سايلاۋ الدىنداعى ۇگىت-ناسيحات: 7 پارتيا قاي سالالارعا باسىمدىق بەرىپ وتىر

استانا. قازاقپارات - ەلىمىزدە سايلاۋ الدىنداعى ۇگىت-ناسيحات 18- اقپاننان بەرى جالعاسىپ كەلەدى، ياعني ءۇش اپتا قاتارىنان تىركەلگەن پارتيا وكىلدەرى ەل حالقىنا وزدەرىنىڭ باعدارلاماسىن تانىستىرىپ جاتىر.

وسىعان دەيىن پارلامەنت ءماجىلىسى دەپۋتاتتىعىنا سايلاۋعا ءتۇسىپ جاتقان كانديداتتار 1- ناۋرىزدا «Qazaqstan» ۇلتتىق ارناسىنىڭ تىكەلەي ەفيرىندە پىكىرسايىسقا تۇسكەن ەدى. مۇنداي كەزەكتى پىكىرسايىس 10- ناۋرىزدا 7 ساياسي پارتيا وكىلدەرىنىڭ قاتىسۋىمەن ك ت ك تەلەارناسىنىڭ تىكەلەي ەفيرىندە ءوتتى. وعان «Amanat» پارتياسىنان ايدوس سارىم، «اۋىل» حالىقتىق دەموكراتيالىق پارتياسىنان جيگۋلي دايرابايەۆ، «Respublica» پارتياسىنان دينارا شۇكىجانوۆا، قازاقستان حالىق پارتياسىنان ەرمۇحامەت ەرتىسبايەۆ، «بايتاق» جاسىلدار پارتياسىنان اينۇر ءسابيتوۆا، «اق جول» دەموكراتيالىق پارتياسىنان ءدانيا ەسپايەۆا، ال جالپىۇلتتىق سوتسيال- دەموكراتيالىق پارتياسىنان اسحات راحىمجانوۆ قاتىستى.

AMANAT پارتياسى قانداي ماقساتتى كوزدەپ وتىر

پىكىرسايىس كەزىندە ءماجىلىس دەپۋتاتتىعىنا كانديدات ايدوس سارىم سايلاۋالدى باعدارلاما تۋرالى ايتىپ بەردى.

«ءبىزدىڭ باعدارلاما حالىقپەن بىرگە جازىلعان. ءبىز تۇرعىنداردىڭ ناقتى ماسەلەلەرىن بىلەمىز جانە ولاردى شەشە الامىز. ەلدە ءتارتىپ ورناتىپ، الەۋمەتتىك ادىلەتتىلىكتى قامتاماسىز ەتەمىز. ەلىمىزدەن زاڭسىز شىعارىلعان كاپيتالدى قايتارۋ مىندەتىن ورىندايمىز. سونىمەن قاتار، سىبايلاس جەمقورلىق، وليگوپولياعا جانە لاتيفۋنديستەرگە قارسى كۇرەستى كۇشەيتەمىز. ءار وتباسى، ءار قازاقستاندىقتىڭ تابىسىن ارتتىراتىن بولامىز. جاڭا الەۋمەتتىك كودەكستى قابىلدايمىز. ءبىز اعا بۋىننىڭ زەينەتاقىسىن جانە بازالىق زەينەتاقىنى كوتەرەمىز. زياندى زاتتارمەن جۇمىس ىستەيتىن ادامداردىڭ مەرزىمىنەن بۇرىن زەينەتكە شىعۋى تالابىن ورىندايمىز»، - دەدى ا. سارىم.

مۇنىمەن قوسا ول مۇعالىمدەر مەن دارىگەرلەردىڭ، الەۋمەتتىك قىزمەتكەرلەر مەن اسكەري قىزمەتشىلەردىڭ جالاقىسىن ارتتىرۋ ماسەلەسىن اتاپ ءوتتى.

«2 ميلليونعا جۋىق ازامات الاتىن الەۋمەتتىك كومەكتى 1,5 ەسەگە كوتەرەمىز.1 ميلليوننان استام وقۋشى ورنىن قامتيتىن مەكتەپتەر سالامىز. 730 مىڭ وتباسىنا تۇرعىن ءۇي سالامىز. ەكونوميكا سالاسىندا جىل سايىن 40 مىڭنان استام ساپالى جۇمىس ورنىن اشاتىن جۇزدەگەن كاسىپورىن اشامىز. 1,5 ميلليون جاس قازاقستاندىقتى تۇراقتى جۇمىسپەن قامتاماسىز ەتەمىز. بىرەگەي جاعداي جاسايتىن جاڭا سالىق كودەكسىن قابىلدايمىز. ودان بولەك، بيزنەس ءۇشىن 15 مىڭ رەتتەۋشى كەدەرگىلەردى الىپ تاستايمىز»، - دەيدى AMANAT پارتياسىنىڭ مۇشەسى.

سونىمەن قاتار ول اۋىلدارعا 1 تريلليون تەڭگە باعىتتالاتىنىن ايتتى.

«اگرارلىق سەكتوردا 100 ينۆەستيتسيالىق جوبانى ىسكە اسىرىپ، وعان 1,5 ميلليارد دوللار جۇمسايمىز. ءبىز «جەر اماناتى» جوباسىن جالعاستىرىپ، مەملەكەتكە تاعى 5 ميلليون گ ا جەردى قايتارامىز. قۇرمەتتى سايلاۋشىلار، ءبىز سايلاۋ الدى ۋادەلەرىمىزدىڭ ورىندالۋىنا كەپىلدىك بەرەمىز ، - دەدى ايدوس سارىم.

ازىق-تۇلىك قاۋىپسىزدىگىنە ەرەكشە ءمان بەرۋ كەرەك

«اۋىل» حالىقتىق دەموكراتيالىق پارتياسى ءتوراعاسىنىڭ ورىنباسارى جيگۋلي دايرابايەۆ ايتۋىنشا، اگروبانك قۇرۋ ماسەلەسىن شەشۋ ماڭىزدى بولىپ تۇر.

«اۋىل» پارتياسى ۇلتتىق ءال-اۋقاتتى ارتتىرۋدىڭ تۇبەگەيلى جانە جاڭا ساياساتىن ۇسىنادى جانە ونى جۇزەگە اسىرۋعا دايىن. پارتيا اۋىلدىق ايماقتار مەن اگرارلىق سالاعا ريەۆيزيا جۇرگىزۋدى كوزدەپ وتىر. ءبىز ازىق-تۇلىك قاۋىپسىزدىگى تۋرالى زاڭ قابىلدايمىز. يندۋستريالدى- اگرارلىق ەلگە لايىق رەفورمالار بولۋى ءتيىس. مەملەكەتتىك بيۋجەت ەسەبىنەن بارلىق اۋىل شارۋاشىلىعى تاۋارلارىن وندىرۋشىلەردىڭ كرەديتتىك جۇكتەمەسىن بوساتامىز. ەشكىمنىڭ باتىلى جەتپەگەن اگروبانك قۇرۋ ماسەلەسىن شەشەمىز»، - دەدى ج. دايرابايەۆ.

ونىڭ پايىمىنشا، اۋىل شارۋاشىلىعى ونىمدەرىن وندىرۋشىلەر ءۇشىن بۇكىل سالىق تۇرلەرىن جويۋ كەرەك.

«اتاپ ايتقاندا، «اۋىل» پارتياسى اۋىلعا جايلى تۇرمىستى قامتاماسىز ەتۋدى كوزدەپ وتىر. اۋىلداردىڭ ينفراقۇرىلىمىن قالپىنا كەلتىرىپ، دامىتۋ كەرەك. اۋىل ايەلدەرىنىڭ الەۋمەتتىك جاعدايىن جاقسارتۋ قاجەت، ياعني ولاردىڭ ءومىر سۇرۋىنە قولايلى جاعداي جاساۋ ماڭىزدى. ۇيدە بالا باعىپ، ونىڭ تاربيەسىمەن اينالىسىپ وتىرعان ايەلدەر مەملەكەتتەن قارجىلاي قولداۋ الۋى ءتيىس»، - دەدى پارتيا ءتوراعاسىنىڭ ورىنباسارى.

سونىمەن قاتار ول اۋىل مەن قالا اراسىنداعى ءبىلىم جانە مەديتسينالىق قىزمەت سالاسىنداعى الشاقتىقتى بارىنشا جويۋ كەرەك ەكەنىن ايتتى.

«ەلىمىزدى يندۋستريالدى-اگرارلىق دەرجاۆاعا اينالدىرامىز جانە سول ارقىلى ازىق-تۇلىك قاۋىپسىزدىگى دەڭگەيى وتە جوعارى مەملەكەت قۇرامىز. ءبىز باقۋاتتى اۋىل، دامىعان قالا، قۋاتتى مەملەكەت قالىپتاستىرامىز»، - دەدى جيگۋلي دايرابايەۆ.

قازاقستان ەكونوميكاسىنا قانداي وزگەرىستەر قاجەت

پىكىرسايىس بارىسىندا Respublica پارتياسىنىڭ تەڭ ءتوراعاسى دينارا شۇكىجانوۆا قازاقستاندىقتاردىڭ جاعدايىن جاقسارتۋ ءۇشىن پارتيا نە ۇسىناتىنىن ايتتى.

«ءبىز، Respublica پارتياسى ەكونوميكالىق وزگەرىستەردىڭ تۇپكى ناتيجەسى - قازاقستاندىقتاردىڭ ءال- اۋقاتىن جاقسارتۋ ەكەنىن ناقتى تۇسىنەمىز. سىزدەرگە قاراپايىم عانا مىسال كەلتىرەيىن، 2023-جىلى قازاقستاننىڭ كىرىس بولىگى - 17 تريلليون تەڭگە، ال شىعىس بولىگى - 21 تريلليون تەڭگە. دەمەك، 2023-جىلى مەملەكەتتىك بيۋجەتتىڭ تاپشىلىعى 4 تريلليون تەڭگە بولادى. ەگەر مەملەكەتىمىز كاسىپورىن بولسا، وندا بۇل كاسىپورىن بانكروتقا ۇشىرار ەدى. قانداي سالانى ءارى قالاي دامىتۋدى قالاعانىمىز ماڭىزدى ەمەس. وعان اقشا جوق. مۇنى بيزنەس ۇستانىمى تۇرعىسىنان ايتىپ وتىرمىن. Respublica پارتياسى - ەكونوميكانىڭ شىنايى سەكتورىندا جۇمىس ىستەيتىن بيزنەسمەندەر»، - دەدى پارتيانىڭ تەڭ ءتوراعاسى.

دينارا شۇكىجانوۆانىڭ اتاپ وتۋىنشە، كەيىنگى 10 جىلدا قازاقستاندىقتار پاندەميانى، ديەۆالۆاتسيانى، سانكتسيانى باستان كەشىردى جانە كۇن سايىن شىنايى ەكونوميكا جاعدايىندا جۇمىس ىستەپ جاتىر.

«ءبىز باسقاشا ءادىس ۇسىنعىمىز كەلەدى. ءبىز ەكونوميكانىڭ، قازاقستان ەكونوميكاسىنىڭ كىرىستى بولعانىن قالايمىز. سول ۋاقىتتا كەز كەلگەن قاراجاتتى دەنساۋلىق ساقتاۋعا، بىلىمگە جانە وزگە دە سالالاردى دامىتۋعا جۇمساۋعا بولار ەدى. قازىرگى ساتتە ءبارىمىز دە 30 جىلدان كەيىن الەمنىڭ جوعالىپ كەتپەيتىنىن جاقسى بىلەمىز. مۇمكىن، زالدا وتىرعان كوپشىلىككە بۇل قىزىق ەمەس تە شىعار. ءبىراق، مەنى بۇل تولعاندىرادى. 30 جىلدان كەيىن قىزىم قازىرگى مەنىڭ جاسىما كەلەدى. ونىڭ قالاي ءبىلىم الاتىنى، قايدا جۇمىس ىستەيتىنى جانە قالاي ەمدەلەتىنى وتە ماڭىزدى. ءبىز ينفراقۇرىلىمدى دامىتۋىمىز قاجەت. شيكىزاتتىق باعىتتان وڭدەۋگە بەت بۇرۋىمىز كەرەك»، - دەدى ول.

حالىق ناقتى وزگەرىستەردى كۇتىپ وتىر

قازاقستان حالىق پارتياسىنىڭ ءتوراعاسى ەرمۇحامەد ەرتىسبايەۆ بارشا قازاقستاندىقتاردى الداعى سايلاۋعا بەلسەندى قاتىسۋعا شاقىردى.

«ءبىزدىڭ پارتيامىزدىڭ يدەياسى - سوتسياليزم. «قايداعى سوتسياليزم؟» دەپ سۇراۋلارىڭىز مۇمكىن. مىسالى، سكانديناۆيالىق سوتسياليزم بار. نورۆەگيا وسىدان جارتى عاسىر بۇرىن عانا سولتۇستىك تەڭىزدەن مۇناي مەن گازدىڭ وراسان زور قورىن تاپقان. ال قازىر ءار نورۆەگيالىقتىڭ ارنايى شوتىندا ورتا ەسەپپەن 238 مىڭ ەۋرو جاتىر. جاڭادان ۆەلوسيپەد ويلاپ تابۋدىڭ قاجەتى جوق. بىزدە يدەيا بار، سول يدەياعا قادام باسىپ كەلەمىز. بۇل تۇرعىدان العاندا، ەگەر 19- ناۋرىزدا ميلليونداعان ادام حالىق پارتياسىنىڭ باعدارلاماسىن قولداسا، بۇل يدەيا ماتەريالدىق كۇشكە اينالادى. ءبىز بۇل ىسكە ىزگى نيەتپەن قارايمىز»، - دەدى ە. ەرتىسبايەۆ ك ت ك تەلەارناسىندا وتكەن پىكىرسايىستا.

ونىڭ ايتۋىنشا، حالىق ناقتى وزگەرىستەردى قالايدى.

«19- ناۋرىزدا كىمگە داۋىس بەرسەڭىزدەر دە، ءوزىڭىز بىلەسىز. تەك ازاماتتىق، كونستيتۋتسيالىق پارىزىڭىزدى ورىنداساڭىز بولدى، ەڭ باستىسى - سايلاۋعا كەلىڭىزدەر!»، - دەدى پارتيا ءتوراعاسى.

سونداي-اق، ول پىكىرسايىس كەزىندە وزگە پارتيا وكىلدەرىنىڭ ساۋالىنا جاۋاپ بەرە وتىرىپ، كاسىپكەرلەردى ەركىنە قويا بەرۋ كەرەكتىگىن ايتتى.

ەرمۇحامەت ەرتىسبايەۆتىڭ پىكىرىنشە، اكىمدەر مەن سۋديالاردى سايلايتىن جۇيە ەنگىزىلسە، ەلدەگى احۋال تۇبەگەيلى وزگەرمەك.

ج س د پ نە ۇسىنادى

جالپىۇلتتىق سوتسيال-دەموكراتيالىق پارتياسىنىڭ ءتوراعاسى اسحات راحىمجانوۆ سايلاۋالدى باعدارلاماسىنىڭ باسىم باعىتتارىنا توقتالىپ، جوسپارلارىمەن ءبولىستى.

«وليگارحياعا باعىتتالعان ەكونوميكادان ارىلاتىن كەز كەلدى. قازاقستان ەكونوميكاسى - بۇل قاراپايىم بولشەك ساۋدا. ياعني، «ساتىپ ال دا - ساۋدالا» ، باسقا ەشتەڭە جوق. تەك كەيبىر ادامدار بايىپ، ميلليونداعان ازاماتتار كەدەي بولاتىن پروتسەستى توقتاتۋ كەرەك. جسدپ نە ۇسىنادى؟ بىرىنشىدەن، وففشورلىق شوتتارداعى بارلىق قاراجاتتى ەلگە قايتارۋ ورىندى. بۇل ودان ءارى جۇرگىزىلەتىن رەفورمالار ءۇشىن قاجەت»، - دەدى ا. راحىمجانوۆ.

ونىڭ پايىمىنشا، ەلىمىزدەگى كاسىپورىندار ماسەلەسىن شەشۋ كەرەك، سونداي-اق بايلىقتى ءوندىرۋ جانە ەكسپورتتاۋ سالالارىن بىرتىندەپ ەل مەنشىگىنە الۋ قاجەت. مۇناي، ۋران جانە التىن سياقتى قازبا بايلىقتار جەكەلەنگەن ادامداردىڭ يگىلى مەن باسقارۋى ءۇشىن بەرىلگەن جوق.

«كىم كوپ اقشا تاپسا، سول بيۋجەتكە كوبىرەك سالىق تولەۋى ءتيىس. بۇل ءوز كەزەگىندە ءتيىمدى الەۋمەتتىك ساياساتتى جۇرگىزۋ ءۇشىن قاجەت»، - دەدى ول.

سونىمەن قاتار ا. راحىمجانوۆ تۇتىنۋشىلىق نەسيەلەر بويىنشا پايىزدىق مولشەرلەمەنى جانە كەپىلدىك بويىنشا ۇسىنىلاتىن كرەديت پەن يپوتەكانىڭ ۇستەمەسىن تومەندەتۋ قاجەت ەكەنىن ايتتى.

«تاعى ءبىر ماڭىزدى ماسەلە - سىبايلاس جەمقورلىق. سىبايلاس جەمقورلىق حالقىمىزدىڭ وركەندەۋىنە كەدەرگى كەلتىرەدى. ونىمەن اشىق جانە اياۋسىز كۇرەسۋ كەرەك. جەمقورلاردى تۇرمەگە جابۋ كەرەك. پارلامەنت تە اشىق بولۋى ءتيىس. وندا بالاما پىكىرلەر ەركىن ايتىلۋى قاجەت. وسىنىڭ الدىنداعى شاقىرىلىمدا بولعان پارتيالار وزدەرىنىڭ كاسىبي جارامسىزدىعىن كورسەتتى. ولار قاراپايىم ازاماتتاردىڭ مۇددەلەرىن قورعامايدى. باعالار نەگىزسىز قىمباتتاپ جاتىر. ماسەلەن، ءسىز دۇكەندەردە قارىز داپتەرلەرىنىڭ بار ەكەنىن جاقسى بىلەسىز. ادامدار قارىزعا تاماقتانادى، قارىزعا ءومىر سۇرەدى. بۇل داپتەرلەر ءبىزدىڭ حالقىمىزدىڭ جاعدايىنىڭ ناشارلاعانىن ايعاقتايدى»، - دەدى اسحات راحىمجانوۆ.

جەر قويناۋىنا قاتىستى كەلىسىمشارتتى قايتا قاراۋ كەرەك

«اق جول» دەموكراتيالىق پارتياسى ۇلتتىق كەڭەسىنىڭ مۇشەسى دانيا ەسپايەۆا سايلاۋالدى باعدارلامادا بايلار مەن كەدەيلەر اراسىنداعى الشاقتىقتى جويۋ، ەكونوميكانى مونوپوليادان شىعارۋ مىندەتى قويىلعانىن ايتتى.

«اق جول» پارتياسىنىڭ سايلاۋالدى باعدارلاماسىندا ءبىز كەدەيلىكتى ازايتۋ، بايلار مەن كەدەيلەر اراسىنداعى الشاقتىقتى جويۋ، ەكونوميكانى مونوپولياسىزداندىرۋ مىندەتىن قويىپ وتىرمىز. ءبىز كەدەيلىكتى قالاي جەڭۋگە بولاتىنىن بىلەمىز - بۇل ءۇشىن جاپپاي كاسىپكەرلىككە مۇمكىندىك جاساۋ كەرەك. «اق جول» پارتياسى شاعىن بيزنەستى ەسەپ بەرۋدەن بوساتۋدى، ونىڭ اينالىمىن 100 ميلليون تەڭگەگە دەيىن ۇلعايتىپ، پاتەنتپەن جۇمىس ىستەۋگە مۇمكىندىك بەرۋدى تالاپ ەتەدى. ءبىر عانا وسى مۇمكىندىك جۇمىس ورىندارىنىڭ سانىن كوبەيتۋگە مۇمكىندىك بەرەدى، جۇمىسپەن قامتۋعا ارنالعان بىردە-ءبىر باعدارلاما مۇنداي ناتيجە بەرمەگەن. ءبىز شەتەلدىك جەر قويناۋىن پايدالانۋشىلارمەن كەلىسىمشارتتاردى قايتا قاراۋدى جانە پايدانى بولۋدە قازاقستاننىڭ ۇلەسىن ارتتىرۋدى تالاپ ەتەمىز»، - دەدى دانيا ەسپايەۆا كتك تەلەارناسىندا وتكەن دەباتتا.

سونداي-اق، سپيكەر «اق جول» پارتياسى قازاقستاننان تىس جەرلەرگە كەتكەن جەمقورلاردىڭ اقشاسىن قايتارۋدى تالاپ ەتەتىنىن جەتكىزدى.

«جەمقورلار جازاسىن وتەگەننەن كەيىن دە قازاقستاننان تىس جەرگە شىعۋعا قۇقىعى جوق دەپ سانايمىز. اۋىل تۇرعىندارىنىڭ باسپانا جاعدايىن جاقسارتۋ ءۇشىن مىندەتتى اۋىلدىق يپوتەكالىق نەسيەلەۋدى ۇسىنامىز، ال بۇگىندە قالالارعا جاپپاي كوشىپ كەلە جاتقان جاستار ءۇشىن اكىمدىكتەر الەۋمەتتىك تۇرعىن ءۇي سالۋى كەرەك، سوندا بۇل جاستار اياققا تۇرىپ، بولاشاقتا وزدەرىنە ودان ءتاۋىر باسپانا ساتىپ الا الادى. بۇگىنگى باسپانا باعدارلامالارى تەك كوپبالالى وتباسىلارعا ارنالعان، ال جاس وتباسىلار نە ىستەۋى كەرەك؟ سوندىقتان ءبىز جاس وتباسىلارعا ارنالعان يپوتەكالىق باعدارلامالار بويىنشا ءاربىر بالا ءۇشىن پايىزدىق مولشەرلەمەنى تومەندەتۋدى ۇسىنامىز» ، - دەپ تولىقتىردى دانيا ەسپايەۆا.

ادىلەتتى قازاقستاننىڭ مۇددەسى ءۇشىن كۇرەسىپ جاتىرمىز

پارتيالار وكىلدەرى اراسىندا پىكىرسايىستا «بايتاق» جاسىلدار پارتياسىنان قاتىسقان اينۇر ءسابيتوۆا پارتيانىڭ جوسپارى تۋرالى ايتتى.

«ءبىز «بايتاق» جاسىلدار پارتياسىن قۇردىق. ويتكەنى ءبىز ۋادەلەردى ەستۋدەن جانە ءىرى ونەركاسىپتىك كومپانيالاردىڭ ەلىمىزدىڭ جەر قويناۋى ەسەبىنەن قالاي بايىپ جاتقانىن كورۋدەن شارشادىق. ونەركاسىپتەر اۋانى لاستاپ جاتىر. بالالارىمىز وسى لاس اۋامەن تىنىس الادى، سونداي- اق مۇنداي جاعدايدان اتا- انالارىمىزدىڭ دا دەنساۋلىعى ناشارلايدى»، - دەدى ا. ءسابيتوۆا.

وسى ورايدا ول مۇنداي زالال ءۇشىن، ونكولوگيالىق اۋرۋلار مەن باسقا دا دەرتتەر ءۇشىن ەشكىم وتەماقى الماي جاتقانىن باسا ايتتى.

ا. ءسابيتوۆانىڭ ايتۋىنشا، «بايتاق» پارتياسىنىڭ تۇعىرناماسىندا دەنساۋلىعى مىقتى، اقىلدى، ءبىلىمدى، سىبايلاس جەمقورلىققا قارسى ساناسى قالىپتاسقان جاستاردىڭ مۇمكىندىگىمەن ەكونوميكانى كوتەرىپ، مەملەكەتتىڭ قۋاتىن ارتتىرۋعا ەرەكشە ءمان بەرىلىپ وتىر.

سونىمەن قاتار ول سالاۋاتتى ءومىر سالتى ەلىمىزدىڭ ەكونوميكاسىنا دا وڭتايلى ىقپال ەتەتىنىن جەتكىزدى.

«ەلىمىزگە تازا ەنەرگيا مەن تازا ونەركاسىپ قاجەت ەكەنىن ايتقىمىز كەلەدى. ءبىز بيلىك ءۇشىن ەمەس، ادىلەتتى قازاقستاننىڭ مۇددەسى ءۇشىن كۇرەسىپ جاتىرمىز. ءبىز كۇن سايىن ازاماتتارىمىزدىڭ، قاراپايىم حالىقتىڭ قۇقىعىن قورعاپ كەلەمىز. ەگەر ءبىز پارلامەنتكە كىرسەك، وندا «بايتاق» پارتياسى ءتيىستى اۋديت جۇرگىزىپ، ونەركاسىپتىك كەشەننىڭ ەكولوگياعا كەلتىرگەن زيانىنا قاتىستى تاۋەلسىز زەرتتەۋلەر جۇرگىزەمىز. ءبىز بۇل باعىتتا ءتيىستى ارەكەتتەر جاساپ جاتىرمىز جانە جوسپارىمىزدى جۇزەگە اسىراماقپىز»، - دەدى ا. ءسابيتوۆا.