تۇسكەن 10382 ءوتىنىش قارالدى. بۇل - بارلىق كەلىپ تۇسكەن ءوتىنىشتىڭ 30 پايىزى. وسىلايشا 2670 ازاماتقا قاتىستى سوتتان تىس بانكروتتىق راسىمدەۋ باستالدى. اتالعان كورسەتكىش بارلىق جۇگىنىۋشىنىڭ %26 قۇرايدى. ونىڭ ىشىندە اتاۋلى الەۋمەتتىك كومەك الۋشى 375 ازامات بار. سونىمەن قاتار 985 تۇلعانىڭ 5 جىلدان استام ۋاقىت قارىزىن وتەمەي كەلگەنى انىقتالدى. بورىشكەرلەر تۋرالى مالىمەت ەلەكتروندى ۇكىمەت ۆەب-پورتالىندا ورنالاستىرىلعان»، - دەدى ەرجان ءبىرجانوۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.

ونىڭ ايتۋىنشا، 7340 ءوتىنىش يەسىنە سوتسىز بانكروت دەپ جاريالاۋدان باس تارتۋ جونىندە حابارلاما جولدانعان.

سونداي-اق، ۆيتسە-ءمينيستردىڭ ورىنباسارى سوتتان تىس باس تارتۋدىڭ نەگىزگى سەبەپتەرىن اتاپ ءوتتى.

- كرەديتتىك بيۋرونىڭ مالىمەتى بويىنشا 6713 تۇلعادا 12 اي ىشىندە بەرەشەكتى ءىشىنارا وتەۋى بار نەمەسە بەرەشەك سوماسى 1600 ا ە ك- تەن اسادى؛

- ەڭبەك جانە حالىقتى الەۋمەتتىك قورعاۋ مينيسترلىگى 1846 تۇلعا بويىنشا 6 اي ىشىندە اتاۋلى الەۋمەتتىك كومەك الىپ كەلگەنىن راستاعان جوق؛

- 1463 تۇلعا جۇبايىنىڭ بار ەكەنىن كورسەتپەگەن، سايكەسىنشە ولاردان ءراسىمدى قولدانۋعا كەلىسىم العان جوق؛

- 1349 تۇلعانىڭ مەنشىگىندە جىلجىمايتىن مۇلىك بار؛

- 941 ازاماتتا جەر ۋچاسكەلەرى بار؛

- 789 ازاماتتىڭ اتىنا اۆتوكولىك تىركەلگەن.